2 Raja-Raja 19

37 verses

¹Watée Raja Hizkia geudeungoe laporan nibak ban lhée droe ureuëng nyan, gobnyan laju geupriek peukayan geuh dan geungui laju peukayan ija krong sibagoe tanda seudeh, lheuehnyan laju geujak u Baét TUHAN.

²Óh lheuehnyan gobnyan geukirém Elyakim, ulée meuligoe, Sebna, seukeutaréh neugahra, dan teungku-teungku imeum nyang ka tuha-tuha, awaknyan geuyue jak meurumpok ngon Nabi Yesaya bin Amos. Awaknyan pih geungui ija krong.

³Nyoe kheueh peusan Raja Hizkia nyang awaknyan peugah ubak Nabi Yesaya, "Uroenyoe uroe meudukacita, tanyoe jihuköm dan jihina. Tanyoe lagée inong nyang keuneuk peulahé aneuëk teuma ka habéh teunaga.

⁴Raja Asyur ka jikirém sidroe peuwira manyang jih keujijak hina Po teu Allah nyang udeb. Pat tateupeue TUHAN Allah ka geudeungoe peue nyang jihina lé awaknyan, teuma geuhuköm awaknyan nyang ka jipeugah haba nyan! Lé sababnyan meudoá kheueh ubak Po teu Allah keu ureuëng-ureuëng geutanyoe nyang mantong udeb."

⁵Óh ka lheueh geuteurimong peusan nibak Raja Hizkia nyan,

⁶Nabi Yesaya laju geuyue ubak utosan nyan mangat jipeutrok peusan gobnyan lagéenyoe su jih, "TUHAN meufeureuman, Teungku Amphon bék teumakot peue-peue nyang ka jipeugah lé hamba-hamba raja Asyur nyan bahwa TUHAN hana geupeuleuh geutanyoe.

⁷TUHAN teuma geupeujeuet raja Asyur jideungoe haba angén sampoe akhé jih jihnyan jiwoe u nanggroe jih keudroe, dan di nanggroe jih raja nyan jipoh maté."

⁸Peuwira Asyur nyan meuteumé haba bahwa raja jih ka jitinggai Lakhis dan teungoh jimuprang jilawan banda Libna, hana jiôh nibak teumpat nyan. Dan jijak kheueh peuwira nyan keudeh keujijak meurumpok ngon raja jih nyan.

⁹Raja Asyur ka jiteumé haba bahwa pasokan Meusé dimiyueb pimpénan Tirhaka raja Sudan teungoh jijak keuneuk jijak prang awaknyan. Lé sababnyan raja Asyur laju jikirém surat ubak Raja Hizkia raja Yehuda.

¹⁰Lagée nyoe asoe surat nyan, "Bék keunong peungét lé janji Po teu Allah gata nyang gata peubangga nyan bahwa gata hana rhot lam jaroe ulôn.

¹¹Gata katadeungoe bahwa toh mantong nanggroe nyang jiprang lé Asyur, jipeuhanco sapan sapa. Bék tapike gata hana keunong!

¹²Watée indatu lôn geupeuhanco banda Gozan, Haran, dan Rezef, dan geupoh maté ureuëng Eden nyang na tinggai di Telasar, hana meusaboh pi nibak dewa-dewa awaknyan nyang meuhase jipeuseulamat awaknyan.

¹³Dipat kheueh raja-raja banda Hamat, Arpad, Sefarwaim, Hena, dan Iwa?"

¹⁴Hizkia geuteurimong surat nyan nibak utosan, laju geubaca surat nyan. Óh lheuehnyan gobnyan geujak u Baét TUHAN, dan geuleueng laju surat nyan dikeue TUHAN,

¹⁵lheueh nyan laju geumeudoá, "TUHAN, Po teu Allah Israel, nyang meuseumanyam di ateueh kerub, Droeneueh sidroe-droe Allah nyang meukuasa ateueh banmandum keurajeuen ateueh rhueng bumoe. Droeneueh kheueh nyang cebta langét ngon bumoe.

¹⁶TUHAN, neungieng kheueh ateueh kamoe peue nyang teungoh kamoe rasa nyoe. Deungoe kheueh banmandum nyang jihina lé Sanherib keu Droeneueh, Po teu Allah nyang udeb!

¹⁷Kamoe banmandum meuteupeue, ya TUHAN, bahwa raja-raja Asyur ka jai that-that jipeuhanco bansa-bansa dan jipeuhanco nanggroe awaknyan.

¹⁸Dewa-dewa awaknyan jitot dan jipeuhanco, sabab dewa-dewanyan sagai-sagai hana meukuasa. Awaknyan na kheueh nyang teupeugét nibak kayée dan batée nyang jipeugét lé manusia.

¹⁹Ya TUHAN, Allah kamoe, peuleueh kheueh kamoe nibak ureuëng-ureuëng Asyur nyan, mangat banmandum bansa ateueh rhueng donya nyoe jiteupeue bahwa Droeneueh kheueh Allah nyang Esa."

