Nabi Yesaya 4

¹Bak watée nyan na tujoh droe ureuëng inong teuma jimat sidroe ureuëng agam sira jipeugah, "Neupeu idhin kheueh keukamoe meungaku bahwa droeneueh nyoe sibagoe lakoe kamoe, mangat kamoe hana meutanggong ayeb ngon malée kareuna hana kamoe meukawen. Peunajoh dan peukayan jeuet kamoe tanggong keudroe."

²Teuma trok watée jih TUHAN geupeujeuet tieb-tieb seunaman dan bak kayée jitimoh sampoe rayeuk dan indah di nanggroe nyoe. Nibak uroenyan ureuëng Israel nyang seulamat meurasa geumbira dan bangga sabab le hase panen jihnyan.

³Tieb-tieb ureuëng nyang na teutinggai di Yerusalem, ureuëng-ureuëng nyang geupiléh lé Po teu Allah keu teupeuseulamat, ureuëng nyan teuma teupeugah suci.

⁴Deungon kuasa Gobnyan, TUHAN geupeusidang dan geupeumurni umat Gobnyan. Gobnyan geupeugléh Yerusalem nibak darah ureuëng-ureuëng nyang teupoh di banda nyan.

⁵Laju di ateueh Bukét Sion dan banmandum ureuëng nyang meusapat disinan TUHAN laju geupeujeuet awan yoh watée uroe, meunan cit deungon asab dan hu trang óh watée malam. Po teu Allah keudroe deungon kuasa Gobnyan teuma geupeupayong bansaboh banda nyan.

⁶Gobnyan teuma geupeupayong nibak mata uroe criet óh watée uroe, dan geupeujeuet nyan teumpat meuceu watée ujeuen raya dan angén badée.