Keujadian 27

46 verses

¹Bak siuroe, watée Nabi Ishaq ka tuha dan mata geuh pih ka buta, laju geutawök Esau, aneuëk gobnyan nyang paleng tuha, dan geupeugah laju ubak aneuëk geuh nyan lagée nyoe, "Pat gata hei aneuëk lôn!" "Nyoepat ulôn, ayah," jaweueb Esau aneuëk geuhnyan.

²Geupeugah lé Nabi Ishaq, "Gata ka tateupeue bahwa ulôn nyoe ka tuha that dan bak dali adat hana treb le udeb lôn ateueh rhueng donya.

³Dan gata cok kheueh laju bede ngon panah-panah gata, tajak laju upadang dan gata peulet kheueh keu ayah saboh beulatang kleut.

⁴Óh lheueh nyan gata taguen kheueh bumangat lagée nyang ayah galak, lheuehnyan gata ba laju keunoe ubak ayah. Óh ka lheueh atranyan ayah pajoh, teuma ayah bri beureukat ayah ubak gata sigohlom ayah maté."

⁵Peue nyang geupeugah lé Nabi Ishaq ngon Esau nyan geudeungoe lé Ribka peurumoh gobnyan. Dan óh ka leupah Esau geujak let beulatang buih keu ayah gobnyan Nabi Ishaq nyan,

⁶geupeugah laju lé Ribka ubak aneuëk geuh Nabi Yakub, "Ban that ulôn deungoe ayah gata geupeugah ubak Esau lagée nyoe,

⁷'Jak let laju saboh beulatang dan taguen laju nyang mangat keu ulôn. Óh ka lheueh atranyan ulôn pajoh, teuma ulôn bri beureukat keu gata dikeue TUHAN, sigohlom ulôn maté.'

⁸Nyan, aneuëk lôn," geupeugah lom lé Ribka ubak aneuëk geuh Nabi Yakub nyan, "deungoe kheueh dan gata peubuet kheueh peue nyang ulôn peugah nyoe.

⁹Gata jak kheueh ubak teumpat bubiri geutanyoe, dan gata piléh laju dua boh aneuëk kaméng nyang teumbon-teumbon, mangat jeuet ulôn taguen lagée nyang geulakée lé ayah gata.

¹⁰Óh lheueh nyan gata ba laju ubak ayah gata mangat geupajoh, dan óh lheueh nyan gobnyan laju geubri beureukat ubak gata sigohlom gobnyan meuninggai donya."

¹¹Teuma Nabi Yakub laju geupeugah ubak ma geuh, "Mak, tuboh Esau mubulée seudangkan tuboh ulôn hana?

¹²Pat tateupeue ayah geuraba tuboh lôn dan laju geuteupeue bahwa tanyoe ka tapeungéut gobnyan; tatakot bukon beureukat nyang geubri, nyang geubri na kheueh kutokan."

¹³Geujaweueb lé ma geuh, "Bék picek até gata, hai aneuëk. Bah kheueh ulôn nyang tanggong meunyoe gata geukutok lé yah gata. Jak peubuet kheueh peue nyang ulôn yue, dan jakcok laju kaméng-kaméng nyang ulôn peugah nyan."

¹⁴Dan Nabi Yakub pih laju geujakcok kaméng-kaméng lagée nyang ka geupeugah lé ma geuhnyan dan óh ka lheueh atranyan geucok laju geuba ubak ma geuh, dan Ribka pih laju geutaguen gulée sie lagée nyang geuhawa lé Nabi Ishaq.

¹⁵Óh lheuehnyan Ribka laju geucok peukayan Esau nyang paleng gét, nyang na geukeubah dirumoh, peukayan nyan laju geupeungui ubak Nabi Yakub.

¹⁶Kulét aneuëk kaméng nyan laju geubalot bak taukue dan jaroe Nabi Yakub nyang hana mubulée nyan.

¹⁷Dan gulée nyang ka geutaguen mangat nyan laju geujok ubak Nabi Yakub meunan cit ngon ruti nyang ka lheueh geupeugét nyang rasa jih lumpah mangat.