²⁰Óh lheuehnyan Nabi Yesaya geukirém peusan ubak Raja Hizkia na kheueh teujaweueb ateueh doá raja.

²¹TUHAN meufeureuman, "Banda Yerusalem jipeukém dan jihina gata, Sanherib.

²²Na kah teupeue soe nyang gata teunak ngon gata hina nyan? Ulôn, Allah Israel, na kheueh Allah nyang suci! Sombong that-that sikeub gata ateueh Ulôn.

²³Gata takirém utosan keu gata meututoe nyang buhak bahwa deungon le jih geuritan prang gata bahwa gata ka tapeutaklhok gunong-gunong nyang manyang di Libanon. Gata tapeusombong droe bahwa gata katakôh bak-bak kayée ceumara jih nyang paleng manyang dan paleng ceudah meunan cit teubloih lam uteuen-uteuen nyang paleng le.

²⁴Meunan cit gata peubangga bahwa nyang kueh mon dan teujieb ié di nanggroe-nanggroe aséng, dan meunan cit takheun bahwa sipa-i gata jibloh-bloh lam Krueng Nil sampoe tho kreng.

²⁵Peu kheueh gohlom na gata deungoe bahwa hainyan ka Ulôn reuncana yoh awai ilée? Dan jinoe hainyan Ulôn peubuet. Ulôn kheueh nyang jok keu gata keu gata peuhanco banda-banda meukuta sampoe tinggai rungka.

²⁶Ureuëng-ureuëng nyang tinggai disinan hana meudaya; awaknyan teukeujot dan teumakot raya. Awaknyan lagée naleueng di blang atawa naleueng nyang timoh ateueh bubong rumoh, nyang tho meunyoe teuyueb lé angén timu nyang seu-uem.

²⁷Teuma ulôn kuteupeue peue-peue mantong keuhai droe gata. Ulôn kuteupeue peue nyang gata peubuet dan ho nyang gata jak.

²⁸Ulôn kuteupeue bahwa gata beungéh that-that keu Ulôn, dan Ulôn ka Lôn deungoe keuhai sombong gata nyan. Jinoe Ulôn lat ceunawiét bak idong gata meunan cit babah gata Ulôn beukab ngon keukang, mangat jeuet gata Lôn tarek dan Lôn peuwoe lom rot jalan watée gata teuka."

²⁹Nabi Yesaya geukirém teuma peusan nyang lagée nyoe ubak Hizkia, "Nyoe kheueh nyang jeuet keu tanda nibak gata. Thon nyoe ngon thon ukeue manusia jipajoh wase gandom nyang timoh keudroe. Teuma óh lheuehnyan awaknyan jeuet jipula gandom dan anggô dan jipajoh keudroe hase jih.

³⁰Ureuëng Yehuda nyang mantong udeb teuma makmu lagée seunaman nyang lhok that ukeue jih dan jimuboh teuma.

³¹Di Yerusalem dan di ateueh Gunong Sion na ureuëng-ureuëng nyang seulamat, sabab TUHAN ka geupeuteuntée bahwa hainyan teutab na.

³²Nyan kheueh nyang geupeugah lé TUHAN keuhai raja Asyur: 'Jihnyan hana jiteumé tamong u Yerusalem atawa jipeuleuh aneuk panah jih ubak banda nyan. Sipa-i-sipa-i nyang leungkab deungon peurisai hana nyang hase jitamong lam banda nyan, dan bansikeulileng nyan hana teuma teupeugét sineulob mangat jeuet teukeupong.

³³Raja Asyur teuma jiwoe rot jalan nyang jijak watée jiteuka, dan hana jiteumé tamong lam banda nyan. Ulôn, TUHAN, ka Lôn peugah haba.

³⁴Banda Yerusalem teuma Lôn bila dan Lôn lindong deumi keuhoreumatan Lôn keudroe dan deumi janji Ulôn deungon hamba Lôn Nabi Daud.' "

³⁵Malam nyan cit teuma Malaikat TUHAN geujak ubak khimah-khimah ureuëng Asyur, dan laju geupoh maté na 185.000 droe tantra. Óh singoh nyan banbeungoh that deuh laju manyét-manyét awaknyan ka teutiek-tiek disinan.

³⁶Lé sababnyan teuma jisurot kheueh Sanherib raja Asyur dan jiwoe u Niniwe.

³⁷Bak siuroe, watée jihnyan teungoh jimeuiébadat lam kuil Dewa Nisrokh, gobnyan laju jipoh maté ngon peudeueng lé Adramelekh dan Sarezer, aneuëk-aneuëk agam gobnyan. Óh lheuehnyan awaknyan laju jiplueng u nanggroe Ararat. Teuma, Esarhadon, aneuëk agam gobnyan nyang laén, jeuet keuraja keugeunantoe gobnyan.

← Previous All Books Next →