Amos 9

15 verses

¹Deuh ulôn ngieng TUHAN geudong bak binéh miseubah. Lé Gobnyan geubri peurintah lagée nyoe, "Taseukok kheueh beu habéh teunaga ulée-ulée taméh di Baét Ulôn mangat bansaboh seuramoe meuguncang. Peureubah laju taméh-taméh nyan ateueh ulée manusia. Awaknyan nyang hana maté Lôn poh di mideuen prang. Hana meusidroe pi nyang hase jipeuplueng droe, hana meusidroe pi nyang na tinggai.

²Bahpi awaknyan jisöm droe bak donya ureuëng maté, Ulôn nyang hila awaknyan. Bahpi awaknyan jirak u langét, Ulôn peutron awaknyan di langét nyan.

³Meunyoe awaknyan jimusöm bak pucak Gunong Karmel, Ulôn nyang mita dan nyang drob awaknyan. Meunyoe awaknyan jimusöm lam tuwie ié laôt, Ulôn nyang peurintah bak naga laôt mangat ji palet awaknyan.

⁴Meunyoe awaknyan jidrob lé musoh, Ulôn nyang peurintah mangat awaknyan jipoh maté. Ulôn meuteukat keu Lôn peubinasa awaknyan, dan hana Lôn tulông awaknyan."

⁵Bumoe meuhayak dan peunduduek meuduka, sabab geucukéh lé TUHAN Nyang Mahamanyang dan Mahakuasa. Lagée Krueng Nil paseueng ék dan paseueng tron meunan kheueh awaknyan ji-ék dan laju rhot.

⁶TUHAN geupeudong Baét Gobnyan jiôh di angkasa, di ateueh bumoe geupasang langét sibagoe kubah, dan ié lam laôt laju geu ruwah ateueh darat, nyang peubuet bandum nyan nan Gobnyan na kheueh TUHAN!

⁷TUHAN meufeureuman, "He umat Israel, Ulôn kalon ureuëng Sudan saban lagée Ulôn ngieng gata. Ulôn ka Lôn ba ureuëng Filistin nibak Kreta dan ureuëng Siria nibak Kir saban lagée Ulôn ba gata nibak Meusé.

⁸Ulôn, TUHAN Nyang Mahamanyang, teungoh Lôn ngieng-ngieng keurajeuen Israel nyang meudesya nyoe, dan Lôn sampôh ateueh muka bumoe. Teuma keuturonan Nabi Yakub hana bandum Ulôn peubinasa. Ulôn, TUHAN ka Lôn peugah haba.

⁹Ulôn bri peurintah dan Lôn tampo bansa Israel lagée ureuëng tampo gandom dalam jiée. Keu teukireueh bandum nyang hana meuguna lamkawan awaknyan, Ulôn Lôn kocok awaknyan lamkawan bansa-bansa.

¹⁰Ureuëng-ureuëng meudesya lamkawan umat Ulôn jipeugah, 'Allah hana geupeubiyeu tanyoe rhot lé bala.' Teuma, nyang sibeuna jih awaknyan teupoh maté dimideuen prang."

¹¹TUHAN meufeureuman, "Teuma teuka saát jih Ulôn Lôn peupuléh keurajeuen Nabi Daud. Saát nyoe keurajeuen nyang ka jeuet lagée rumoh nyang reuloh. Teuma bintéh-bintéh beuton jihnyan Lôn peugét dan Lôn peudong lom sampoe jeuet lagée nyang ka-ka.

¹²Ureuëng Israel jikuasa nanggroe Edom nyang mantong tinggai dan bandum bansa yoh masa ilée atra Ulôn. Ulôn, TUHAN, ka Lôn peugah haba dan hai nyan Lôn laksana."

¹³TUHAN meufeureuman, "Teuma teuka watée jih gandom jitimoh bagaih that sampoe musém keumeukoh hántom reuda. Bak anggô timoh lumpah that jai sampoe manusia hana putôh-putôh jipeugét ié anggô. Ié anggô jililéeh di gunong-gunong dan ji ile nibak bukét-bukét.

¹⁴Ulôn Lôn peujeuet umat Lôn Israel makmu lom teuma. Awaknyan jipeudong lom banda-banda jih keudroe nyang ka reuloh, laju awaknyan tinggai disinan. Awaknyan jipula lampôh-lampôh anggô, dan ji-jieb ié anggô nyan. Awaknyan jimeulampôh sira jipula meubagoe seunaman, dan jipajoh hase lampôh jihnyan.

¹⁵Ulôn Lôn keubah umat Ulôn bak nanggroe nyang ka Ulôn bri keu awaknyan. Awaknyan hana teutarek le nibak teumpat nyan. Ulôn, TUHAN Allah awaknyan ka Lôn peugah haba."

← Previous All Books Next →

Loading Bible Translation

First-time download in progress. This may take a few seconds…

←Bible|||

Acehnese Holy Bible Wordproject Bible