Nabi Yesaya 21

17 verses

¹Nyoe kheueh peusan keuhai Babel: Lagée su angén badée nyang meusié-sié jipupöt di padang pasi, meunan kheueh watée teuka beuncana di nanggroe nyang dahsyat.

²Ulôn meuteumé keumalon keuhai keujadian-keujadian nyang lumpah teumakot; keuhai peukhianatan dan peumbinasaan. Maju kheueh, hei sipa-i Elam, sureubu kheueh! Hei sipa-i Madai, keupông kheueh! Po teu Allah geupeuseuleusoe bandum peundeuritaan nyang jipeusabab lé Babel.

³Deungon na keumalon nyan sampoe jeuet ulôn bingong ka hana deuh lôn meungieng atawa teudeungoe sapeue. Ulôn teumakot that dan sakét lumpah na, lagée sidroe ureuëng inong nyang teungoh meulahé aneuëk.

⁴Até ulôn geulisah ngon apoh apah; deungon rasa hayut sampoe ulôn yo meugám-gám. Malam nyang ulôn meucén teuma teuba ubak teumakot.

⁵Meunan cit ulôn kalon khanuri peujamé nyang ka jipeusiab; teumpat duek keumandum undangan pih ka teukeubah. Awaknyan laju jimakheun deungon jijieb ié. Hana teusangka-sangka teudeungoe peurintah: "Hei bubena peuwira! Peusiab laju peurisée gata!"

⁶Laju TUHAN meufeureuman ubak ulôn, "Tajak peuduek laju sidroe ureuëng jaga dan tayue jihnyan meulapor peue nyang ka jikalon.

⁷Meunyoe jihnyan na jikalon pasokan meuguda teuka meudua-dua, pasokan nyang duek ateueh keuleudée dan unta, nyan harôh tangieng beugét-gét."

⁸Óh lheuehnyan ureuëng jaga nyan jitawök, "Teungku, ulôn ka lôn meujaga tieb-tieb uroe, uroe ngon malam."

⁹Kalon, jehpat, nyan kheueh awaknyan! Pasokan meuguda nyang teuka meudua-dua. Óh lheueh nyan di ureuëng jaga nyan laju jipeugah, "Babel ka rhot! Patong-patong nyang jipuja lé awaknyan ka habéh hanco meutabu beba ateueh tanoh."

¹⁰Bansa ulôn Israel! Gata ka jigilo-gilo dan jibloh-bloh lagée aneuk-aneuk gandom. Jinoenyoe ulôn peusampoe ubak gata haba jroh nyang ulôn deungoe nibak TUHAN Nyang Mahakuasa, Allah Israel.

¹¹Nyoe kheueh peusan keuhai Edom. Na ureuëng teumawök ubak ulôn di Edom, "Hei, ureuëng meujaga, peu kheueh mantong treb malam nyoe? Padub jeuem teuk sigohlom beungoh?"

¹²Jaweueb ulôn, "Beungoh jiteuka, teuma meunan cit deungon malam. Meunyoe keuneuk teumanyong, teuka kheueh tatanyong lom."

¹³Nyoe kheueh peusan keuhai Arab: Hei, ureuëng Dedan, kafilah-kafilah gata jipeudong khimah lam tamah meupaya tanoh Arab.

¹⁴Hei peunduduek tanoh Tema, tabri kheueh ié jieb keu ureuëng-ureuëng nyang graih nyang jijak ubak gata, dan tabri kheueh peunajoh keu ureuëng meungungsi.

¹⁵Sabab awaknyan ka jipeuplueng droe nibak mata peudeueng nyang ka teusut lam sarong, nibak busur nyang ka teulentur, dan nibak prang nyang teungoh meuhubô.

¹⁶Laju TUHAN meufeureuman ubak ulôn, "Paih sithon teuk keujayaan sukée-sukée Kedar teuma habéh.

¹⁷Ureuëng-ureuëng Kedar nyang mat aneuk panah na kheueh ureuëng nyang paleng peukasa. Teuma cibacut sagai nibak awaknyan nyang na seulamat. Ulôn, TUHAN Allah Israel ka Lôn peugah haba."

← Previous All Books Next →