2 Raja-Raja 25

28 verses

¹Óh lheuehnyan Zedekia beurontak ateueh Nebukadnezar raja Babel. Lé sababnyan Nebukadnezar deungon banmandum angkatan prang gobnyan teuka dan geujak prang Yerusalem bak tanggai siploh buleuen siploh nibak thon nyang keusikureueng keurajeuen Zedekia. Awaknyan jipeudong kuta diluwa banda, dan geupeudong beuton keuteukeupong,

²dan hana piôh-piôh jikeupong banda nyan trok ubak thon nyang keu siblaih keurajeuen Zedekia.

³Nibak tanggai sikureueng buleuen peuet thon nyan cit teuma watée bala musém deuk ka mupalo that sampoe rakyat ka hana le peunajoh meubacut pi,

⁴kuta banda laju jidobrak lé musoh. Malam nyan, bahpi ureuëng Babel teungoh jikeupong banda nyan, banmandum sipa-i Yehuda laju jipeuplueng droe jikarat ubak Pantôn Yordan. Awaknyan jicok rot ueh meulalu taman meuligoe, laju jiteubiet rot babah pintoe geureubang nyang jipeuhubong nibak bandua boh beuton nibak teumpat nyan.

⁵Teuma tantra Babel laju jipeucrok Raja Zedekia, dan laju jidrob nibak darat Yerikho. Banmandum aneuëk buah gobnyan ka habéh jiplueng jitinggai gobnyan.

⁶Óh lheuehnyan Raja Zedekia jiba ubak Raja Nebukadnezar nibak banda Ribla, óh trok keunan laju geupeurhot huköman.

⁷Aneuëk-aneuëk gobnyan jipoh maté dikeue mata gobnyan keudroe. Óh lheuehnyan Zedekia jicungke mata geuh, lheueh nyan laju jigari dan jiba u Babel.

⁸Bak tanggai tujoh buleuen limong nibak thon nyang keu sikureueng blaih keurajeuen Nebukadnezar raja Babel, teuka kheueh u Yerusalem sidroe ureuëng nyang nan jih Nebuzaradan. Gobnyan na kheueh peunaseuhat dan panglima prang Nebukadnezar.

⁹Nebuzaradan laju jitot Baét TUHAN, meuligoe raja, dan rumoh-rumoh banmandum ureuëng meusyeuhu nyang na di Yerusalem.

¹⁰Dan banmandum aneuëk buah jih jireuloh ngon jipeuhanco beuton-beuton banda nyan.

¹¹Óh lheuehnyan rakyat nyang na mantong na lam banda, na kheueh ureuëng-ureuëng meubuet nyang malem nyang mantong na tinggai, ureuëng-ureuëng gasien dan ureuëng-ureuëng nyang ka jiplueng u blaih Babel, banmandum nyan jiba u Babel lé Nebuzaradan.

¹²Teuma siladum rakyat nyang paleng gasien dan nyang hana sapeuena jitinggai di Yehuda dan jiyue meubuet bak lampôh-lampôh anggô dan blang-blang.

¹³Taméh-taméh peurunggu dan geuritan-geuritan nyang na nibak Baét TUHAN meusajan-sajan deungon guci peurunggu laju jipeubeukah lé ureuëng Babel, dan banmandum peurunggu nyan jiangkot u nanggroe awaknyan.

¹⁴Awaknyan pih jiangkot barang-barang nyang teupeugah nyoe: sekob-sekob, teumpat abée miseubah, peukakaih-peukakaih panyöt, cambông-cambông keu teumpat boh darah beulatang nyang teusie sibagoe keureubeuen, cambông-cambông keu ngon tot keumeunyan, dan banmandum barang peurunggu nyang laén nyang jipeuguna keu ngon upacara iébadat.

¹⁵Barang-barang méuh dan pirak, jitamong cit keunan cambông-cambông ubit dan cipe-cipe keu ngeue apui nyan jicok lé Nebuzaradan keudroe.

