Kitab Teu-Ulang 20

20 verses

¹"Meunyoe gata tajak muprang gata lawan bube na musoh-musoh gata, bék teumakot watée gata kalon geuritan prang meunan cit deungon guda-guda awaknyan nyang le dan tantra awaknyan nyang jai leubeh nibak jeumeulah gata. TUHAN Po teu Allah gata nyang peubeubaih gata nibak nanggroe Meusé, meunan cit Gobnyan teuma geutulông gata.

²Sigohlom gata peuphon muprang, sidroe nibak imeum harôh kheueh jimaju sira jipeugah haba ubak gata lagéenyoe,

³'Syedara-syedara, gata deungoe kheueh nyoe! Nibak uroenyoe gata tamaju u mideuen prang. Bék kheueh gata takot atawa cut até peuteuk lom gata bingong.

⁴TUHAN Po teu Allah gata teuma geuseutôt sira geujak tulông gata, dan Gobnyan teuma geupeumeunang gata.'

⁵Óh lheueh nyan dipeurwira harôh kheueh jijak peugah tutoe haba nyoe ubak gata, 'Peue na lamkawan gata ureuëng nyang ban mantong jipeugét rumoh, teuma gohlom na jipeugét khanuri keuhai teureuseumi rumohnyan? Meunyoe nyan na, jihnyan ka jeuet jijakwoe. Sabab meunyoe jih nyan rhoh teupoh maté lam mideuen prang, ureuëng laén nyang teuma jitinggai didalam rumoh nyan.

⁶Peu kheueh na lamkawan gata ureuëng nyang banmantong jijak pula bak anggô di dalam lampôh jih? Meunyoe na, jih nyan ka jeuet jijakwoe. Sabab meunyoe jihnyan sampoe maté didalam mideuen prang, ureuëng laén nyang rasa ié anggô jih nyan.

⁷Lom teuma peu kheueh na lamkawan gata ureuëng nyang meutunangan laju na napeusu jimeukawen? Meunyoe na, jih nyan ka jeuet jijakwoe. Sabab meunyoe jihnyan teupoh maté didalam prang, ureuëng laén teuma jimeukawen ngon tunangan jih nyan.'

⁸Meunan cit di lé peurwira harôh kheueh jipeugah lagéenyoe ubak gata, 'Peu kheueh na lamkawan gata ureuëng nyang gugob ngon teumakot? Meunyoe nyan na, jih nyan jeuet jijakwoe, mangat jihnyan hana jipeurhot seumangat ureuëng laén.'

⁹Óh ka lheueh peurwiranyan jipeugah haba ubak tantra, harôh teuma jitunyok peumimpén-peumimpén keu tieb-tieb keusatuan.

¹⁰Meunyoe gata tajak keu gatajak prang saboh-saboh banda, gatajok kheueh ilée watée nyang reunggang ubak banmandum peunduduek disinan mangat jiseurah droe.

¹¹Meunyoe awaknyan jijak buka pintoe-pintoe geureubang dan jiseurah droe, awaknyan banmandum harôh kheueh beujeuet keu namiet gata dan jijak peubuet keureuja paksa keu gata.

¹²Teuma meunyoe peunduduek bandanyan hana jitem seurah droe jih dan leubeh galak jimuprang, dan gata harôh kheueh tajak keupông bandanyan.

¹³Óh lheueh nyan, meunyoe TUHAN Po teu Allah gata, geupeumungken gata tajak reubot bandanyan, gata harôh kheueh tapoh maté banmandum peunduduek nyang na disinan khusos jih nyang agam mantong.

¹⁴Teuma gata jeuet tacok bubena kawöm ureuëng inong, aneuëk-aneuëk manyak, meunan cit ngon beulatang peulara dan peue mantong nyang na di bandanyan. Banmandum hareuta beunda atra musoh-musoh gata nyan jeuet gata ngui. TUHAN Po teu Allah gata teuma geujok nyan keu gata.

¹⁵Meunan kheueh nyang harôh gata peubuet ateueh banda-banda nyang jiôh nibak nanggroe teumpat tinggai gata.

¹⁶Teuma meunyoe banda nyan na didalam wilayah nyang ka geubri lé TUHAN Po teu Allah gata keu gata, banmandum peunduduek nyang na disinan harôh kheueh teupoh maté.

¹⁷Lagée nyang ka geupeurintah lé TUHAN Po teu Allah, gata harôh kheueh gata peubinasa bubena ureuëng-ureuëng Het, Amori, Kanaan, Feris, Hewi, dan Yebus.

¹⁸Gatapoh maté kheueh awaknyan mangat awaknyan hana meudesya ubak TUHAN Po teu Allah gata deungon cara jipeurunoe gata buet-buet nyang keubit luwat keu ilah-ilah awaknyan.

¹⁹Meunyoe gata tajak muprang bak saboh banda dan banda nyan gata keupông lam watée nyang katreb that, bék kheueh gatakoh bak-bak kayée nyang muboh nyang na disinan. Gata pajoh kheueh bubena boh-boh kayéenyan, teuma bék kheueh gata peurusak bak-bak kayée jihnyan sabab bak-bak kayéenyan bukon kheueh musoh gata.

²⁰Bak-bak kayée nyang laén jeuet gata koh keu teupeugét keu pageue teukeupông sampoe banda-bandanyan rhot keu gata."

← Previous All Books Next →