Keuluaran 6

30 verses

¹Dan feureuman TUHAN ubak Nabi Musa, "Jinoenyoe gata teuma tangieng pakriban Ulôn meutindak ateueh raja nyang zalem nyan. Raja nyan teuma Ulôn paksa mangat jitinggai bansa Ulôn. Nyang sibeuna jih, jihnyan teuma Lôn paksa mangat ji-use awaknyan nibak nanggroe nyoe."

²Po teu Allah geumeututoe ubak Nabi Musa, "Ulôn kheueh TUHAN.

³Ulôn ka lheueh Lôn peuleumah droe ubak Nabi Ibrahim, Nabi Ishaq dan Nabi Yakub sibagoe Allah Nyang Mahakuasa, teuma Ulôn hana Lôn puturi droe ubak awaknyan deungon nan 'TUHAN'.

⁴Meunan cit Ulôn peuna peujanjian ngon awaknyan. Ulôn meujanji teuma Ulôn bri nanggroe Kanaan keu awaknyan, nanggroe nyang yoh masa dilée awaknyan udeb sibagoe ureuëng aséng.

⁵Ulôn ka Lôn deungon ureuëng Israel apoh apah sabab jipeubudak lé bansa Meusé, dan laju teuingat ubak janji Lôn.

⁶Ngon sabab nyan, jak peumaklum kheueh ubak bansa Israel bahwa Ulôn peugah ubak awaknyan: Ulôn kheueh TUHAN; gata Ulôn peubeubaih nibak jipeubudak lé bansa Meusé. Ulôn teuma Lôn tunyok keukuasaan Lôn nyang luwa biasa guna keu Lôn peuseulamat gata dan Lôn peurhot huköman nyang brat ateueh bansa Meusé.

⁷Gata Lôn peujeuet keu umat Lôn, dan Ulôn jeuet keu Allah gata. Deungon lagée nyan gata tateupeue bahwa Ulôn nyoe na kheueh TUHAN, Allah gata, nyang peubeubaih gata nibak jipeujeuet keubudak di nanggroe Meusé.

⁸Gata Ulôn ba u nanggroe nyang ka Ulôn peujanji deungon sumpah ubak Nabi Ibrahim, Nabi Ishaq dan Nabi Yakub; tanoh nyan Ulôn bri ubak gata jeuet keuhak milék gata keudroe. Ulôn kheueh TUHAN."

⁹Banmandum feureuman TUHAN nyan geupeusampoe lé Nabi Musa ubak bansa Israel, teuma awaknyan teutab hana jipakoe peue-peue nyang geupeugah lé Nabi Musa nyan, sabab jipeujeuet keunamiet nyang lumpah keujam nyan, ureuëng-ureuëng Israel ka jeuet keuputôh asa.

¹⁰Óh lheuehnyan TUHAN meufeureuman ubak Nabi Musa,

¹¹"Jak kheueh meuhadab ubak raja Meusé dan peugah ubak jihnyan bahwa raja nyan harôh jibri idhin bansa Israel jitinggai nanggroe jihnyan."

¹²Teuma Nabi Musa geujaweueb, "Ureuëng Israel keudroe hana jitem deungoe ulôn. Panena mungken raja Meusé jideungoe ureuëng nyang hana carông jimariet lagée ulôn?"

¹³Meunan kheueh cara jih TUHAN geu-utus Nabi Musa dan Nabi Harun keugeujak peusampoe ubak bansa Israel dan ubak raja nanggroe Meusé bahwa awaknyan geubri tugaih lé TUHAN keu teujak pimpén bansa Israel jiteubiet nibak nanggroe Meusé.

¹⁴Nyoe kheueh asai usui Nabi Musa ngon Nabi Harun: Ruben, aneuëk tuha Nabi Yakub, na peuet droe aneuëk agam: Henokh, Palu, Hezron, dan Karmi. Awaknyan na kheueh indatu nibak kawöm-kawöm nyang na lam sukée Ruben.

¹⁵Simeon dan peurumoh gobnyan sidroe ureuëng inong nanggroe Kanaan na teuma nam droe aneuëk agam; aneuëk-aneuëk nyan na kheueh: Yemuel, Yamin, Ohad, Yakhin, Zohar dan Saul. Awaknyan na kheueh indatu nyang na lam kawöm-kawöm Simeon.

¹⁶Lewi na lhée droe aneuëk agam; aneuëk-aneuëk geuh nyan na kheueh: Gerson, Kehat dan Merari; awaknyan indatu nibak banmandum kawöm nyang na lam sukée Lewi. Lewi sampoe na umu 137 thon.

¹⁷Gerson na teuma dua droe aneuëk agam; aneuëk-aneuëk geuh nyan na kheueh: Libni dan Simei; bak awaknyan jai that-that jipeutreun keuturonan.

¹⁸Kehat na teuma peuet droe aneuëk agam: Amram, Yizhar, Hebron dan Uziel. Kehat sampoe na umu gobnyan 133 thon.

¹⁹Merari na teuma dua droe aneuëk agam: Mahli dan Musi. Nyan kheueh kawöm-kawöm nyang na lam sukée Lewi deungon keuturonan awaknyan maséng-maséng.

²⁰Amram geumeukawen ngon Yokhebed, adoe nyang inong ayah gobnyan, dan aneuëk-aneuëk awaknyan na kheueh Nabi Harun ngon Nabi Musa. Amram sampoe na meu-umu 137 thon.

²¹Yizhar na teuma lhée droe aneuëk agam; aneuëk-aneuëk geuhnyan na kheueh: Korah, Nefeg dan Zikhri.

²²Uziel na teuma lhée droe aneuëk agam: Misael, Elsafan dan Sitri.

²³Nabi Harun geumeukawen ngon Eliseba, aneuëk inong Aminadab; dan Eliseba meusyedara ngon Nahason. Eliseba jipeulahé Nadab, Abihu, Eleazar dan Itamar.

²⁴Korah na teuma lhée droe aneuëk agam: Asir, Elkana dan Abiasaf. Awaknyan indatu nibak kawöm keuluwarga Korah.

²⁵Eleazar, aneuëk agam Nabi Harun, jimeukawen ngon sidroe aneuëk nibak Putiel, dan aneuëk awaknyan na kheueh Pinehas. Nyan kheueh banmandum ulée kawöm dan ulée keuluwarga nyang na lam sukée Lewi.

²⁶Nabi Harun ngon Nabi Musa nyan kheueh nyang geupeurintah lé TUHAN keu geuba banmandum ureuëng Israel jiteubiet lam nanggroe Meusé.

²⁷Awaknyan bandua geujak meuhadab ubak raja nanggroe Meusé mangat gobnyan geupeubeubaih ureuëng Israel.

²⁸Watée TUHAN meufeureuman ubak Nabi Musa di Meusé,

²⁹Feureuman TUHAN, "Ulôn kheueh TUHAN. Jak peugah kheueh ubak raja Meusé peue-peue mantong nyang ka Ulôn peugah ubak gata."

³⁰Teuma Nabi Musa geujaweueb, "TUHAN, Droeneueh neuteupeue bahwa ulôn hana carông lôn peugah haba. Panena mungken raja jitem deungoe peue nyang ulôn peugah?"

← Previous All Books Next →