1 Tawarikh 17

24 verses

¹Óh ka lheueh Nabi Daud tinggai teutab nibak meuligoe gobnyan, bak siuroe gobnyan geutawök Nabi Natan u meuligoe geuh sira geupeugah, "Ngieng kheueh, ulôn nyoe tinggai didalam meuligoe nyang teupeugöt nibak kayée ceumara Libanon, seudangkan Peuto Peujanjian TUHAN teumpat jih na didalam khimah!" 2 Geujaweueb lé Nabi Natan, "Neupeubuet kheueh laju peue mantong nyang ka Teungku Amphon niet sabab Po teu Allah geutulông Teungku Amphon."

³Teuma nibak malam nyan Allah meufeureuman ubak Nabi Natan,

⁴"Gata jak kheueh dan tapeusampoe kheueh ubak hamba Ulôn Nabi Daud peusan Ulôn nyang lagéenyoe, 'Bukon gata nyang peudong baét keu Ulôn.

⁵Phon that bansa Israel Ulôn peubeubaih nibak nanggroe Meusé sampoe nibak saátnyoe, hántom na Ulôn tinggai lam saboh-saboh baét. Teuma sabe Ulôn jak meurawöh ho-ho mantong dan tinggai Ulôn didalam khimah.

⁶Bak watée Ulôn meurawöh meusajan deungon bansa Israel hántom na Ulôn teumanyong ubak peumimpén-peumimpén nyang ka Ulôn piléh, peue sabab jih awaknyan hana jipeudong meusaboh baét nyang teupeugöt nibak kayée ceumara Libanon keu Ulôn.'

⁷Lé sabab nyan, hai Natan, tajak peugah kheueh laju ubak hamba Ulôn Nabi Daud nyan, bahwa Ulôn, TUHAN Nyang Mahakuasa, Lôn peugah ubak jihnyan, 'Gata ka Ulôn cok nibak buet gata sibagoe ureuëng rabe bubiri di padang naleueng, dan Ulôn beuôt jeuet keuraja ateueh umat Ulôn Israel.

⁸Ulôn ka Ulôn tulông gata homantong nyang gatajak, dan somantong musoh gata habéh Ulôn peuranab bak watée gata muprang. Gata Ulôn peujeuet keu ureuëng nyang lumpah meusyeuhu lagée peumimpén-peumimpén nyang paleng raya di ateueh donya.

⁹Keu umat Ulôn Israel ka lheueh Ulôn keubah teumpat mangat jeuet keutanoh ié awaknyan mangat awaknyan hase udeb teunang dan hana jipeukaru lé gob. Seumeunjak awaknyan jiteuka ubak tanoh nyoe yoh masa ilée, dan sigohlom awaknyan na raja, awaknyan sabe jiprang lé ureuëng-ureuëng nyang galak that ubak buet nyang karu. Teuma hainyan hana teujadi le. Ulôn meunjanjoe teuma Ulôn peutaloe banmandum musoh gata, dan Ulôn bri keuturonan keu gata.

¹¹Singoh, meunyoe ka sampoe ajai gata dan gata jitanom lam jrat indatu gata, sidroe lamkawan aneuëk agam gata teuma Ulôn baét jeuet keuraja. Jihnyan kheueh nyang peudong rumoh keu Ulôn. Kerajeuen geuhnyan teuma Ulôn peuteuga, dan keu siumu masa ureuëng nibak keuturonan geuhnyan kheueh nyang hase jeuet keuraja.

¹³Ulôn teuma jeuet keu Bapak jih dan jihnyan teuma jeuet keu Aneuëk Ulôn. Ulôn teuma teutab Lôn peubuet nyang jroh ubak jihnyan sisuai ngon janji Ulôn. Janji Ulôn ubak jihnyan teutab Lôn mat, hana lagée nyang Ulôn peubuet ateueh Saul nyang ka Ulôn géesée nibak teumpat duek jih mangat gata jeuet keu raja.

