2 Samuel 17

28 verses

¹Hana treb teuma óh lheueh nyan, Ahitofel jipeugah lom ubak Absalom, "Neupeu idhin kheueh ubak ulôn mangat lôn piléh 12.000 droe. Eunteuk malam ulôn teuma lônjak tiyeub Nabi Daud.

²Gobnyan ulôn prang bak watée awaknyan teungoh hék dan ka rhot seumangat. Ulôn teuma lôn peukeujot gobnyan, akhéjih banmandum aneuëk buah gobnyan jipeuplueng droe. Dan Raja Nabi Daud mantong nyang ulôn poh maté.

³Teuma banmandum aneuëk buah gobnyan ulôn jok pulang ubak Teungku Amphon lagée dara barô jiwoe ubak lakoe jih. Bukon kheueh Teungku Amphon nyang lakée nyawöng sidroe ureuëng mantong? Seudangkan nyang laén hana teupeukaru."

⁴Naseuhat nyan jipandang gét that lé Absalom dan lé banmandum peumimpén Israel.

⁵Bahpi meunan Absalom jipeugah, "Tajak kheueh laju jinoenyoe hai Husai; jak tadeungoe pakriban peudapat jih."

⁶Bak watée Husai jiteuka jak meuhadab, Absalom jipeugah laju reuncana Ahitofel sira jipeugah lagée nyoe, "Peu kheueh taseutôt peue nyang ka geunaseuhat nyan? Meunyoe hán, cuba neubri usui nyang laén."

⁷Jijaweueb lé Husai, "Naseuhat Ahitofel goenyoe hana gét.

⁸Teungku Amphon pasti neuteupeue bahwa Nabi Daud dan aneuëk buah gobnyan na kheueh peujuang nyang pantang meunyeurah lom gagah beurani. Awaknyan beuhé lagée cagée inong nyang ka gadôh aneuëk. Lom teuma Nabi Daud nyan na kheueh sidroe tantra nyang ka jaithat peungalaman nyang hántom geumeudom meusapat deungon aneuëk buah gobnyan.

⁹Mungken nibak saát nyoe pih gobnyan teungoh geumusöm didalam saboh guha atawa di teumpat nyang laén. Lé sababnyan, meunyoe aneuëk buah Teungku Amphon geuprang lé Nabi Daud, dan na nyang maté, dan soemantong nyang jideungoe hainyan teuma jipeugah bahwa aneuëk buah Absalom ka teupeutaloe.

¹⁰Dan ureuëng-ureuëng nyang paleng beurani dan gagah peukasa lagée singa pi pasti teumakot. Sabab banmandum ureuëng Israel jiteupeue bahwa bapak Teungku Amphon na kheueh sidroe pahlawan, dan meunan cit deungon aneuëk buah gobnyan na kheueh peujuang-peujuang nyang gagah beurani.

¹¹Lé sabab nyan, naseuhat ulôn lagée nyoe: Neujak peusapat kheueh laju banmandum ureuëng Israel bansaboh nanggroe, sampoe le jih na sidub ano dibinéh pasi. Laju Teungku Amphon keudroe kheueh nyang maju ukeue dalam mideuen prang dan droeneueh kheueh nyang jeuet keu panglima prang nyan.

¹²Geutanyoe teuma meurumpok ngon Nabi Daud dipat mantong gobnyan na, dan tanyoe prang gobnyan sigohlom gobnyan sada peue nyang ka teujadi. Hana meusidroepi nyang hase jipeuleuh droe, bah kheueh gobnyan meunan cit deungon aneuëk buah geuh.

¹³Meunyoe gobnyan geuplueng u dalam saboh banda, banmandum rakyat geutanyoe jicok laju bubena talo teumalo teujak ikat laju banda nyan dan ta seumpom u dalam barieh nyang paleng tô. Meusineuk batée pih hana nyang teutinggai di ateueh bukét nyan."

¹⁴Ban geudeungoe nyang lagée nyan lé Absalom dan banmandum ureuëng Israel jipeugah, "Naseuhat Husai leubeh gét nibak naseuhat Ahitofel." Keubiet, TUHAN ka geupeuteuntée keu geupeu bateue naseuhat Ahitofel nyang jroh nyan, mangat Absalom geuteurimong mala peutaka.

¹⁵Óh ka lheueh nyan Husai jilapor ubak Teungku Imeum Zadok dan Teungku Imeum Abyatar keuhai naseuhat Ahitofel dan naseuhat gobnyan keudroe ubak Absalom dan mandum peumimpén Israel.

