Amos 4

13 verses

¹Deungoe kheueh, he inong-inong Samaria nyang meutamah teumbon lagée leumô-leumô teumbon di Basan! Gata tatindéeh ureuëng leumoh, gata teugöm ureuëng gasien, dan tatuntut jeuet lakoe gata sabe jipeuna ié kreueh keu gata!

²Ulôn, TUHAN Nyang Mahamanyang na kheueh TUHAN nyang suci, dan Ulôn ka meujanji bahwa singoh teuhila deungon ceunawiét; gata bandum lagée eungkot bak mata kawe.

³Gata teuhila u arah Hermon dan teurhom uluwa, maséng-maséng rot lungkiek beuton nyang rab. Ulôn, TUHAN ka Lôn peugah haba."

⁴TUHAN Nyang Mahamanyang meufeureuman, "He umat Israel! Tajak kheueh laju ubak teumpat iébadat di Betel, dan tapeubuet kheueh desya di teumpat nyan! Tajak kheueh u Gilgal, dan tapeubuet kheueh desya ban galak até gata! Silakan tapeuseumah keureubeuen tieb-tieb beungoh, dan taba siper siploh nibak mandum hase gata tieb-tieb lhée uroe!

⁵Jeuet mantong tapeuseumah ruti sibagoe teurimong gaséh gata ubak Ulôn, dan jeuet mantong ta peugah haba nyang kon-kon bahwa gata ka taba sinamah peuseumahan! Pasti nyan kheueh nyang galak gata peubuet!

⁶Ulôn kheueh nyang peutron bala musém deuk u ateueh bandum banda gata, teuma gata hana tawoe ubak Ulôn.

⁷Ulôn kupeuteun bék jitron ujeuen watée seunaman gata lumpah that peureulée keu ié. Ulôn nyang peutron ujeuen ateueh banda nyang saboh dan hana bak banda nyang laén. Blang nyang saboh meuteumé ié ujeuen töih, teuma blang nyang laén tho kreng.

⁸Nibak napadub boh banda, peunduduek disinan nyang ka leumoh sabab grah tho ngon rukueng, jimita ié bak banda nyang laén, teuma ié disinan hana seb. Bahpi lagée nyan, gata hana cit tawoe ubak Ulôn.

⁹Ulôn nyang peutron angén seu uém dan nyang kirém peunyakét nyang peurusak seunaman dan lampôh-lampôh anggô gata. Bak-bak ara, dan bak-bak zaiton gata ka habéh jiseuba lé daruet. Bahpi ka lagée nyan gata hana cit tawoe ubak Ulôn.

¹⁰Ulôn kirém bala peunyakét ubak gata lagée nyang ka Lôn kirém di nanggroe Meusé. Ureuëng-ureuëng muda gata Ulôn peumaté dimideuen prang, dan guda-guda gata jireupah. Ulôn nyang pasoe khimah-khimah gata deungon bangke-bangke nyang bée jih khiéng lumpah na. Bahpi ka lagée nyan, gata teutab hana tatem woe ubak Ulôn.

¹¹Siteungoh nibak gata Ulôn peubinasa lagée nyang ka Lôn peubinasa Sodom dan Gomora. Nyang mantong udeb lamkawan gata na kheueh lagée kayée puntong nyang teucok dalam apui. Bahpi lagée nyan, gata hana cit tawoe ubak Ulôn.

¹²Lé sabab nyan, he umat Israel, Ulôn Lôn huköm gata. Dan meusiab-siab kheueh tahadab huköman nyang Lôn peurhot ateueh gata!"

¹³Gunong dan angén, TUHAN kheueh nyang cebta; reuncana Gobnyan geupeugah ubak manusia. Gobnyan nyang peujeuet uroe ngon malam; di ateueh pucak-pucak gunong bumoe Gobnyan geujak. TUHAN Allah Nyang Mahakuasa, nyan kheueh nan Gobnyan.

← Previous All Books Next →

Loading Bible Translation

First-time download in progress. This may take a few seconds…

←Bible|||

Acehnese Holy Bible Wordproject Bible