Keuluaran 8

32 verses

¹Dan feureuman TUHAN ubak Nabi Musa, "Jak laju meuhadab ubak raja dan gata peusampoe kheueh peusan Ulôn nyang lagée nyoe, 'Peuidhin kheueh umat Ulôn jijak meuiébadat ubak Ulôn.

²Meunyoe hainyan gata tulak, nanggroe nyoe Ulôn peupeunoh ngon cangguek sibago huköman.

³Lam Krueng Nil peunoh ngon cangguek, sampoe cangguek-cangguek nyan teuma jiteubiet lam ié nyan jitamong laju lam meuligoe gata, lam kama éh ngon teumpat éh gata, lam rumoh-rumoh peujabat dan rumoh rakyat gata, meunan cit lam teumpat tot ruti dan lam banmandum ayan.

⁴Cangguek-cangguek nyan jigrob-grob na nyang ji-ek ateueh gata, ateueh banmandum peujabat dan rakyat gata.' "

⁵TUHAN meufeureuman ubak Nabi Musa, "Gata yue kheueh ubak Nabi Harun mangat tungkat jihnyan jireuntang u ateueh bubena krueng, lueng-lueng ié dan banmandum kulam-kulam ié mangat cangguek-cungguek jiteubiet jipeupeunoh bansaboh tanoh Meusé."

⁶Dan Nabi Harun laju geuayon tungkat geuhnyan ateueh bubena ié, dan laju jiteubiet bubena cangguek sampoe ka peunoh bansaboh nanggroe.

⁷Teuma lé tukang peugét iéleumé sihe laju jipeuguna banmandum iéleumé gaéb nyang na nibak jih, dan meunan cit jipeujeuet cangguek-cangguek akhé jih ka jiteuka bansaboh nanggroe nyan.

⁸Raja nanggroe Meusé nyan laju jihôi Nabi Musa ngon Nabi Harun, sira jipeugah lagée nyoe, "Meudoá kheueh gata ubak TUHAN mangat Gobnyan geupeugadôh bubena cangguek-cangguek nyoe, óh lheuehnyan barô kheueh ulôn bri bansa gata keu jijak peuseumah keureubeuen ubak TUHAN."

⁹Geujaweueb lé Nabi Musa, "Deungon até nyang seunang ulôn meudoá keu Po raja. Peuteutab kheueh watée jih, teuma di ulôn laju lôn meudoá keu Po raja, keu banmandum peujabat dan rakyat. Dan Po raja teuma geupeubeubaih nibak banmandum cangguek-cangguek nyan, dan hana nyang tinggai bahpi meusaboh, teukeucuali nyang na tinggai nyang lam Krueng Nil."

¹⁰Jaweueb raja, "Meudoá kheueh keu ulôn singoh." Kheun Nabi Musa, "Ulôn teuma lôn peubuet peue nyang Po raja lakée. Teuma Po raja neuteupeue bahwa hana Allah nyang lagée TUHAN, Allah kamoe.

¹¹Gobnyan geupeubeubaih Po raja, banmandum peujabat dan rakyat nyang ka jipeukaru lé cangguek-cangguek nyan. Hana le cangguek-cangguek nyan lam rumoh-rumoh, teukeucuali nyang tinggai lam Krueng Nil."

¹²Óh lheueh geukheun nyan Nabi Musa ngon Nabi Harun laju geutinggai raja. Óh lheuehnyan Nabi Musa laju geumeudoá ubak TUHAN mangat bubena cangguek nyan geusampôh banmandum nyang ka teuka ateueh Po raja.

¹³TUHAN laju geuteurimong ngon geukabui doá Nabi Musa, dan bubena cangguek nyang na di rumoh-rumoh, nibak leuen-leuen rumoh dan nyang na di ladang banmandum maté.

¹⁴Ureuëng Meusé laju jipeusapat banmandum bangke-bangke cangguek nyan sampoe meutamon meukuyan-kuyan, bansaboh nanggroe habéh mubée khiéng.

¹⁵Watée jingieng lé raja bahwa cangguek-cangguek nyan ka habéh maté, laju ji-iengkeue ubak haba jih lé raja nyan dan ulée jih meutamah-tamah kreueh. Dan lagée nyang ka lheueh geupeugah lé TUHAN, raja teutab hana jipakoe peue-peue nyang geupeugah lé Nabi Musa ngon Nabi Harun.