¹⁸Óh lheuehnyan geujak kheueh Nabi Yakub ubak ayah geuh sira geupeugah, "Ayah!" "Nyoepat lôn neuëk" seuot ayah geuh, "soe gatanyan Esau atawa Nabi Yakub?"

¹⁹Geujaweueb Nabi Yakub, "Esau yah, aneuëk ayah nyang tuha; peue nyang ayah peusan ka ulôn peubuet. Ayah duek kheueh dan ayah pajoh kheueh eungkot sie hase lôn peulet nyoe nyang ka ulôn mita keu ayah, mangat ayah jeuet neubri beureukat ateueh ulôn."

²⁰Geupeugah lé Nabi Ishaq, "Bagaih that gata teumé hei aneuëk ayah." Geujaweueb Nabi Yakub, "Sabab TUHAN Allah nyang ayah seumah ka geutulông ulôn."

²¹Laju geupeugah lé Nabi Ishaq ubak Nabi Yakub, "Gata peurab kheueh keunoe mangat jeuet lôn geue gata. Peu kheueh beutôi gata Esau?"

²²Nabi Yakub laju geupeurab ubak ayah geuh sira geuraba óh lheueh nyan laju geupeugah, "Su gata lagée su Nabi Yakub, teuma jaroe gata lagée jaroe Esau."

²³Nabi Ishaq hana geuturi keu Nabi Yakub sabab jaroe geuhnyan mubulée lagée jaroe Esau. Teuma bak watée Nabi Yakub keuneuk geubri beureukat,

²⁴gobnyan mantong geutanyong sigo teuk, "Peu kheueh beutôi gata Esau?" "Beutôi, ayah," jaweueb Nabi Yakub.

²⁵Laju geupeugah lé Nabi Ishaq, "Ba keunoe eungkot sie nyan. Óh ka lheueh ulôn makheun barô kheueh ulôn bri beureukat ubak gata." Nabi Yakub laju geubri eungkot sie nyan keu ayah geuh meunan cit ié anggô geubri bacut mangat geujieb.

²⁶Dan geupeugah kheueh laju lé ayah geuhnyan ubak gobnyan, "Peurab kheueh keunoe leubeh to lom, Neuëk, dan gata cöm kheueh ulôn."

²⁷Watée Nabi Yakub geupeurab keuneuk geukeucob ayah geuh nyan, Nabi Ishaq laju mubée peukayan Esau, dan laju geubri beureukat ubak gobnyan. Geupeugah lé Nabi Ishaq, "Bée nyang mangat nibak aneuëk lôn lagée bée padang nyang ka geubri beureukat lé TUHAN.

²⁸Seumoga Allah geubri keu gata iémbon di langét, dan geupeujeuet lampôh-lampôh ngon ladang gata subô! Seumoga Gobnyan geubri keu gata gandom dan anggô nyang meulimpah-limpah!

²⁹Seumoga banmandum bansa jeuet keunamiet gata, dan sukée-sukée bansa taklok ubak gata. Seumoga gata takuasa banmandum waréh kawöm gata, dan keuturonan ma gata jisujut dikeue gata. Dan teukutok kheueh mandum ureuëng nyang kutok gata dan geubri beureukat kheueh banmandum ureuëng nyang geubri beureukat ubak gata."

³⁰Bansagai lheueh Nabi Ishaq geubri beureukat ubak Nabi Yakub, Nabi Yakub pih laju geujak, Esau, aduen gobnyan ka geuwoe nibak ceumeucrok beulatang kleut.

³¹Meunan cit gobnyan laju geutaguen gulée nyang mangat dan geuba laju ubak ayah geuhnyan, sira geupeugah lagée nyoe, "Neuduek kheueh ayah, dan neupajoh kheueh eungkot sie nyang ka ulôn ba keu ayah, mangat ayah jeuet neubri beureukat keu ulôn."

³²"Soe kah nyoe?" geutanyong lé Nabi Ishaq. "Esau aneuëk ayah nyang tuha," jaweueb Esau.

