Keuluaran 38

¹Bezaleel laju jicok kayée akasia, óh lheuehnyan laju jipeugét miseubah keu keureubeuen nyang teutot. Miseubah nyan hi jih peuet sagoe, panyang ngon luwah jih maséng-maséng na 2,2 metée, dan manyang jih 1,3 metée.

²Nibak tieb-tieb sudut blaih u ateueh jipeugét lungkée nyang jeuet meusaboh ngon miseubah nyan. Bansabohnyan teuseupôh ngon peurunggu.

³Meunan cit jipeugét kuali-kuali, sudok, cambông-cambông, geureupu-geureupu meunan cit teumpat apui. Banmandum peuleungkapan nyan teupeugét nibak peurunggu.

⁴Meunan cit jipeugét teuma kawat teumanyuem nibak peurunggu nyang teulilet nibak miseubah siblaih u miyueb, manyang jih siteungoh nibak manyang miseubah.

⁵Óh lheuehnyan laju jipeugét peuet boh gleung nibak kayée geunulam nibak ban peuet boh geunulam siblaih u miyueb jih.

⁶Kayée geunulam nyan teupeugét nibak kayée akasia nyang teuseupôh ngon peurunggu.

⁷Laju bandua kayée geunulam nyan jipeutamong lam gleung-gleung nibak bandua sagoe miseubah nyan. Miseubah nyan teupeugét nibak papeuen dan siblaih u dalam jih meurongga.

⁸Bezaleel jipeuget bak peurunggu dan keunaleueng peurunggu. Peurunggu nyan nibak ceureumen-ceureumen atra ureuëng-ureuëng inong nyang peutimang nibak babah pintoe Khimah TUHAN.

⁹Bezaleel laju jipageue Peulataran Khimah TUHAN ngon layeue nyang teupeugét nibak ija lineun halôh. Nibak siblah u seulatan, panyang jih na 44 metée,

¹⁰jipeuteun lé dua ploh boh taméh peurunggu, maséng-maséng lam keunaleueng peurunggu, deungon ceunawiét dan sinangkot jih nyang teupeugét nibak pirak.

¹¹Meunan cit blaih si utara lagée nyan teuma teupeugét.

¹²Si blaih u barat teupasang layeue nyang panyang jih na 22 metée, deungon siploh boh taméh dan siploh boh teuma keunaleueng; ceunawiét dan sinambat jih teupeugét nibak pirak.

¹³Si blaih u timu nyang na pintoe jih, luwah layeue jih na 22 metée.

¹⁴Nibak wie ngon uneuen pintoe nyan teupasang layeue, maséng-maséng panyang jih 6,6 metée, deungon lhée boh taméh dan lhée boh teuma keunaleueng.

¹⁶Banmandum layeue nyang na bansilingka nyan teupeugét nibak ija lineun halôh.

¹⁷Keunaleueng taméh-taméh jih teupeugét nibak peurunggu, meunyoe ceunawiét, sinambat meunan cit ngon pucak taméh jih teupeugét nibak pirak. Banmandum taméh nyang na bansilingka peulataran nyan teusangkot saboh ngon nyang laén deungon sinangkot pirak.

¹⁸Ija tirée keu pintoe geureubang nyan teupeugét nibak ija lineun halôh nyang teucôb ngon ija wol ijo, ungu dan mirah dan teuboh hias ngon côb sulam. Panyang jih na sikureueng metée dan manyang jih dua metée, saban ngon layeue nibak peulataran.

¹⁹Ija pintoe nyan jipeuteun lé peuet boh taméh deungon peuet boh keunaleueng peurunggu. Banmandum ceunawiét meunan cit sinutôb pucak jih dan sinangkot jih teupeugét nibak pirak,

²⁰teuma patok-patok keu Khimah meunan cit keu pageue jih teupeugét nibak peurunggu.

²¹Nyoe kheueh dafeutar nyang teupeuguna lam Khimah TUHAN, teumpat bandua neuk batée dan siploh Peurintah Allah nyan teukeubah. Dafeutar nyan teupeugét ateueh peurintah Nabi Musa dan jisuson lé ureuëng-ureuëng Lewi nyang meukeureuja dimiyueb pimpénan Itamar, aneuëk Imeum Nabi Harun.

²²Bezaleel aneuëk Uri, cucoe Hur nibak sukée Yehuda, jipeugét banmandum nyang geupeurintah lé TUHAN.

²³Peumbantu gobnyan Aholiab aneuëk Ahisamakh nibak sukée Dan, na kheueh sidroe tukang meu-uke, peurancang dan tukang côb ija lineun nyang halôh, meunan cit ija wol ijo, ungu dan mirah.

²⁴Méuh nyang jipeuseumah ubak TUHAN keu Khimah Suci banmandum nyan na siribée kilogram, teutimang meunurot céng nyang teupeuguna nibak Khimah TUHAN.

²⁵Pirak nyang jiteumé nibak seunsus bansa Israel le jih na 3.430 kilogram atranyan teutimang meunurot céng nyang teupeuguna lam Khimah TUHAN.

²⁶Jeumeulah nyan sadub lagée peue nyang jibayeue lé mandum ureuëng nyang teudafeutar lam seunsus nyan. Tieb-tieb ureuëng jibayeue yuem nyang ka teupeuteuntée, teutimang meunurot céng nyang teupeuguna. Nibak seunsus nyan na teudafeutar 603.550 droe ureuëng agam nyang meu-umu dua ploh thon u ateueh.

²⁷Nibak pirak nyan, 3.400 kilogram teupeuguna keuteupeugét bansireutôh keunaleueng Khimah TUHAN dan ija pintoe jih. Tieb-tieb keunaleueng na brat jih 34 kilogram.

²⁸Pirak nyang leubeh nyan, nyang le jih 30 kilogram. Bezaleel laju jipeugét sinambat-sinambat dan ceunawiét-ceunawiét keu taméh-taméh nyan, meunan cit sinutôb pucak nibak taméh-taméh nyan.

²⁹Peurunggu nyang jipeuseumah ubak TUHAN banmandum nyan na jeumeulah jih 2.425 kilogram.

³⁰Peurunggu nyan teupeuguna keu ngon peugét keunaleueng pintoe Khimah TUHAN, miseubah deungon meunanyum kawat nibak peurunggu, banmandum peuleungkapan miseubah,

³¹keunaleueng layeue bansilingka peulataran dan babah pintoe geureubang jih, banmandum patok Khimah dan peulataran bansilingka nyan.