¹⁶Barang-barang peurunggu nyang ka geupeugét lé Raja Nabi Sulaiman keu Baét TUHAN, na kheueh bandua boh taméh, geuritan-geuritan dan guci rayeuk, banmandum nyan keubit that geuhon akhéjih hana hase teutimang.

¹⁷Bandua boh taméh peurunggu nyan saban; maséng-maséng manyang jih 8 metée deungon saboh ulée taméh nibak peurunggu nyang manyang jih 1,3 metée. Bansilingka tieb-tieb ulée taméh nyan na meunanyuem deungon teuhiah boh geulima nibak peurunggu.

¹⁸Seulaén nibaknyan, Nebuzaradan jidrob teuma Teungku Imeum Agong Seraya, meunan cit deungon Sefanya, teungku imeum sida, lhée droe nyang keumiet babah pintoe Baét TUHAN, banlimong droe peunaseuhat pribadi raja nyang mantong na tinggai lam banda, panglima, waki panglima tukang uroih administrasi tantra, dan 60 droe ureuëng rayeuk nyang laén.

²⁰Banmandum ureuëng nyan jiba ubak Raja Nebukadnezar di banda Ribla,

²¹nibak wilayah Hamat. Disinan awaknyan jiseksa dan laju jipoh maté. Meunan kheueh ureuëng-ureuëng Yehuda jiangkot nibak nanggroe awaknyan keudroe dan jijak tiek ubak teumpat nyang teuböih.

²²Óh lheuehnyan Raja Nebukadnezar laju jibaiát Gedalya bin Ahikam dan cucoe nibak Safan, jeuet keu gubunur di Yehuda keu jipeurintah ateueh banmandum ureuëng nyang mantong tinggai disinan.

²³Watée peuwira dan tantra Yehuda nyang hana meunyeurah ubak Babel jideungoe keuhai teubaiát gubunur nyan, awaknyan banmandum jijak ubak Gedalya di Mizpa. Peuwira-peuwira nyan na kheueh Ismail bin Netanya, Yohanan bin Kareah, Seraya bin Tanhumet asai nibak banda Netofa, dan Yazanya asai nibak banda Maakha.

²⁴Geupeugah kheueh lé Gedalya ubak awaknyan banmandum, "Gata hana peureulée teumakot keu peujabat-peujabat Babel. Tinggai kheueh mantong di nanggroe tanyoe nyoe dan beujeuet kheueh keu hamba raja Babel. Ulôn tanggong gata teuma seulamat."

²⁵Teuma nibak buleuen tujoh thon nyan Ismail bin Netanya dan cucoe Elisama nyang mantong keuturonan raja, laju jijak meusajan ngon na 10 droe ureuëng u Mizpa. Awaknyan jiprang dan jipoh maté Gedalya meusajan ngon ureuëng Yehuda dan ureuëng Babel nyang na meusajan Gedalya nibak teumpat nyan.

²⁶Lé sababnyan, banmandum rakyat Yehuda, kaya meunan cit nyang gasien, meusajan-sajan deungon peuwira jiplueng u nanggroe Meusé sabab teumakot keu ureuëng Babel.

²⁷Nibak tanggai dua ploh tujoh buleuen dua blaih lam thon nyang keu lhée ploh tujoh óh ka lheueh Yoyakhin jiangkot u teumpat nyang teuböih, Ewil-Merodakh jeuet keu raja Babel. Nibak thon nyan cit teuma gobnyan geupeuleumah gaséh sayang ubak Yoyakhin, laju geupeubeubaih geuh nyan nibak rumoh glab,

²⁸dan geupeusaneut gobnyan deungon gét teuma. Yoyakhin geubri teumpat duek nyang leubeh manyang nibak raja-raja laén nyang meusajan teuböih u Babel.

²⁹Yoyakhin hana geusok peukayan rumoh glab dan ka lazem geumakheun lam meuligoe dan jibri péng keu udeb gobnyan siuroe-uroe.

← Previous All Books Next →