Kitab Teu-Ulang 25

18 verses

¹Miseujih na dua droe ureuëng Israel jijak ubak kantô mahkamah keujijak gadu sapeue peukara, lé nyang sidroe jipeugah hana meusalah, dan nyang laén meusalah.

²Meunyoe nyang meusalah teupeurhot ubak huköm seunuet, di teungku hakém geuyue laju ureuëng nyan meudugom. Jeumeulah na padubgo teuseunuet teugantung nibak buet nyang jeuhet nyang ka jipeubuet,

³teuma hana jeuet leubeh nibak peuet ploh goe. Meunyoe leubeh, beuareuti ureuëng nyan ka jihina dikeue ureuëng ramé.

⁴Bék kheueh peugaceb babah leumô nyang teungoh jimomoh gandom."

⁵"Meunyoe ureuëng-ureuëng nyang meusyedara tinggai jih meusapat, laju sidroe nibak ureuëng nyan maté dan hana teuma jitinggai aneuëk agam, teuma balée jihnyan hana jeuet jimeukawen ngon ureuëng laén diluwa keuluwarga meureuhom lakoe jihnyan. Syedara meureuhom nyan wajéb jimeukawen ngon balée nyan.

⁶Aneuëk agam tuha awaknyan harôh kheueh teuanggab aneuëk syedara nyang matényan, mangat jihnyan na keuturonan lamkawan bansa Israel.

⁷Meunyoe ureuëng agam nyan hana jitem meukawen ngon peurumoh meureuhom syedara jihnyan, ureuëng inong nyan harôh jijak meuhadab ubak peumuka banda sira jipeugah lagéenyoe, 'Parui ulôn hana jitem peubuet keuwajébanjih keu jibri keu syedara jih sidroe keuturonan lamkawan bansa Israel.'

⁸Laju lé peumuka banda harôh geuhôi ureuëng nyan dan geupeugah bak ureuëng nyan. Meunyoe ureuëng nyan teutab cit jitulak,

⁹peurumoh meureuhom lakoe jih nyan harôh jijak peuto ubak jihnyan dikeue dumna peumuka banda, jisuet seulob ureuëng nyan, jiludah laju muka jihnyan dan jipeugah teuma lagéenyoe, 'Lagéenyoe kheueh nyang harôh teupeubuet ateueh ureuëng nyang hana jitem bri keuturonan keu syedara jih.'

¹⁰Keuluwarga ureuëng nyan teuma jituri di Israel sibagoe 'Keuluwarga ureuëng nyang teusuet seulob jih.' "

¹¹"Meunyoe na dua droe ureuëng agam jimeulo, dan peurumoh nyang sidroe jiuseuha jitulông lakoe droe jih deungon cara jiramah ngon jipiret boh kréeh lawan lakoe jihnyan,

¹²gatakoh kheueh jaroe ureuëng inong nyan dan bék kheueh tagaséh keu ureuëng nyang lagéenyan.

¹³Bék gata peungéut ureuëng laén ngon cara gatangui ceng dan sinukat nyang hana beutôi.

¹⁵Gatangui kheueh céng dan sinukat nyang paih mangat gata panyang umu di nanggroe nyang geubri lé TUHAN Po teu Allah keu gata.

¹⁶TUHAN Po teu Allah gata that-that geubanci keu ureuëng nyang galak jipeungéut ureuëng laén."

¹⁷"Gata ingat kheueh pakriban ureuëng Amalek jipeusaneut gata bak watée gata mantong gatajak dan tateubiet nibak nanggroe Meusé.

¹⁸Awaknyan hana jitakot ubak Po teu Allah dan jiseurang gata rot likot bak watée gata mantong that-that hek meunan cit ka habéh teunaga, laju jipoh maté banmandum ureuëng-ureuëng gata nyang deungon susah payah jijak nibak rot likot.

¹⁹Lé sabab nyan, meunyoe TUHAN Po teu Allah gata ka geubri nanggroe nyan keugata dan gata aman nibak banmandum musoh nyang na tinggai bansikeulileng gata, banmandum ureuëng Amaleknyan harôh gata poh maté sampoe awaknyan hana ji ingatle. Bék kheueh tuwoe!"

← Previous All Books Next →