Keujadian 9

29 verses

¹Allah laju geubri beureukat ubak Nabi Nuh meunan cit ngon aneuëk-aneuëk gobnyan sira geupeugah lagée nyoe, "Meu aneuëk cucoe kheueh nyang le, mangat keuturonan gata jeuet jitinggai bansigom bumoe.

²Banmandum cicém dan eungkot meunan cit ngon beulatang-beulatang laén teuma jitakot ubak gata. Beulatang nyan banmandum na lam keukuasaan gata.

³Banmandum nyan jeuet gata cok keupeunajoh gata, meunan cit ngon seunaman nyang ijo jitimoh; banmandum nyan Ulôn bri ubak gata mangat jeuet keupeunajoh gata.

⁴Sapeue nyang hán jeuet sagai-sagai gata pajoh na kheueh eungkot sie nyang mantong meudarah, sabab nyawöng nyan na lam darah.

⁵Soe mantong ureuëng dan beulatang nyang jipoh maté manusia teuma Lôn huköm maté.

⁶Manusia teucebta saban lagée Ulôn; sabab nyan, soemantong nyang poh maté manusia, ureuëng nyan keudroe teuma jipoh maté cit lé manusia.

⁷Nyoe, gata harôh meu-aneuëk cucoe nyang le, mangat keuturonan gata jeuet jitinggai bansigom bumoe."

⁸Allah meufeureuman ubak Nabi Nuh dan aneuëk-aneuëk gobnyan lagée nyoe,

⁹"Jinoenyoe Ulôn peugét janji ngon gata dan mandum keuturonan gata,

¹⁰dan deungon banmandum makhluk nyang udeb, na kheueh cicém-cicém dan beulatang darat, mandum nyang teubiet lam kapai nyan meusajan-sajan ngon gata.

¹¹Nyoe kheueh janji Ulôn ngon gata: Ulôn peujanji bahwa banmandum makhluk nyang udeb hana le jipeubinasa lé ié raya. Hana le ié raya nyang jipeubinasa bumoe nyoe.

¹²Sibagoe tanda nyang keukai, nyang Ulôn peugét ngon gata dan ngon banmandum makhluk nyang udeb,

¹³teuma Ulôn keubah peulangi Lôn lam awan sibagoe tanda janji Ulôn ngon donya nyoe.

¹⁴Tieb-tieb watée, meunyoe Ulôn tob langét ngon awan, peulangi nyan laju deuh teukalon,

¹⁵Ulôn teuma Lôn ingat janji Lôn ubak gata dan ubak mandum makhluk nyang udeb, bahwa ié raya hana le jipeubinasa makhluk nyang udeb.

¹⁶Meunyoe ka deuh teukalon peulangi lam awan, Ulôn teuma Lôn ngieng nyan dan Lôn ingat janji nyang keukai Ulôn ngon mandum makhluk nyang udeb ateueh rhueng bumoe.

¹⁷Nyan kheueh tanda janji Lôn nyang Ulôn bri ubak banmandum makhluk nyang udeb ateueh bumoe nyoe."

¹⁸Aneuëk-aneuëk Nabi Nuh nyang teubiet lam kapai nyan na kheueh Sem, Yafet dan Ham. (Ham na kheueh ayah Kanaan.)

¹⁹Ban lhée droe aneuëk Nabi Nuh nyan kheueh indatu banmandum manusia nyang na ateueh rhueng donya.

²⁰Nabi Nuh buet geuh tieb-tieb uroe na kheueh meulampôh, dan gobnyan kheueh nyang phon-phon that peugét lampôh anggô.

²¹Óh lheueh geujieb ié anggô lé Nabi Nuh, gobnyan pih mabök. Geusuet banmandum peukayan nyang na bak tuboh geuh dan lam keuadaan teulon lagée nyan laju geuéh lam khimah geuh.

²²Watée Ham, ayah Kanaan nyan, jingieng ayah jih lam keuadaan teulon, laju jiteubiet dan jijak peugah laju hainyan ubak bandua droe syedara jih nyang laén.

²³Óh lheueh nyan Sem ngon Yafet laju geucok siôn bajée jubah laju jileueng bak bahô awaknyan. Sira jijak ngon jisurot awaknyan jitamong laju lam khimah ngon jubah nyan laju jipeulimbot ayah jih. Muka awaknyan jipaleng holaén mangat bék jikalon ayah jih teulon lagée nyan bagoe.

²⁴Óh ka Nabi Nuh geutée droe hana le mabök dan geuteupeue peue nyang ka jipeubuet ateueh geuh lé aneuëk tulot geuhnyan teuhadab droe gobnyan,

²⁵laju geupeugah, "Teukutok kheueh Kanaan! Jihnyan teuma jeuet keu namiet nyang hina keu syedara-syedara jih.

²⁶Pujoe kheueh TUHAN, Allah Sem! Kanaan teuma jeuet keu namiet Sem.

²⁷Seumoga Po teu Allah teuma geutamah geubeureukat keu Yafet deungon geupeuluwah teumpat jih tinggai. Seumoga keuturonan jih tinggai meusajan-sajan ngon keuturonan Sem. Kanaan teuma jeuet keu namiet Yafet."

²⁸Óh ka lheueh ié raya nyan, Nabi Nuh mantong na udeb 350 thon teuk.

²⁹Gobnyan meuninggai donya lam umu 950 thon.

← Previous All Books Next →