Yehezkiel 3

26 verses

¹Allah meufeureuman, "He manusia fana, pajoh kheueh kitab meugulong nyoe, óh lheueh nyan jak kheueh dan mariet kheueh ubak ureuëng-ureuëng Israel."

²Laju ulôn peuhah babah lôn dan Po teu Allah laju geusuleueng kitab meugulong nyan lam babah lôn mangat lôn pajoh.

³Kheun Gobnyan, "He manusia fana, pajoh kheueh! Pasoe kheueh pruet gata ngon kitab meugulong nyoe." Dan kitab nyan pi laju lôn pajoh rasa jih maméh lagée meulisan.

⁴Po teu Allah meufeureuman lom, "He manusia fana, tajak kheueh laju ubak ureuëng-ureuëng Israel dan peusampoe kheueh peue mantong peusan Ulôn keu awaknyan.

⁵Keu awaknyan kheueh gata Lôn kirém, dan bukon keu bansa nyang basa jih sulet, aséng dan hana muphom. Meunyoe kheueh gata Ulôn kirém ubak bansa nyang lagée nyan, awaknyan jideungoe tutoe haba gata.

⁷Teuma bansa Israel hana jitem deungoe gata, bahpi Ulôn keudroe pih hana jipako. Awaknyan bandum kreueh-kreueh ulée dan galak bak meulawan.

⁸Jinoenyoe gata Lôn peujeuet kreueh ulée dan gigéh lagée awaknyan cit teuma.

⁹Gata Ulôn peujeuet kukôh lagée batée kareueng dan kreueh lagée intan. Bék kheueh tatakot ubak peumbeurontak nyan."

¹⁰Lheuehnyan Po teu Allah geupeugah, "He manusia fana, ngieng kheueh beu gét-gét dan ingat kheueh peue nyang Ulôn peugah nyoe ubak gata.

¹¹Tajak kheueh ubak bansa gata nyang na tinggai di teumpat nyang teuböih nyan, dan peusampoe kheueh peue nyang Ulôn, TUHAN Nyang Mahamanyang peugah ubak awaknyan, peu kheueh jitem deungoe lé awaknyan atawa hana."

¹²Laju Roh Allah geubeuôt ulôn dan dilikot ulôn teudeungoe su geumuroh nyang jipeugah, "Pujoe kheueh keumuliaan TUHAN di syeuruga!"

¹³Lôn deungoe su sayeueb makhluk nyan saléng meuantok, dan su meukrab-krab ruda-ruda nyan nyang nyareng lagée su geumpa bumoe.

¹⁴Keukuasaan TUHAN nyang peujeuet ulôn lumpah that hebat, dan bak watée ulôn geubeuôt lé Roh Gobnyan, até ulôn meurasa phet dan seu uem.

¹⁵Dan trok kheueh ulôn ubak teumpat tinggai ureuëng nyang teuböih di Tel Abib nibak binéh Krueng Kebar. Na tujoh uroe treb jih ulôn tinggai disinan; ulôn teumanueng-manueng lé bandum nyang banmantong lôn deungoe dan lôn kalon nyan.

¹⁶Óh ka lheueh tujoh uroe, TUHAN geupeugah ubak ulôn,

¹⁷"He manusia fana, gata Ulôn angkat jeuet keu ureuëng kawai bansa Israel. Tapeusampoe kheueh ubak awaknyan haba peuingat nyang Ulôn bri nyoe.

¹⁸Meunyoe Ulôn peugah bahwa sidroe peunjahat maté, teuma gata hana tapeuingat bak awaknyan mangat awaknyan jiubah pi-e jih sampoe jihnyan seulamat, teuma jihnyan maté mantong lagée ureuëng nyang meudesya, dan tanggong jaweueb ateueh maté jih nyan jitunggée nibak gata.

¹⁹Meunyoe gata tapeuingat ureuëng jeuhet nyan dan ureuëng nyan hán jitem piôh jipeubuet jeuhet, jihnyan maté lagée ureuëng meudesya, teuma gata keudroe seulamat.

²⁰Meunyoe sidroe ureuëng nyang jroh jipeuphon peubuet desya, dan jihnyan Ulôn peuhadab deungon bahya, teuma jihnyan maté meunyoe gata hana tapeuingat jihnyan. Jihnyan maté sabab desya-desya jihnyan keudroe, dan buet-buet jih nyang jroh nyang ka jipeubuet hana Ulôn ingat. Teuma tanggong jaweueb ateueh maté ureuëng nyan Lôn tunggée nibak gata.

²¹Meunyoe ureuëng nyang jroh nyan gata peuingat mangat bék jipeubuet desya, dan jihnyan jiturot naseuhat gata, teuma jihnyan hana Lôn huköm dan gata seulamat."

²²Ulôn rasa teuga that TUHAN teuka dan ulôn deungoe Gobnyan geupeugah ubak ulôn, "Beudôh kheueh dan jak kheueh laju u pantôn. Disinan Ulôn keuneuk peugah haba deungon gata."

²³Dan ulôn jak kheueh u pantôn, dan disinan deuh lôn kalon cahya meukilat tanda teuka TUHAN lagée nyang ka lheueh lôn kalon bak binéh Krueng Kebar. Laju ulôn reubah teudugöm di ateueh tanoh,

²⁴teuma Roh Po teu Allah geutamong dan geupeudong ulôn. TUHAN meufeureuman ubak ulôn, "Tawoe kheueh dan takurong droe gata didalam rumoh.

²⁵He manusia fana, gata ji-ikat ngon talo sampoe hana hase tateubiet dan hana jeuet meurumpok deungon gob.

²⁶Ulôn Lôn peujeuet lidah gata kalu sampoe gata hana hase tapeuingat bansa peumbeurontak nyoe.

²⁷Teuma, meunyoe Lôn meututoe deungon gata lom dan Lôn peuwirang mangat gata hase meutoe lom, gata harôh tapeusampoe peue nyang Ulôn, TUHAN Nyang Mahamanyang peugah ubak awaknyan. Siladum nibak awaknyan jideungoe, teuma siladum teuk hana, sabab awaknyan keubit bansa nyang beurontak."

← Previous All Books Next →