Kitab Teu-Ulang 10

22 verses

¹"Óh lheueh nyan TUHAN meufeureuman lom ubak ulôn, 'Hai, Nabi Musa, gata jakpeut kheueh laju dua boh leumpeng batée lagée nyang phon-phon, dan gata peugét kheueh teuma saboh peuto kayée keu teumpat atranyan, lheueh nyan gatajak kheueh ubak Ulôn di pucak gunong.

²Nibak batée-batée nyan teuma Ulôn tuléh deungon haba nyang saban lagée nibak batée nyang ka gata peubeukah nyan; óh lheueh nyan batée-batée nyan harôh kheueh gata peutamong u dalam peuto nyan.'

³Laju ulôn peugét peuto nibak kayée akasia dan lôn peut laju dua boh batée lagée nyang ilée, lheuehnyan atranyan laju ulôn ba u ateueh gunong.

⁴Nibak batéenyan geutuléh laju lé TUHAN Siploh boh Peurintah saban ngon atra awai, na kheueh peurintah-peurintah nyang geubri keu gata, bak watée Gobnyan geupeugah haba di teungoh-teungoh apui bak uroe gata meusapat di gaki gunong. Óh lheueh nyan TUHAN geubri laju batée tuléh nyan ubak ulôn

⁵dan laju teuma lôn gisa lom sira lôn treun diateueh gunong nyan. Laju óh lheuehnyan dan paih lagée peurintah TUHAN, ban dua boh batée tuléh nyan ulôn peutamong laju udalam peuto nyang ka ulôn peugét -- dan phon saát nyan sampoe án jinoe ban dua batée tuléh nyan mantong na disinan." (

⁶Óh lheuehnyan ureuëng Israel nyan laju jibeurangkat nibak mon-mon ureuëng Yaakan, dan jijak u Mosera. Di teumpat nyan kheueh teuma Nabi Harun meuninggai donya ngon jikubu. Eleazar geunantoe gobnyan sibagoe imeum.

⁷Beudôh nibak teumpat nyan awaknyan jijak laju u Gudgod, laju u Yotbata, daerah nyang jai that ié jih.

⁸Di gunongnyan TUHAN geupeukhusos sukée Lewi keu nyang urôh Peuto peujanjian dan jipeutimang TUHAN, meunan cit teu kheun beureukat ateueh nan Gobnyan. Nyang kheueh tugaih awaknyan sampoe án jinoe.

⁹Lé sababnyan sukée Lewi hana jiteurimong tanoh pusaka lagée sukée-sukée nyang laén, sabab TUHAN kheueh jeumba dan warésan awaknyan, lagée nyang geupeugah lé TUHAN Po teu Allah ubak awaknyan.)

¹⁰"Peuet ploh uroe peuet ploh malam ulôn tinggai di ateueh gunong lagée nyang ulôn peubuet phon-phon that. Sigoe teuk TUHAN geudeungoe ulôn, dan Gobnyan situju hana geu peubinasa gata.

¹¹Lé Gobnyan geuyue ulôn mangat lônjak pimpén gata mangat gata hase tateurimong sibagoe hak milék tanoh nyang ka geupeujanji ubak indatu gata."

¹²"Jinoenyoe, Syedara-syedara, ngieng kheueh peue nyang geulakée TUHAN Po teu Allah gata nibak gata: Horeumat kheueh TUHAN Po teu Allah gata dan peubuet kheueh banmandum nyang geupeurintah lé Gobnyan. Cinta kheueh Gobnyan dan meuiébadat kheueh ubak Gobnyan deungon bansaboh jiwa raga gata.

¹³Taát kheueh ubak peurintah TUHAN nyang nibak uroenyoe ulôn peutrok ubak gata deumi keugét gata keudroe.

¹⁴TUHAN Po teu Allah gata nyang po langét nyang manyang; bumoepi atra Gobnyan meunan cit banmandum nyang na di ateueh nyan.

¹⁵Teuma geunaséh TUHAN keu indatu gata rayeuk lumpah na, sampoe nibak meubagoe bansa gata kheueh nyang geupiléh lé Gobnyan, dan trok án jinoepi gata umat Gobnyan nyang teupiléh.

¹⁶Lé sababnyan phon saátnyoe gata harôh taát ubak TUHAN dan bék kheueh gata meukreueh ulée le.

¹⁷TUHAN Po teu Allah gata na ateueh meubagoe ilah nyang laén dan leubeh nibak meubagoe kuasa. Gobnyan Po teu Allah nyang agong dan meukuasa nyang harôh teutaát. Gobnyan hana galak geudong siblaih meunan cit hana galak geuteurimong sugok.

¹⁸Gobnyan geubila hak aneuëk yatem ngon muntui dan inong balée mangat awaknyan jipeusaneut deungon ade; Gobnyan geugaséh keu ureuëng aséng nyang udeb meusapat deungon bansa geutanyoe dan geujok keu awaknyan peunajoh deungon peukayan.

¹⁹Deungon nyan gatapi harôh gata tunyok gaséh sayang gata ubak ureuëng aséng nyan. Sabab yoh watée ilée gatapi ureuëng aséng di nanggroe Meusé.

²⁰Horeumat kheueh TUHAN Po teu Allah gata dan meuiébadat kheueh ubak Gobnyan mantong. Bah kheueh gata teutab seutia ubak Gobnyan dan meunyoe meubudok deumi nan Gobnyan mantong.

²¹Pujoe kheueh Gobnyan sabab Gobnyan TUHAN Po teu Allah gata. Ngon mata ulée gata keudroe gata ka lheueh takalon buet-buet nyang hebat luwabiasa nyang ka geupeubuet lé Gobnyan keu gata.

²²Watée indatu gata geujak u nanggroe Meusé, jeumeulah awaknyan na kheueh tujoh ploh droe. Teuma, TUHAN Po teu Allah ka geupeujeuet gata le jih sidub bintang-bintang nyang na di langét."

← Previous All Books Next →