1 Raja-Raja 19

21 verses

¹Peue nyang ka geukalon nyan lé Raja Ahab laju geupeugah ubak peurumoh gobnyan Izebel, peue mantong nyang ka geupeubuet lé Nabi Elia, meunan cit pakriban Elia ka geupoh maté banmandum nabi-nabi Baal.

²Lé Izebel geukirém laju haba ubak Nabi Elia lagéenyoe, "Seumoga bubena dewa geuhuköm ulôn, dan beugeupoh maté ulôn nyoe, meunyoe singoh beungoh bak watée nyang lagéenyoe ulôn hana ulôn huköm gata lagée gata nyang ka neuhuköm banmandum nabi-nabi Baal."

³Ban geudeungoe haba nyan Nabi Elia teumakot that-that, dan gobnyan pih laju geuplueng mangat bék jipoh lé Izebel. Geujak laju ngon peulayan geuh u Bersyeba di Yehuda. Disinan gobnyan laju tinggai ngon peulayan geuh nyang seutia nyan,

⁴dan deungon gaki geujak laju u padang pasi siuroe peunoh óh lheuehnyan geupiôh laju diyueb bak kayée rampak. Dimiyueb bak kayée nyan laju geuduek dan peurasaan gobnyan keuneuk maté mantong. Kheun gobnyan "Ulôn hana ék lôn teunle, ya, TUHAN. Neucok mantong nyawöng ulôn nyoe. Ulôn hana leubeh jroh nibak indatu ulôn!"

⁵Óh ka lheueh geupeugah nyan Nabi Elia pi laju teuéh dimiyueb bak kayée nyan sampoe teungéut. Deungan hana teusangka-sangka teuka sidroe malaikat geujak mat gobnyan sira geupeugah, "Beudôh kheueh, hai Elia, dan jak makheun laju!"

⁶Nabi Elia geukalon bansikeulileng, dan leumah laju geukalon rab ngon ulée gobnyan saboh ruti nyang ka lheueh teutot dan saboh calueng nyang ka meuaso ngon ié. Atranyan pih laju geumakheun meunan cit deungon ié laju geujieb, óh ka lheueh nyan jiéh lom.

⁷Dan keu nyang keuduagoe malaikat TUHAN geuteuka ubak gobnyan sira geumat ngon geupeugah lé malaikat nyan, "Beudôh laju, hai Nabi Elia, jak laju makheun, mangat gata teuga dan hase tajaklom sabab langkah gata mantong that jiôh."

⁸Meunan cit, lagée nyang ka geupeubuet buno, Nabi Elia pih geubeudôh laju geumakheun ngon geujieb ié. Dan óh lheuehnyan gobnyan pih ka teuga dan ka hase geujak peuet ploh uroe treb jih sampoe trok u Gunong Sinai, diteumpat Po teu Allah geupeugah droe.

⁹Disinan Nabi Elia geumudom didalam guha. Lé TUHAN geupeugah ubak gobnyan, "Hai Elia, peue gata peubuet disinan?"

¹⁰Geujaweueb lé Nabi Elia, "Nyoepat ulôn, Ya TUHAN, Allah Nyang Mahakuasa, ulôn sabe meukeureuja teuma keu Droeneueh keudroe. Teuma umat Israel ka ji iengkeue janji jih deungon Droeneueh. Awaknyan jijak reuloih bubena miseubah Droeneueh dan jipoh maté bubena nabi Droeneueh. Teuma ulôn kheueh nyang mantong tinggai, dan jinoenyoe pih awaknyan jikeuneuk poh ulôn!"

¹¹"Gata teupeubiet laju lam guha nyan," geupeugah lé TUHAN ubak gobnyan, "dan tadong kheueh jak meuhadab Ulôn di ateueh gunong." Dan TUHAN pih geujak rot nyan, jipeuphon lé angén bade nyang jipot tajam sampoe bukét-bukét beukah dan gunong-gunong batée pih hanco. Teuma TUHAN hana geupeuleumah droe nibak lam angén nyan. Óh ka lheueh angén nyan reuda, teuka teuma geumpa bumoe. Teuma lam geumpa nyan pih TUHAN hana cit geupeuleumah droe.

