2 Korintus 3

¹Peu kheueh nyoe, deuh jih kamoe pujoe-pujoe droe kamoe lom? Atawa kamoe peureulée surat pujoe keu gata, atawa nibak gata, lagée nyang jipeureulée lé ureuëng-ureuëng laén?

²Gata keudroe kheueh surat pujoe kamoe, nyang jeuet teutuléh lam até kamoe dan nyang jeuet jiteupeu ngon jibaca lé tieb-tieb ureuëng.

³Awaknyan keudroe deuh jikalon bahwa Gata na kheueh surat nyang geutuléh lé Almaseh, nyang teukirém meulalu kamoe. Surat nyan teutuléh kon ngon daweuet, teuma ngon Roh Allah nyang udeb; kon teuma ateueh batée tuléh, teuma lam até manusia.

⁴Kamoe peugah lagée nyan sabab keuyakénan kamoe keu Po teu Allah rot Almaseh.

⁵Nibak kamoe hana sapeue alasan pi keuteupeugah bahwa kamoe hase kamoe peubuet buet nyoe, teuma Allah nyang bri keumampuan nyan ubak kamoe.

⁶Gobnyan kheueh nyang peujeuet kamoe sanggob jeuet keupeulayan keusaboh peujanjian nyang barô; peujanjian nyang meugantueng ubak Roh Allah, kon bak huköm nyang teutuléh. Sabab nyang teutuléh nyan teuba ubak maté, seudangkan Roh Allah teubri udeb.

⁷Watée peujanjian nyang teuba ubak maté nyan teupeugét dan teu uke ateueh batée, cahya Po teu Allah hu muble-ble bak muka Nabi Musa. Cahaya nyan keubiet that trang sampoe ureuëng Israel hana ék jipandang bak muka Nabi Musa, sampoe jeuet cahya nyang nibak muka geuh nyan ka jipeuphon layée bak watée nyan. Nyan, meunyoe teupeugét janji nyang jiba ubak maté nyan teureuseumi ngon ceumeurlang nyang gét that rayeuk,

⁸teuntée teupeugét peujanjian nyang geubri lé Roh Allah, teureuseumi ngon leubeh ceumeurlang lom.

⁹Meunyoe peujanjian nyang teuhuköm manusia nyan keubit that ceumeurlang, ka teuntée nyang leubeh ceumeurlang nyang teupeu mungken manusia jimeugét lom teuma ngon Po teu Allah.

¹⁰Peue nyang yoh ilée ceumeurlang, ka hana ceumeurlang le sabab ngon ceumeurlang nyang na bak saát nyoe.

¹¹Meunyoe sapeue-sapeue nyang hase meuteun teuma sikeujab, meunan ceumeurlang, ka teuntée sapeue-sapeue nyang siumu masa leubeh ceumeurlang lom teuma.

¹²Lé sabab kamoe na harapan nyang lagée nyan, nyang kheueh jeuet kamoe jeuet meututoe lagée nyan bagoe.

¹³Kamoe kon lagée Nabi Musa nyang geutôb ngon silubong muka geuh mangat bék deuh jikalon le bansa Israel cahya Tuhan nyang teungoh lon dan teusampôh bak muka gobnyan.

¹⁴Pikeran awaknyan ka teutôb. Dan trok án uroenyoe pi pikeran awaknyan mantong teutôb ngon sulubong watée awaknyan jibeuet kitab-kitab keuhai peujanjian nyang ka treb nyan. Sulubong nyan hase teubuka meunyoe ureuëng ka meusaboh ngon Almaseh.

¹⁵Jinoenyoe pi, watée awaknyan jibeuet kitab-kitab Nabi Musa, sulubong nyan mantong teutôb pikeran awaknyan.

¹⁶Teuma meunyoe sidroe-droe ureuëng jiteuka jijak meuhadab bak Tuhan, sulubong nyan pi teubeuôt nibak muka awaknyan.

¹⁷Nyan, Tuhan nyang teupeugah disinoe na kheueh Roh. Dan dipat mantong Roh Tuhan na, nibak teumpat nyan pih na keumeurdehkaan.

¹⁸Jinoenyoe muka tanyoe banmandum hana teutôb ngon sulubong, dan tanyoe peuhu cahya ceumerlang Tuhan Isa. Dan ngon sabab nyan tanyoe hana putôh-putôh jiubah jeuet lagée Gobnyan; maken treb tanyoe maken ceumeurlang. Ceumeurlang nyan teuka jih nibak Roh, dan Roh nyan na kheueh Tuhan.