2 Tawarikh 9

31 verses

¹Na sidroe ratu nibak nanggroe Syeba, ratu nyan geudeungoe keuhai keumeugahan dan meusyeuhu Nabi Sulaiman. Lé sababnyan ratu nyan laju geujak u Yerusalem keuneuk jak ujoe Nabi Sulaiman nyan deungon cara geuseuéue nyang lumpah payah-payah. Gobnyan teuka deungon nameupadubdroe ureuëng patot-patot meunan cit ureuëng nyang iréng dan unta nyang peunoh teupeudieng deungon reumpah-reumpah, batée peumata dan le that-that lom méuh meutahta. Bak watée ka meurumpok deungon Nabi Sulaiman, ratu nyan laju geutanyong ngon sira geuseueu éue nyang hase geupike.

²Banmandum nyang geutanyong nyan hase geujaweueb lé Nabi Sulaiman, hana meusaboh pi nyang tuwoe lé gobnyan.

³Ratunyan ka deuh geungieng keudroe ngon mata ulée geuh pakriban bijaksana jih Nabi Sulaiman nyan. Meunan cit gobnyan geukalon meuligoe nyang geupeudong lé Nabi Sulaiman,

⁴cara meukeureuja nyang jipeubuet lé peugawée-peugawée gobnyan nyang meutugaih nibak meuligoe, dan peukayan seuragam dan rumoh-rumoh awaknyan. Meunan cit ratu nyan geunging cara ureuëng peuhidang peunajoh, dan peukayan peulayan nyang peutimang ureuëng khanuri; meunan cit geunging teuma keureubeuen-keureubeuen nyang geupeuseumah lé Nabi Sulaiman di Baét TUHAN. Banmandum nyang ka geungieng lé ratu nibak nanggroe Syeba nyan teuhireuen-hireuen ngon tahé manté.

⁵Dan geupeugah kheueh lé ratu nyan ubak Nabi Sulaiman, "Peue mantong nyang ka ulôn deungoe di tanoh ié ulôn keuhai Teungku Amphon dan keubijaksanaan Teungku Amphon, keubit beutôi that!

⁶Yoh masa ilée hana lom ulôn patéh, teuma óh ka lheueh ulôn teuka dan lôn ngieng ngon mata ulée lôn keudroe barô kheueh lôn patéh. Nyang sikeubit jih peue mantong nyang ka ulôn deungoe nyan hana meusiteungoh pih nibak peue nyang ka ulôn ngieng bak saát nyoe. Deuh that keubijaksanaan dan keukayaan Teungku Amphon jiôh leubeh rayeuk nibak peue nyang ka jipeugah bak ulôn.

⁷Keubit mubahgia that peugawée-peugawée nyang jipeutimang Teungku Amphon dan sabe jimeukeureuja keu Teungku Amphon sampoe hase jideungoe nibak Teungku Amphon keudroe banmandum ajaran nyang bijaksana! Teupujoe kheueh TUHAN, Allah Teungku Amphon!

⁸Teupujoe kheueh TUHAN, Po teu Allah Amphon! Deungon teubaiát jih Teungku Amphon jeuet keuraja neumat peurintah ateueh Gobnyan, Gobnyan ka geutunyok padubna galak jih Gobnyan keu Teungku Amphon. Sabab Gobnyan geugaséh keu umat Israel nyang harab mangat umat Geuh nyan teutab na, teuma Gobnyan ka geuangkat Teungku Amphon jeuet keuraja awaknyan, mangat Teungku Amphon hase neupeudong huköm dan keuadelan."

⁹Óh lheuehnyan ratu nanggroe Syeba nyan geupeujaroe ubak Nabi Sulaiman peue mantong hadiah nyang ka geuba, na kheueh leubeh nibak 4.000 kilogram méuh dan lam jeumeulah nyang le batée peumata meunan cit deungon reumpah-reumpah. Hana nyang ka-ka na lé Nabi Sulaiman geuteurimong reumpah-reumpah nyang meunan gét mutu jih lagée nyang ka geubri lé ratu nibak nanggroe Syeba nyan keu gobnyan. (

¹⁰Aneuëk buah Raja Hiram dan aneuëk buah Nabi Sulaiman nyang ba méuh nibak Ofir keu Nabi Sulaiman, na cit jiba sajan batée peumata dan kayée ceundana.

¹¹Kayée nyan geupeuguna lé Nabi Sulaiman keu teupeugét reunyeun di Baét TUHAN dan meuligoe gobnyan, dan meunan cit kayée nyan geupeuguna keu teupeugét keucapi dan gambus keu ureuëng nyang meuca-e. Gohlom na nyang ka-ka nyang lagéenyan bagoe di nanggroe Yehuda.)

¹²Seulaén hadiah-hadiah balasan nyang geubri lé Nabi Sulaiman, Nabi Sulaiman geubri cit ubak ratu nibak nanggroe Syeba nyan peue mantong nyang geulakée. Óh lheueh nyan geuwo kheueh ratu nyan u nanggroe gobnyan meusajan deungon bubena ureuëng nyang jak ngon gobnyan.