¹²Óh ka lheueh nyan teuka teuma apui, meunan cit TUHAN pih hana geupeuleumah droe lam apuinyan. Óh ka lheueh nyan keuadaan kajeuet keuseungab, sungue hana teuleungo sapeue, dan laju teudeungoe saboh su nyang ubit teuma leumoh leumbot.

¹³Bak watée geudeungoe lé Nabi Elia su nyan, ruman gobnyan laju geutôb ngon bajée jubah geuh, dan óh lheueh nyan laju geuteubiet dan geudong bak babah pintoe guha. Dan geudeungoe lom su nyang geupeugah, "Elia, peubuet peue gata disinoe?"

¹⁴Geujaweueb lé Elia, "Ya TUHAN, Allah Nyang Mahakuasa, ulôn sabe meubuet teuma keu Droeneueh keudroe. Teuma umat Israel ka ji iengkeue janji jih deungon Droeneueh. Awaknyan ka jireuloh bubena miseubah-miseubah Droeneueh dan ka jipoh maté dumna nabi-nabi Droeneueh. Teuma ulôn kheueh nyang mantong tinggai, dan ulôn pih lé awaknyan jikeuneuk poh maté!"

¹⁵TUHAN meufeureuman lom, "Gata woe kheueh u padang pasi tou ngon Damsyik! Óh lheuehnyan tajak kheueh laju u banda dan taro kheueh teuma minyéuk u ateueh ulée Hazael sibagoe tanda teubaiát jihnyan jeuet keuraja di Siria.

¹⁶Dan tapeubuet cit lagéenyan ateueh Yehu aneuëk Nimsi, mangat jihnyan jeuet keuraja Israel. Dan ateueh Elisa aneuëk Safat nibak Abel-Mehola, mangat jihnyan jeuet keu nabi keugeunantoe gata.

¹⁷Soemantong nyang hana jipoh maté lé Hazael, ureuëng nyan teuma jipoh lé Yehu, dan meunyoe na awaknyan nyang jiteumé peulheueh droe nibak Yehu nyan ureuëng nyan teuma jipoh maté lé Elisa.

¹⁸Teuma na 7.000 droe di Israel ulôn peuseulamat, awaknyan na kheueh ureuëng-ureuëng nyang teutab seutia ubak ulôn dan hántom na jisujut jiseumah patong Baal atawa jicom patong nyan."

¹⁹Dan geujak kheueh laju Nabi Elia geujak meurumpok ngon Elisa nyang bak watée meurumpok nyan Elisa teungoh geumeu úe diblang. Na dua blaih boh pasang leumô dikeue gobnyan dan Elisa keudroe geumeu úe deungon pasangan leumô nyang keuneulheuh. Bak watée Nabi Elia geuja dikeue Elisa, Nabi Elia laju geusuet bajée jubah geuh dan bajée nyan laju geuleueng nibak baho Elisa.

²⁰Dan Elisa geutinggai laju leumô-leumô gobnyan nyang mantong meukeumat nibak langái nyan laju geujak tiyeub Nabi Elia, óh ka tou deungon Nabi Elia geupeugah laju, "Neupeu idhin kheueh ulôn jak lakée droe ilée ubak ureuëng syiek ulôn, óh lheuehnyan ulôn teuma lôn seutôt Bapak." Geuseuôt Nabi Elia, "Jak kheueh. Ulôn hana lôn tam gata."

²¹Óh geudeungoe habanyan Elisa geugisa laju ublang dan geujaksie laju banmandum leumô-leumô geuh nyan. Kayée langái nyang geupeuguna ngon meuúe laju geukoh-koh geutot laju sibagoe kayée apui ngon taguen sie-sie leumô nyang ka lheueh geusie nyan. Óh lheueh nyan uengkot sie nyang ka masak geutaguen nyan laju geubagi-bagi keu aneuëk buah gobnyan dan lé aneuëk buah geuh uengkot sie nyan laju jipajoh. Óh lheueh nyan Elisa laju geujak seutôt Nabi Elia dan jeuet laju keupeubantu gobnyan.

← Previous All Books Next →

Loading Bible Translation

First-time download in progress. This may take a few seconds…

←Bible|||

Acehnese Holy Bible Wordproject Bible