Keujadian 25

30 verses

¹Nabi Ibrahim geumeukawen lom ngon sidroe inong nyang nan jih Ketura.

²Peurumoh geuhnyan jipeulahé teuma aneuëk-aneuëk nyang laén nyan nan jih na kheueh: Zimran, Yoksan, Medan, Midian, Isybak, dan Suah.

³Yoksan ayah Syeba dan Dedan, dan keuturonan Dedan na kheueh ureuëng Asyur, ureuëng Letus, dan ureuëng Leum.

⁴Aneuëk-aneuëk Midian na kheueh: Efa, Efer, Henokh, Abida, dan Eldaa. Awaknyan banmandum keuturonan Ketura.

⁵Bahpi Nabi Ibrahim geupeutreun banmandum hareuta geuh ubak Nabi Ishaq,

⁶yoh gobnyan mantong udeb le that-that geubri hadiah keu aneuëk-aneuëk geuh nyang laén nyang lahé nibak peurumoh-peurumoh gobnyan nyang laén. Óh lheueh nyan geuyue aneuëk-aneuëk geuhnyan u daerah bagian timu Kanaan, mangat jeuet jiôh nibak Nabi Ishaq, aneuëk gobnyan.

⁷Nabi Ibrahim meuninggai watée umu geuh ka tuha that, na kheueh 175 thon.

⁹Gobnyan laju geupeukubu lé aneuëk-aneuëk gobnyan, na kheueh Nabi Ishaq dan Nabi Ismail, lam Guha Makhpela nyang na bak ladang siblah utimu Mamre. Yoh masa dilée ladang nyan atra Efron bin Zohar, ureuëng Het,

¹⁰teuma ka geubloe lé Nabi Ibrahim bak ureuëng Het nyan. Sara, peurumoh Nabi Ibrahim, nyang teukubu bak teumpat nyan.

¹¹Óh ka lheueh Nabi Ibrahim meuninggai donya, Allah laju geubri beureukat ubak Nabi Ishaq, aneuëk Nabi Ibrahim. Nibak masanyan Nabi Ishaq tinggai bak binéh mon nyang teuboh nan "Gobnyan Nyang Kalon Ulôn."

¹²Nabi Ismail na kheueh aneuëk Nabi Ibrahim dan Hagar, inong nibak nanggroe Meusé, namiet Sara nyan.

¹³Nabi Ismail na geumeu aneuëk dua blaih droe nyang teupeugah disinoe meunurot urotan lahé jih: Nebayot, Kedar, Adbeel, Mibsam, Misyma, Duma, Masa, Hadad, Tema, Yetur, Nafis dan Kedma. Banmandum aneuëk-aneuëk nyan jeuet keu indatu dua blaih boh sukée bansa, dan gampông meunan cit nan khimah-khimah awaknyan teuboh nan meunurot nan-nan awaknyan.

¹⁷Nabi Ismail na meu-umu 137 thon bak watée gobnyan meuninggai donya.

¹⁸Keuturonan gobnyan tinggai bak daerah lamkawan Hawila dan Syur disiblaih utimu nanggroe Meusé rot jak u Asyur. Awaknyan udeb teuaseng nibak keuturonan Nabi Ibrahim nyang laén.

¹⁹Nyoe kheueh riwayat Nabi Ishaq aneuëk Nabi Ibrahim.

²⁰Nabi Ishaq ka meu-umu peuet ploh thon watée gobnyan meukawen ngon Ribka, adoe Laban, aneuëk Betuel, sidroe ureuëng Aram nibak Mesopotamia.

²¹Sabab Ribka hana meuteumé aneuëk, Nabi Ishaq laju geumeu doá ubak TUHAN keupeurumoh gobnyan. Dan TUHAN geudeungoe doá Nabi Ishaq, akhé jih Ribka mume.

²²Gobnyan mume aneuëk meukeumbeue, dan sigohlom aneuëk-aneuëk nyan lahé, aneuëk manyak nyan jimeuglueng-glueng lam pruet ma jih. Geupeugah lé Ribka lagée nyoe, "Pakon hainyoe harôh teujadi ateueh ulôn?" Laju geulakée peutunyok ubak TUHAN.

²³TUHAN meufeureuman ubak gobnyan, "Dua boh bansa na lam pruet gata; gata teuma tapeulahé dua boh bansa nyang saléng jimeumusoh; adoe jih leubeh teuga nibak aduen jih nyang tuha jipeutimang nyang tulot."

²⁴Trok kheueh watée jih nibak Ribka keu geupeulahé aneuëk, dan laju geupeulahé dua droe aneuëk agam meukeumbeue.

²⁵Nyang tuha hi jih mubayang-bayang mirah, dan kulét jih lagée bajée jubah nyang mubulée. Sabab nyan kheueh teuboh nan jih Esau.

²⁶Watée aneuëk nyang lumboi dua lahé, jaroe jih jimat tumet Esau. Sabab nyan kheueh jihnyan teuboh nan Yakub. Nabi Ishaq ka meu-umu nam ploh thon watée awaknyan lahé.

²⁷Bandua droe aneuëk nyan meutamah rayeuk. Esau jeuet keusidroe ureuëng nyang peulet beulatang juah nyang gagah dan beuhe dan galak that tinggai di padang, teuma Nabi Yakub ureuëng jih seungab dan galak tinggai di rumoh.

²⁸Nabi Ishaq leubeh geugalak ubak Esau, sabab Nabi Ishaq galak geupajoh eungkot sie beulatang kleut. Teuma Ribka leubeh geugalak ubak Nabi Yakub.

²⁹Bak siuroe watée Nabi Yakub teungoh geutaguen gulée kacang mirah, geuwoe kheueh Esau nibak teumpat geupeulet beulatang kleut. Gobnyan deuk lumpah na.

³⁰Laju geupeugah ubak Nabi Yakub, "Ulôn deuk that. Bie bacut kacang mirah nyan." (Nyang kheueh sabab jih gobnyan teupeugah Edom.

³¹Geujaweueb lé Nabi Yakub, "Gét, asai neubri keulon leubeh ilée hak droeneueh sibagoe aneuëk tuha."

³²Kheun Esau, "Hana kupako haknyan keu ulôn. Ulôn deuk lumpah na!"

³³Geupeugah lom lé Nabi Yakub, "Meusumpah kheueh ilée bahwa hak droeneueh nyan neubri ubak ulôn." Esau laju meusumpah dan geubri hak geuhnyan ubak Nabi Yakub.

³⁴Óh lheueh nyan lé Nabi Yakub laju geubri ubak awaknyan ruti dan siladum nibak gulée kacang mirah nyan. Esau laju geupajoh dan geujieb ié óh lheueh nyan laju geujak. Meunan kheueh Esau geupeubeuah hak gobnyan sibagoe aneuëk tuha.

← Previous All Books Next →