¹⁶Feureuman TUHAN ubak Nabi Musa, "Gata yue kheueh ubak Nabi Harun mangat jiseukok tanoh ngon tungkat jihnyan, dan laju bansaboh nanggroe Meusé jibeudôh abée meu-ubah jeuet keu jamôk."

¹⁷Ban geudeungoe haba nyan Nabi Harun laju geuseukok tanoh ngon tungkat geuh, dan banmandum abée nyang na lam nanggroe Meusé laju meu-ubah jeuet keu jamôk dan di jamôk nyan laju jiramien ateueh manusia dan beulatang.

¹⁸Lé ureuëng-ureuëng ahli iéleumé sihe di Meusé ji-useuha ngon iéleumé gaéb nyang na bak jih keu jipeujeuet jamôk-jamôk, goenyoe awaknyan hana meuhase. Dipat mantong bansaboh nanggroe na jamôk,

¹⁹akhé jih banmandum ureuëng ahli iéleumé sihe nyan laju jipeugah ubak raja, "Nyoe kheueh buet Po teu Allah." Teuma lé raja nyan teutab kreueh ulée, dan saban lagée nyang ka geupeugah lé TUHAN, raja nyan teutab hana jipakoe ubak peue-peue nyang ka geupeugah lé Nabi Musa ngon Nabi Harun.

²⁰TUHAN meufeureuman ubak Nabi Musa, "Gata jak kheueh singoh beungoh ban seuboh that watée raja nyan jijak ukrueng, dan gata peugah ubak raja nyan haba Ulôn nyoe, 'Neupeuidhin kheueh umat Ulôn jijak meuiébadat ubak Ulôn.

²¹Meunyoe gata tulak, Ulôn teuma Lôn peutreun lalat ubak gata, ubak banmandum peujabat dan ubak rakyat gata. Rumoh-rumoh ureuëng Meusé, meunan cit bansaboh nanggroe peunoh ngon lalat.

²²Teuma keu daerah Gosyen na keucuali, bak teumpat umat Ulôn tinggai. Disinan hana lalat, mangat gata tateupeue bahwa Ulôn kheueh TUHAN, nyang ka Lôn peubuet nyan.

²³Ulôn teuma Lôn peubeda umat Ulôn ngon rakyat gata. Buet nyang ajaéb nyan teuka singoh.' "

²⁴TUHAN geupeutreun lalat nyang lumpah jai ubak meuligoe raja dan ubak rumoh-rumoh peujabat. Bansaboh nanggroe Meusé lumpah that meudeurita sabab lé lalat-lalat nyan.

²⁵Óh lheuehnyan raja laju geuhôi Nabi Musa ngon Harun dan laju geupeugah, "Jak kheueh peuseumah keureubeuen ubak Allah gata, teuma bak nanggroe nyoe mantong."

²⁶"Nyang gét jih bék," jaweueb Nabi Musa, "sabab ureuëng nanggroe Meusé meurasa teusinggong watée jingieng nyang kamoe peuseumah nyoe, dan pasti kamoe nyoe jigeulawa ngon batée sampoe maté.

²⁷Kamoe harôh kamoe jak u padang pasi nyang jiôh jih lhée uroe meuneujak keu kamoejak peuseumah keureubeuen ubak TUHAN Allah kamoe, lagée nyang ka geupeurintah ubak kamoe."

²⁸Kheun raja, "Gét kheueh, meunyoe meunan, ulôn bri gata tajak u padang pasi mangat gata peuseumah keureubeuen keu TUHAN, Allah gata, asai gata hana tajak jiôh. Ingat, doá kheueh keu ulôn!"

²⁹Jaweueb Nabi Musa, "Óh ka leupah ulôn jak, kamoe laju kamoe jak meudoá ubak TUHAN mangat singoh beungoh banmandum lalat nyan jitinggai Po raja, banmandum peujabat dan rakyat. Teuma nyang kamoe lakée bék le neutipée kamoe, dan bék neutam-tam bansa Israel jijak peuseumah keureubeuen keu TUHAN."

³⁰Nabi Musa laju geutinggai raja, dan laju geumeudoá ubak TUHAN,

³¹dan TUHAN laju geukabui doá Nabi Musa. Lalat-lalat nyan laju jipo jitinggai raja, banmandum peujabat dan rakyat ba. Hana meusaboh lalat pih nyang na mantong tinggai.

³²Teuma goenyoe di raja teutab kreueh ulée dan teutab hana jibri idhin bansa Israel nyan jijak nibak nanggroe Meusé nyan.

← Previous All Books Next →