Yehezkiel 25

17 verses

¹TUHAN meufeureuman ubak ulôn,

²"He manusia fana, kutok kheueh nanggroe Amon.

³Yue kheueh bak bansa nyan peue nyang Ulôn, TUHAN Nyang Mahamanyang peugah ubak awaknyan, 'Gata galak takalon Baét Ulôn jipeukutoe dan tanoh Israel jipeurusak dan bansa Yahudi jiböih u teumpat aséng.

⁴Lé sabab nyan gata Lôn peubiyeu jipeutaloe lé sukée-sukée bansa nibak guron timu. Awaknyan jipeudong khimah-khimah di nanggroe gata laju teutab tinggai disinan. Awaknyan jipajoh boh-boh kayée dan jijieb ié susu beulatang peulara gata.

⁵Banda Raba Lôn ubah jeuet keu teumpat rabe unta, dan bansaboh nanggroe Amon Lôn peujeuet keu teumpat rabe bubiri. Dan barô kheueh gata teupeue bahwa Ulôn kheueh TUHAN.' "

⁶TUHAN Nyang Mahamanyang meufeureuman, "Gata tapéh peleut jaroe sira meulikak ria. Gata anggab phui tanoh Israel.

⁷Lé sabab nyan gata Lôn peujok ubak bansa-bansa nyang le nyang rampok dan reupah bandum atra milék gata. Gata Lôn peubinasa lagée nyan bagoe, sampoe hana le jeuet keu saboh bansa dan hana teuma na nanggroe keudroe. Dan neuteupeue kheueh lé gata bahwa Ulôn kheueh TUHAN."

⁸TUHAN Nyang Mahamanyang meufeureuman, "Moab jipeugah bahwa Yehuda nyan saban cit lagée bansa-bansa laén.

⁹Lé sabab nyan banda-banda nyang jipeuteun bataih nanggroe Moab Lôn peubiyeu jiprang lé musoh meunan cit deungon banda-banda nyang paleng ceudah, banda-banda nyan na kheueh: Bet-Yesimot, Baal-Meon dan Kiryataim.

¹⁰Ulôn kupeubiyeu sukée-sukée bansa di guron Timu jipeutaloe Moab meusajan ngon nanggroe Amon, sampoe Moab ka hana le jeuet keu saboh bansa.

¹¹Ulôn kuhuköm Moab, dan barô kheueh jiteupeue lé awaknyan bahwa Ulôn kheueh TUHAN."

¹²TUHAN Nyang Mahamanyang meufeureuman, "Bansa Edom ka jipeubuet salah nyang paleng raya sabab ka jipeubuet keujam ateueh bansa Yehuda, sabab jibalah dam.

¹³Sababnyan Ulôn peumaklum bahwa Ulôn kuhuköm Edom dan Lôn peumaté tieb-tieb manusia dan bubena beulatang nyang na disinan. Bansaboh nanggroe nyan, phon di banda Téman sampoe trok u banda Dedan, Ulôn peujeuet seungue seungab; rakyat nyang na disinan maté dimideuen prang.

¹⁴Bansa Ulôn Israel Ulôn peuguna keu teubalah dam ateueh Edom, dan Edom teupeusaneut deungon dahsyat nyang sipadan ngon beungéh Ulôn. Edom jiteupeue pakriban rasa jih jeuet keusasaran beungéh Ulôn. Ulôn, TUHAN Nyang Mahamanyang ka Lôn peugah haba."

¹⁵TUHAN Nyang Mahamanyang meufeureuman, "Ureuëng-ureuëng Filistin ka jibalaih dam deungon keujam ateueh musoh treun meutreun awaknyan dan jipeubinasa awaknyan deungon peunoh banci.

¹⁶Sababnyan Ulôn peumaklum Lôn prang ureuëng-ureuëng Filistin dan Lôn peuranab awaknyan. Tieb-tieb ureuëng nyang na mantong tinggai di sitot binéh panté Filistin Lôn poh maté.

¹⁷Ulôn kuhuköm awaknyan deungon brat dan Lôn peulheuh dam Lôn sampoe puih. Meunyoe awaknyan jirasa beungéh Ulôn, jiteupeue kheueh lé awaknyan bahwa Ulôn kheueh TUHAN."

← Previous All Books Next →