¹⁴Aneuëk agam gata nyang Ulôn piléh nyan teuma Ulôn peujeuet keuraja ateueh umat Ulôn dan keurajeuen Ulôn keu siumu masa, dan aneuëk cucoe gata truen meutruen teuma jimat keurajeuen sibagoe raja.' "

¹⁵Nabi Natan geupeugah nyan banmandum ubak Nabi Daud peue nyang ka geupeugah lé Allah ubak gobnyan.

¹⁶Dan geutamong kheueh laju Nabi Daud u dalam Khimah TUHAN. Óh trok keunan laju geuduek sira geumeudoá, "Ya Allah, TUHAN ulôn, ulôn dan keuluwarga ulôn hana patot lôn teurimong keubajekan nyang TUHAN tunyok keu kamoe lagée nyang ka-ka nyoe.

¹⁷Teuma TUHAN ka neupeubuet leubeh nibak nyang ka; Droeneueh ka neupeugöt janji keuhai keuturonan ulôn keu masa nyang ukeue teuka. Nyang leubeh lom Droeneueh ka neupeusaneut ulôn sibagoe ureuëng rayeuk.

¹⁸Peu kheueh lom nyang jeuet ulôn peugah keu Droeneueh, ya TUHAN Allah? Droeneueh neuteupeue peue mantong keuhai hamba Droeneueh nyoe, teuma Droeneueh teutab neubri peunghormatan keu ulôn.

¹⁹Ateueh keuheundak Droeneueh keudroe dan keu keupeuntengan ulôn Droeneueh ka neupeubuet banmandum buet-buet nyang rayeuk nyoe deungon trok trang.

²⁰Teuma Droeneueh kheueh Allah, hana laén nyang na saban deungon Droeneueh. Kamoe meuteupeue hainyan sabab ka teubri tée phon yoh awai ilée.

²¹Bansaboh bumoenyoe hana bansa nyang sa deungon bansa Israel. Israel na kheueh saboh bansa nyang ka TUHAN peubeubaih nibak jeuet keunamiet mangat jeuet keu umat Droeneueh nyang teupiléh. Banmandum buet nyang raya dan ajaéb nyang ka TUHAN peubuet keu awaknyan deungon nyan ka teupeujeuet nan TUHAN meutamah meusyeuhu bansaboh donya. Droeneueh ka neupeulheuh umat droeneueh nibak nanggroe Meusé, dan neukireueh bansa-bansa laén bak watée awaknyan jimaju u mideuen prang.

²²Bansa Israel ka neupeujeuet keu umat Droeneueh keudroe keu siumu masa. Dan Droeneueh ya TUHAN, ka jeuet keu Po teu Allah awaknyan.

²³Jinoenyoe, ya TUHAN Allah, ulôn meuharab neupeukong kheueh keu siumu masa janji nyang ka TUHAN peugah keuhai ulôn dan keuturonan ulôn. Ulôn meuharab neupeubuet kheueh laju janji nyang ka TUHAN peugah nyan.

²⁴Dipat mantong ureuëng ramé sabe jipeu agong nan Droeneueh sira jipeugah, 'TUHAN Nyang Mahakuasa na kheueh Allah ateueh Israel.' Keu siumu masa sidroe lamkawan keuturonan ulôn teuma TUHAN peujeuet jimat peurintah sibagoe raja.

²⁵Ulôn peubeurani droe ulôn lôn lakée doányoe u hazirat Droeneueh, ya Allah, sabab Droeneueh keudroe ka lheueh nepeugah ubak ulôn bahwa aneuëk cucoe ulôn truen meutruen teuma TUHAN peujeuet keuraja ateueh bansa nyoe.

²⁶Droeneueh, TUHAN, na kheueh Allah, dan hai nyang jroh nyan ka TUHAN peujanji keu ulôn.

²⁷Lé sabab, ulôn meuharab, bah kheueh neubri beureukat keuturonan ulôn mangat siumu masa awaknyan teutab jirasa geunaséh Droeneueh. Sabab, Droeneueh ka neubri beureukat keu umat Droeneueh, ya TUHAN, deungon nyan awaknyan teutab geubri beureukat keu siumu masa."

← Previous All Books Next →

Loading Bible Translation

First-time download in progress. This may take a few seconds…

←Bible|||

Acehnese Holy Bible Wordproject Bible