¹⁶Kheun Husai, "Bagaih, neubri tée ubak Nabi Daud mangat bék geu mudom nibak teumpat teujeumeurang krueng di padang pasi. Gobnyan harôh deungon sigra geujeumeurang Krueng Yordan. Meunyoe hana, gobnyan dan banmandum pasokan gobnyan jipeuhanco."

¹⁷Bak watéenyan Yonatan aneuëk Abyatar dan Ahimaas aneuëk Zadok teungoh jipreh dan hana padubna jiôh ngon mata ié En-Rogel, nibak binéh banda Yerusalem. Awaknyan hana jijeuet jitamong u dalam banda sabab teumakot jingieng lé gob. Lagée nyang ka lazem, meunyoe na sidroe namiet ureuëng inong jijak peugah ubak awaknyan haba nyang harôh jipeusampoe ubak Raja Nabi Daud.

¹⁸Teuma bak gobnyan na sidroe aneuëk agam keubeutulan deuh jikalon awaknyan, dan hainyan jijak britée laju ubak Absalom. Lé sababnyan awaknyan bagaih-bagaih jijak sira jimusöm nibak rumoh sidroe peunduduek nyang na di gampông Bahurim. Binéh rumoh nyan na saboh mon ié dan awaknyan laju jitamong u dalam mon nyan.

¹⁹Peurumoh ureuëng po rumoh nyan laju jileueng siôn ija di ateueh babah mon nyan dan di ateueh ija nyang ka teuleueng nyan laju teuma jitabu aneuk gandom, akhéjih mon ié nyan ka hana leumah le.

²⁰Ureuëng nyang jiyue lé Absalom laju trok ubak rumoh nyan dan laju jitanyong ubak ureuëng inong nyan, "Dipat deuh kah kalon Ahimaas dan Yonatan?" "Awaknyan banmantong geujeumeurang krueng," jaweueb ureuëng inong nyan. Awaknyan jimita laju ban dua droe aneuëk mudanyan, teuma hana meurumpok ngon awaknyan, laju jijakwoe kheueh awaknyan u Yerusalem.

²¹Ahimaas dan Yonatan laju geuteubiet dalam mon nyan, laju reujang-reujang geujak meurumpok ubak Raja Nabi Daud dan jilapor laju peue nyang ka geurasa nyan. Kheun awaknyan, "Ahitofel ka jibri naseuhat keu jijak prang Teungku Amphon. Deungon nyan phon saátnyoe tabeurangkat kheueh laju neujeumeurang krueng nyoe."

²²Laju Nabi Daud dan aneuëk buah gobnyan geujeumeurang Krueng Yordan, dan trok u meurandeh jéh ka beungoh uroe.

²³Bak watée Ahitofel ka jiteupeue bahwa naseuhat gobnyan hana jiseutôt lé Absalom, gobnyan laju jijak pasang peulana keuleudée jih dan jijakwoe laju u banda droe jih. Óh ka lheueh jipeubeuréeh banmandum urosan droe jih laju gobnyan jigantung droe, dan óh ka jeulaih jihnyan ka maté jitanom laju u dalam jrat nibak jrat-jrat keuluwarga droe jih.

²⁴Nabi Daud ka sampoe ubak banda Mahanaim bak watée Absalom jijeumeurang Krueng Yordan, ji iréng lé dumna ureuëng Israel. (

²⁵Absalom ka geuangkat Amasa jeuet keu ulée pasokan keugeunantoe Yoab. Amasa nyan na kheueh aneuëk Yitra ureuëng Ismail; mak jih nan geuh Abigail aneuëk Nahas, na kheueh syedara inong mak Yoab nyang nan ji Zeruya.)

²⁶Absalom dan aneuëk buah gobnyan jipeudong khimah di tanoh Gilead.

²⁷Bak watée Nabi Daud trok u Mahanaim, gobnyan laju jisambot lé Sobi aneuëk si Nahas nibak banda Raba di Amon, dan lé Makhir aneuëk Amiel nibak Lodebar, dan lé Barzilai nibak Rogelim di Gilead.

²⁸Awaknyan laju jiba cambông, kuali dan tilam keu Nabi Daud dan aneuëk buah gobnyan, meunan cit jiba gandom, jeulai, teupông, gandom nyang ka lheueh teu cráih, kacang mirah, kacang mirah nyang rayeuk, meulisan, keuju, ulée susu dan meupadub boh bubiri. Awaknyan jiteupeu bahwa Nabi Daud dan aneuëk buah gobnyan teungoh deuk that, glaih ngon tou rukueng meutamah ngon hék sabab meuneujak nyang panyang di padang pasi.

← Previous All Books Next →

Loading Bible Translation

First-time download in progress. This may take a few seconds…

←Bible|||

Acehnese Holy Bible Wordproject Bible