Ezra 5

¹Nibak watéenyan na dua droe nabi, maséng-maséng nan nabi nyan Nabi Hagai dan Nabi Zakharia bin Ido, ban dua nabi nyan ka geupeuphon peugah haba ateueh nan Po teu Allah Israel ubak ureuëng Yahudi nyang na tinggai di Yehuda dan Yerusalem.

²Ban geudeungoe peusan dua droe nabi nyan Zerubabel bin Sealtiel dan Yesua bin Yozadak bagaih-bagaih jijak peudong lom Baét TUHAN di Yerusalem, geubantu lé bandua droe nabi nyan.

³Teuma Tatnai, gubunur propinsi Efrat-Barat, meusajan deungon Syetar-Boznai dan rakan-rakan awaknyan bagaih-bagaih jijak u Yerusalem dan jitanyong ubak ureuëng Yahudi, "Soe ureuëng nyang yue gata sampoe gata peudong dan gata peuleungkab Rumoh Iébadat nyoe?"

⁴Dan awaknyan jitanyong cit nan-nan ureuëng nyang ka jitulông peugöt Baét TUHAN nyan.

⁵Teuma Po teu Allah teutab geupeurati dan geulindong peumimpén-peumimpén Yahudi nyan, deungon nyan lé peujabat-peujabat Persia hana jipeukaru sigohlom awaknyan jikirém surat ubak Darius dan geuteurimong jeunaweueb jih.

⁶Nyoe kheueh laporan nyang awaknyan kirém ubak Raja.

⁷"Ukeue nyang mulia Raja Darius. Seumoga Teungku Amphon neumat peurintah deungon seujahteura!

⁸Kira jih Teungku Amphon neumaklum, bahwa kamoe ka kamoe jak u propinsi Yehuda, disinan kamoe kalon bahwa Baét TUHAN, Allah Nyang Raya, teungoh jipeudong lom deungon batée-batée nyang raya dan bintéh-bintéh beuton nyang meulapeh deungon kayée. Buet nyang jipeubuet bit-bit deungon that teuliti dan hana halangan sapeue.

⁹Óh lheuehnyan kamoe tanyong ubak peumimpén bansa nyan, soe nyang ka jok idhin ubak awaknyan keu jipeudong lom Rumoh Iébadat nyan dan jipeuleungkab óh sampoereuna.

¹⁰Meunan cit kamoe tanyong teuma nan-nan awaknyan mangat hase kamoe britée ubak Teungku Amphon soe mantong nyang jeuet keu ulée nibak buet nyan.

¹¹Jijaweueb lé awaknyan, 'Kamoe nyoe na kheueh hamba Po teu Allah nyang mat kuasa ateueh álam seumeusta. Kamoe teungoh kamoe peudong lom Baét TUHAN nyang teupeudong dan teupeuleungkab meuploh-ploh thon nyang ka lheueh lé sidroe raja Israel nyang agong.

¹²Teuma lé sabab indatu kamoe ka geupeumeureuka ubak Po teu Allah nyang mat kuasa di syeuruga, nyang kheueh sabab jih Gobnyan geuseurah awaknyan ubak keukuasaan Neubukadnezar, raja Babel nibak keuturonan Kasdim. Raja nyan ka geupeuhanco Baét nyan dan laju geuangkot bansa kamoe u Babel.

¹³Óh lheuehnyan Kores jeuet keuraja Babel dan nibak thon nyang phon lam peumeurintahan gobnyan, raja nyan laju geupeutreun peurintah mangat teupeudong lom Baét TUHAN nyan.

¹⁴Dan kon nyan mantong, banmandum peukakaih-peukakaih méuh dan pirak nyang teupeuguna di dalam Baét TUHAN jijok pulang meunan cit nyang geucok di Yerusalem lé Nebukadnezar laju geupeutamong u dalam kuil di Babel. Peukakaih-peukakaih nyan geubri lé Raja Kores keu ureuëng nyan nan jih Sesbazar, nyang ka geuangkat jeuet keugubunur Yehuda.

¹⁵Raja geuyue ubak gobnyan mangat jicok peukakaih-peukakaih nyan dan geuyue woe atra nyan u Baét TUHAN di Yerusalem, dan geuyue peudong lom Baét nyan.

¹⁶Dan teuka kheueh laju Sesbazar u Yerusalem, laju geupeuduek sandi Baét TUHAN nyan. Yoh phon watéenyan sampoe án jinoe peumbangunan Baét TUHAN nyan teutab hana jipiôh, teuma gohlom cit seuleusoe.'

¹⁷Meunyoe Teungku Amphon neubri idhin, kamoe usui mangat teuseulidek didalam surat arsib keurajeuen di Babel. Deungon na lagéenyan ka hase tateupeue peu kheueh beutôi na peurintah Raja Kores keu jipeudong lom Baét TUHAN di Yerusalem nyoe. Óh lheuehnyan kamoe lakée haba keuhai keuputosan Teungku Amphon keu peukara nyan."