1 Raja-Raja 17

24 verses

¹Na sidroe nabi nyang nan geuh Elia. Nabi nyan asai geuh nibak Tisbe, saboh banda lam wilayah Gilead. Bak siuroe gobnyan geujak ubak Raja Ahab dan geupeugah, "Deumi TUHAN nyang udeb, Po teu Allah nyang jiseumah lé ureuëng Israel dan nyang ulôn peutimang, ulôn peugah ubak Teungku bahwa dua atawa lhée thon nyang ukeue nyoe hana jitreun iémbon atawa ujeuen meubacut pi, laén hai meunyoe ulôn nyang peugah nyan."

²Óh ka lheueh nyan TUHAN geumeu feureuman ubak Elia,

³"Gata tinggai laju teumpat nyoe, tajak laju u timu di meurandeh Krueng Yordan dan tamusöm laju disinan bak binéh aneuk Krueng Kerit.

⁴Gata jeuet tajieb ié nibak aneuk krueng nyan, dan cicém gagak teuma Ulôn yue jijakba peunajoh keu gata."

⁵Elia geuseutôt banmandum peue nyang geupeurintah lé TUHAN nyan, dan geujak laju ubak binéh aneuk Krueng Kerit laju geutinggai disinan.

⁶Gobnyan geujieb nibak ié aneuk krueng nyan, dan geupajoh ruti dan uengkot sie nyang jiba lé cicém gagak tieb-tieb beungoh meunan cit tieb-tieb seupôt uroe.

⁷Óh ka na meupadub na treb teuma, aneuk krueng nyan pi tho kreng sabab hanale ié.

⁸Óh lheuehnyan TUHAN geupeugah ubak Elia,

⁹"Jinoenyoe gata harôh tajak u banda Sarfat, banda nyan rab ngon Sidon dan gata tatinggai laju disinan. Ulôn ka Lôn yue sidroe ureuëng inong balée disinan mangat ureuëng inong nyan jibri makheun keu gata."

¹⁰Dan geujak kheueh Elia u Sarfat. Óh watée ka trok bak pintoe geureubang banda nyan, deuh laju geukalon sidroe inong balée teungoh geukoih kayée apui. Laju geupeugah lé Elia ubak inong balée nyan, "Umi, neutulông cok bacut ié jieb keu ulôn."

¹¹Bak watée inong balée nyan teungoh geujak geujakcok ié jieb nyang geulakée nyan, Elia geutawök lom, "Umi, neuba sajan ngon ruti bacut."

¹²Inong balée nyan geujaweueb, "Deumi TUHAN nyang udeb, Po teu Allah nyang geuseumah lé Bapak, ulôn meusumpah bahwa nibak ulôn hana mubacut pi ruti. Bak ulôn nyang na saboh reugam teupông gandom didalam cipe, dan na bacut minyéuk zaiton didalam kaca. Ulôn teungoh lôn peusapat kayée apui ngon meukeusut keuneuk jak taguen teupông nyang bacut nyan, mangat ulôn dan aneuëk ulôn jeuet teupajoh nyan. Nyang kheueh peunajoh kamoe nyang keuneulheuh; óh lheueh nyan kamoe teuma kamoe preh pajan mawôt teuka ateueh kamoe."

¹³"Bék khawate ngon picek até neuh, hai umi meutuah!" kheun Elia ubak inong balée nyan, "Neujak laju umi neujak taguen peunajoh keu umi dan aneuëk umi. Teuma sigohlom nyan umi peugét ilée saboh ruti ubiet nibak teupông dan minyéuk nyan, dan neuba kheueh atranyan keunoe.

¹⁴Sabab TUHAN, Po teu Allah nyang jiseumah lé ureuëng Israel, ka geupeugah bahwa pireng umi nyan teuma sabe peunoh dan meuaso deungon teupông, dan kaca minyéuk nyan sabe peunoh meuasoe minyéuk sampoe nibak watée jih TUHAN geukirém ujeuen jitreun u ateueh bumoe."

¹⁵Dan geujak kheueh laju inong balée nyan geujak peubuet peue nyang ka geupeugah lé Elia. Dan awaknyan ban lhée droe kana teukeubah peunajoh nyang seb keu meu uroe-uroe treb jih.

¹⁶Dan lagée nyang ka geupeugah lé TUHAN meulalu Elia, cipe nyan hana putôh-putôh meuaso sabe deungon teupông, dan kaca minyéuk nyan pih hántom tho deungon minyéuk didalam nyan.

¹⁷Na padub treb teuma óh lheueh nyan aneuëk inong balée jiteuka deumam sampoe rhot ubak sakét. Maken treb sakét aneuëk nyan maken brat akhéjih aneuëk nyan pi meuninggai donya.

¹⁸Laju geupeugah lé inong balée ma aneuëk nyang ka maté nyan ubak Elia, "Hamba Allah, pakon Bapak neupeubuet hainyoe ateueh ulôn? Peu kheueh Bapak neujak keunoe keu teujak teupeu ingat Po teu Allah keuhai desya-desya ulôn, sampoe aneuëk ulôn meuninggai donya?"

¹⁹Geujaweueb lé Elia, "Neuba aneuëk nyan keunoe bak ulôn." Laju Elia geucok aneuëk agam nyan nibak ma jih, geuba laju aneuëk nyan u ruweueng ateueh, lam kama teumpat meunumpang Elia. Elia laju geupeuéh aneuëk nyan di ateueh teumpat éh,

²⁰laju geumeudoá deungon su nyang teuga, "Ya, TUHAN, Allah ulôn, pakon Droeneueh ya TUHAN neupeuteuka balanyoe u ateueh inong balée nyoe? Inong nyoe ka jibri meunumpang keu ulôn dan jinoenyoe Droeneueh cok teuma aneuëk gobnyan!"

²¹Óh lheueh nyan na lhée goe Elia geudugom badan gobnyan di ateueh aneuëk nyang ka maté nyan, sira geumeudoá, "Ya, TUHAN, Allah ulôn, neupeu udeb kheueh aneuëk nyoe!"

²²TUHAN geudeungoe doá Elia; aneuëk nyan ka jipeuphon meunafáh dan laju udeb lom teuma.

²³Laju Elia geutreun nibak kama gobnyan sira geuba aneuëk nyan ubak ma droe jih dan geupeugah, "Umi, nyoe aneuëk Umi! Jihnyoe ka udeb lom!"

²⁴Inong balée nyan geujaweueb, "Jinoenyoe ka ulôn teupeue bahwa Bapak na kheueh sidroe Hamba Po teu Allah dan haba Bapak keubiet beutôi teuka nibak TUHAN!"

← Previous All Books Next →