Keujadian 13

18 verses

¹Brahim laju geutinggai nanggroe Meusé dan geujak laju u arah utara, geupeukeu u bagian seulatan Kanaan meusajan ngon peurumoh gobnyan meunan cit banmandum atra milék gobnyan, meunan cit deungon Lot geuba sajan.

²Brahim biet-biet ka jeuet keu ureuëng kaya; bak gobnyan na bubiri, kaméng, leumô, pirak dan méuh.

³Teuma geujak kheueh laju gobnyan nibak saboh teumpat u teumpat nyang laén, geutuju u Betel. Laju trok u daerah lamkawan Betel ngon Ai, bak teumpat keuramat teumpat yoh masa ilée gobnyan geupeudong khimah

⁴dan geupeudong miseubah. Bak teumpat nyan gobnyan geuseumah TUHAN.

⁵Lot na cit keuluwarga meunan cit deungon namiet dan bubiri, kaméng dan leumô na bak gobnyan.

⁶Sabab nyan tanoh nyang na disinan hana seb blang naleueng keu eumpeuen beulatang peulara awaknyan mandua, sabab beulatang peulara awaknyan jai lumpah na.

⁷Lam keuadaan nyang lagée nyan, ditukang rabe beulatang peulara Brahim ngon tukang rabe beulatang peulara Lot sabe lam karu dan meudakwa. (Bak watéenyan ureuëng Kanaan dan ureuëng Feris mantong tinggai bak tanoh nyan.)

⁸Geupeugah lé Brahim ubak Lot, "Tanyoe nyoe meusyedara, hana gét meunyoe ureuëng gata ngon ureuëng ulôn jimeudakwa.

⁹Sabab nyan, nyang gét jih tameuaseng. Gata piléh kheueh bagian toh tanoh nyoe nyang gata galak. Meunyoe gata cok nyang blah nyoe, ulôn cok nyang blah laén."

¹⁰Lot laju jingieng bansikeulileng nyan, dan deuh laju jingieng bahwa bansaboh Pantôn Yordan, sampoe trok u banda Zoar jai that ié jih, lagée Taman TUHAN atawa saban lagée tanoh nanggroe Meusé. (Meunan kheueh keuadaan jih sigohlom TUHAN geupeuhanco banda-banda Sodom dan Gomora.)

¹¹Akhé jih Lot geupiléh banmandum Pantôn Yordan nyan, dan geujak laju u bagian timu. Meunan kheueh akhé jih awaknyan bandua meuaséng.

¹²Brahim teutab tinggai di tanoh Kanaan, seudangkan Nabi Lot geupeudong khimah nibak banda-banda pantôn sampoe trok bak binéh Sodom.

¹³Banda Sodom nyan jiduek lé ureuëng-ureuëng nyang lumpah jeuhet dan meudesya ubak TUHAN.

¹⁴Óh ka leupah Nabi Lot geujak, TUHAN meufeureuman ubak Brahim, "Nibak teumpat gata dong nyan, gata ngieng kheueh beujroh-jroh ujeub-jeub arah;

¹⁵Ulôn teuma Lôn bri ubak gata dan ubak keuturonan gata banmandum tanoh nyang gata ngieng nyan mangat jeuet keu atra gata siumu masa.

¹⁶Ulôn teuma Lôn bri ubak gata keuturonan nyang lumpah le, sampoe hana meusidroepi nyang hase jikira keuturonan gata nyan. Pakriban ureuëng hana hase jikira abée bak tanoh, meunan kheueh keuturonan gata hana hase jikira.

¹⁷Jinoenyoe, gata tamong dan gata bloh kheueh bansaboh tanoh nyoe, sabab Ulôn teuma Lôn bri mandum nyan keugata."

¹⁸Óh lheueh nyan Brahim laju geupinah khimah-khimah gobnyan dan laju geutinggai teutab ubak binéh dumna bak kayée keuramat teumpat iébadat di Mamre to ngon Hebron, dan bak teumpat nyan gobnyan laju geupeudong miseubah keu TUHAN.

← Previous All Books Next →