¹³Tieb-tieb thon Nabi Sulaiman sabe geuteurimong rab na 23.000 kilogram méuh,

¹⁴gohlom teuitong bubena cukée nibak mandum saudaga dan ureuëng meukat. Meunan cit lé raja-raja arab dan gubunur Israel na cit geubri méuh dan pirak keu gobnyan.

¹⁵Nabi Sulaiman na geupeugét 200 boh peurisai nyang raya nibak méuh nyang teuteumpah. Méuh nyan geubalot nibak tieb-tieb peurisai nyan na 7 kilogram.

¹⁶Meunan cit gobnyan geupeugét teuma na 300 boh peurisai méuh nyang leubeh ubit. Méuh nyan geuboh nibak tieb-tieb peurisai ubit nyan na leubeh kureueng 3 kilogram, banmandum nyan nibak méuh nyang teuteumpah. Peurisai-peurisai nyan geukeubah nibak balée nyang geuboh nan Balée Uteuen Libanon.

¹⁷Meunan cit lé Nabi Sulaiman na teuma geupeugöt saboh keurusi keurajeuen nyang raya nyang teupeugét nibak gadeng dan teuhias deungon méuh aseuli.

¹⁸Keurusi nyan na meujaroe dan nibak tieb-tieb siblaih nyan na teuma patong singa. Dan keurusi nyan na teuma nam aneuk reunyeun, dan saboh teumpat gaki nyang teuseupoh deungon méuh. Teumpat peuduek gaki nyan teupeusaboh deungon keurusi jih.

¹⁹Nibak tieb-tieb ujong wie ngon ujong uneuen tieb aneuk reunyeun keurusi nyan na patong singa -- banmandum nyan na 12 boh. Hana keurusi nyang lagée nyan bagoe nibak keurajeuen toh mantong.

²⁰Banmandum peukakaih ngon jieb ié Nabi Sulaiman teupeugöt nibak méuh, dan banmandum peukakaih nyang na nibak Balée Uteuen Libanon nyan pih teupeugöt nibak méuh aseuli. Bak jamén Nabi Sulaiman, pirak nyan hana yuem.

²¹Nabi Sulaiman na teuma kapai raya nyang le nyang hase jimeulayeue didalam laôt raya meusapat deungon kapai-kapai Raja Hiram. Lhée thon sigo kapai nyan jiwo sira jiba méuh, pirak, gadeng, bukréeh dan cicém meurak.

²²Nabi Raja Sulaiman nyan leubeh kaya dan leubeh bijaksana nibak raja toh mantong nyang na di ateueh donya.

²³Banmandum ureuëng jiuseuha jijak peuto ubak Nabi Sulaiman keu jijak deungoe ajaran bijaksana nyang geubri lé Po teu Allah ubak gobnyan.

²⁴Awaknyan maséng-maséng jiteuka keu jijak jok hadiah ubak Nabi Sulaiman. Nyang jijok lé awaknyan na barang-barang méuh, pirak, peukayan, sinjata, reumpah-reumpah, guda dan bagal. Meunan kheueh nibak thon meugantoe thon.

²⁵Meunan cit di Nabi Sulaiman na teuma 4.000 boh weue guda dan geuritan gobnyan. Guda prang gobnyan na 12.000 boh. Siladum nibak nyan geukeubah di Yerusalem, dan siladum teuk nibak meubagoe banda pangkalan keu geuritan-geuritan prang gobnyan.

²⁶Gobnyan geumat kuasa ateueh banmandum wilayah geuh nyang meulinteung phon nibak Krueng Efrat sampoe u nanggroe Filistin dan ubak bataih nanggroe Meusé.

²⁷Nibak jamén keurajeuen Nabi Sulaiman, pirak nyan na kheueh barang biasa mantong di Yerusalem, saban lagée aneuk batée, dan kayée ceumara Libanon lumpah that le saban lagée kayée ara biasa.

²⁸Lé Nabi Sulaiman geupeutamong teuma guda di nanggroe Meusé dan nibak tieb-tieb nanggroe laén.

²⁹Kisah nyang laén keuhai Nabi Sulaiman phon nibak awai sampoe akhé ka teucetet lam kitab Riwayat Nabi Natan dan lam kitab Nubuatan Ahia ureuëng Silo, dan lam kitab Wahyu Nabi Ido, nyan na cit teutuléh kisah keurajeuen Yerobeam raja Israel.

³⁰Na peuet ploh thon treb jih Nabi Sulaiman geumat keurajeuen di Yerusalem ateueh banmandum nanggroe Israel.

³¹Óh lheuehnyan Gobnyan meuninggai donya dan teupeukubu laju nibak lampôh jrat Banda Nabi Daud. Lé Rehabeam aneuëk gobnyan nyang agam teubaiát jeuet keuraja keugeunantoe gobnyan.

← Previous All Books Next →