³³Nabi Ishaq ka teuka yo bansaboh tuboh geuh, dan gobnyan laju geutanyong, "Meunyoe meunan, soe nyang ka jimita beulatang dan jibri keu ulôn bunoe? Atranyan ka lheueh ulôn pajoh sigohlom gata teuka. Dan beureukat ulôn nyang paleng akhé ka ulôn bri keu jihnyan, dan jinyoe beureukat nyan ka jeuet keumilék jih siumu masa."

³⁴Watée geudeungoe hainyan lé Esau, gobnyan laju geumo ngon su meuleungkeng dan até geuh that peudeh, sira geupeugah lom, "Neubri cit ulôn beureukat, hei ayah!"

³⁵Nabi Ishaq geupeugah lom, "Adoe gata ka jijak keunoe dan jipeungéut ulôn. Jihnyan ka jicok beureukat nyang sibeutôi jih atranyan ulôn bri keugata."

³⁶Geupeugah lé Esau, "Nyoe kali keudua jipeungéut ulôn. Pantaih nan jih Yakub. Jihnyan ka jicok hak ulôn sibagoe aneuëk tuha, dan jinoenyoe ka jicok teuma beureukat nyang sibeutôi jih atra ulôn. Peu kheueh ayah hana le beureukat nyang laén keu ulôn?"

³⁷Geujaweueb lé Nabi Ishaq, "Ulôn ka lôn peujeuet jih nyan amphon gata, dan banmandum waréh kawöm jih ka ulôn peujeuet keu namiet jih. Ulôn ka lheueh ulôn bri bak jihnyan gandom dan anggô. Jinoenyoe hana sapeuena le nyang ulôn bri keu gata, Neuëk!"

³⁸Esau teutab hana geutem piyoh geulakée sabe ubak ayah gobnyan, "Peu kheueh bak ayah nyang na cit saboh sagai beureukat? Neubri kheueh teuma beureukat nyan ubak ulôn, Ayah!" Dan Esau pih laju geumo lom teuma.

³⁹Óh lheuehnyan Nabi Ishaq geupeugah ubak Esau, "Hana le ié mbon nyang jitreun nibak langét keu gata hei aneuëk lôn, hana teuma lampôh nyang subô keu gata.

⁴⁰Gata teuma udeb bak mata peudeueng gata, teuma jeuet keu namiet adoe gata, teuma meunyoe gata tabrontak, gata teuma beubaih nibak kuasa jih."

⁴¹Teuma Esau laju geubanci ubak Nabi Yakub sabab ayah gobnyan ka geubri beureukat nyan ubak adoe geuh. Laju teuka pikeran geuh, "Hana treb le ayah ka meuninggai donya dan óh ka lheueh ulôn meukabông, Nabi Yakub teuma ulôn poh maté!"

⁴²Watée geudeungoe lé Ribka reuncana Esau nyan, laju geuyue tawok Nabi Yakub sira geupeugah lagée nyoe, "Deungoe mak peugah, aduen gata Esau na niet keuneuk balaih dam ateueh gata dan ka jireuncana jikeuneuk poh maté gata.

⁴³Jinoenyoe peubuet kheueh peue nyang ulôn peugah nyoe. Gata jak laju bubagaih keudeuh ubak Laban aduen ulôn di Haran,

⁴⁴dan gata tinggai kheueh ngon gobnyan keu meupadub watée treb jih, sampoe beungéh aduen gata nyan seungab

⁴⁵dan laju jipeutuwoe peue nyang ka gata peubuet ateueh jihnyan. Óh lheuehnyan ulôn teuma lôn yue ureuëng laén mangat jipuwoe gata urumoh nyoe lom. Ulôn hán lôntem aneuëk ulôn gadôh bak uroe nyang sa."

⁴⁶Dan geupeugah kheueh lé Ribka ubak Nabi Ishaq, "Ulôn geungeuen dan gundah that watée ulôn ngieng akai peurumoh-peurumoh Esau nibak sukée bansa laén nyan. Meunyoe Nabi Yakub jimeukawen cit ngon aneuëk dara Het, leubeh gét ulôn maté."

← Previous All Books Next →