Nabi Yesaya 45

25 verses

¹TUHAN ka geupiléh Kores jeuet keu raja; gobnyan geutunyok mangat hase jipeutaloe bansa-bansa dan keujiwiet keukuasaan raja-raja. TUHAN geupeuhah pintoe-pintoe geureubang keu gobnyan, hana meusaboh pih nyang tinggai teutôb. Ubak gobnyan TUHAN meufeureuman,

²"Ulôn kupeusiab rot keu gata; gunong dan bukét Lôn peurata, pintoe-pintoe teumaga Ulôn peuhanco, dan palang-palang beuso Ulôn wiet.

³Dan keu gata Ulôn bri hareuta keukayaan nyang mantong teusöm, mangat gata tateupeue bahwa Ulôn kheueh, TUHAN, Allah Israel, nyang ka tawök gata deungon nan gata.

⁴Gata Ulôn tawök dan Ulôn boh nan gala, bahpi gata hana taturi Ulôn. Lôn bri tugaih keugata tatulông bansa Israel hamba Ulôn, sabab awaknyan bansa nyang Ulôn piléh.

⁵Ulôn kheueh TUHAN, hana nyang laén, Ulôn nyoe Po teu Allah Nyang Mahaesa. Keu gata ka Lôn bri sinjata, bahpi gata hana taturi Ulôn.

⁶Banmandum nyang Ulôn peubuet nyan mangat phon di timu sampoe u barat mandum ureuëng jiteupeue bahwa Ulôn kheueh TUHAN, hana ilah nyang laén seu laén Ulôn.

⁷Ulôn kheueh nyang peujeuet trang dan seupôt, Ulôn nyang peuteuka beureukat dan bala. Ulôn kheueh TUHAN nyang peubuet banmandum nyan.

⁸Di ateueh langét Ulôn peutron nyang meunang lagée ujeuen, bumoe jipeuhah droe keu jiteurimong ié ujeuen nyan, laju jipeutimoh keuseulamatan dan keubeubaihan; dan Ulôn TUHAN nyang peujeuet nyan sampoe teujadi."

⁹Ceulaka kheueh ureuëng nyang jimeubantah deungon peucebta jihnyan; jihnyan lagée beulangong nyang lawan ureuëng nyang peugöt jihnyan. Peu kheueh tanoh kliet nyan jitanyong ubak ureuëng nyang peugét beulangong nyan, "Peue nyang teungoh neupeubuet nyan?" Peu kheueh beulangong nyan apoh apah bahwa nyang peugét jihnyan hana jeuet sapeue?

¹⁰Ceulaka kheueh ureuëng nyang jipeugah ubak ureuëng syiek jih, "Pakon ulôn nyoe geupeulahé lagée nyoe bagoe?"

¹¹TUHAN, Po teu Allah Kudus Israel meufeureuman, "Tanyong kheueh ubak Ulôn keuhai masa ukeue gata. Teuma bék tatanyong keuhai aneuëk-aneuëk Ulôn, atawa tayue ubak Ulôn teupeugét sapeue-sapeue.

¹²Ulôn kheueh TUHAN nyang peujeuet bumoe, dan nyang cebta manusia mangat jiduek di ateueh bumoe nyan. Deungon kuasa Ulôn laju Lôn leueng langét, dan Lôn peurintah bak mata uroe, bak buleuen dan bak mandum bintang-bintang.

¹³Ulôn kheueh nyang peugrak Kores mangat jipeubuet meukeusut Ulôn dan jipeudong keuadelan. Ulôn kupeurata banmandum jalan nyang jijak. Gobnyan geupeudong lom banda Ulôn Yerusalem dan geupeuleueh umat Ulôn nyang teutawan, hana teusuab dab hana teuma teubayeue." TUHAN Nyang Mahakuasa ka geupeugah haba.

¹⁴TUHAN meufeureuman ubak Israel, "Gatacok kheueh keudroe hase seunaman tanoh Meusé dan laba nibak nanggroe Sudan. Ureuëng-ureuëng Syeba nyang beuhe ngon gagah jeuet keu hakmilék gata; Awaknyan jijak dilikot gata deungon jaroe teubeuleunggu. Awaknyan jisujut dan meungaku; 'Po teu Allah beutôi-beutôi na lamkawan gata; hana ilah laén seulaén Gobnyan!

¹⁵Po teu Allah nyang peuseulamat Israel na kheueh Allah nyang geusöm droe.

¹⁶Banmandum ureuëng nyang jipeugét patong beurala; teuma geupeumalée dan geuhina.

¹⁷Teuma Israel geupeuseulamat lé TUHAN; keuseulamatan awaknyan teutab meuteun. Gata hana geupeumalée dan jihina sampoe siumu masa.' "

¹⁸TUHAN kheueh nyang cebta langét, Gobnyan kheueh Po teu Allah! Gobnyan kheueh nyang peujeuet dan nyang bentuek bumoe, nyang peujeuet bumoe nyan khong ngon kukoih dan teutab teudong. Gobnyan hana geupeujeuet teumpat nyang seungue seunyab, teuma teumpat keuteumpat tinggai. Gobnyan kheueh nyang peugah haba, "Ulôn kheueh TUHAN, dan hana TUHAN nyang laén seulaén Ulôn.

¹⁹Ulôn hana Lôn peugah haba deungon seungab-seungab, atawa seucara rahsia. Ulôn hana Lôn yue umat Ulôn Israel jijak mita Ulôn deungon peucuma. Ulôn, TUHAN, Lôn peugah haba nyang beuna, dan nyang bri tée peue-peue nyang beutôi."

²⁰TUHAN meufeureuman, "Meugumpôi kheueh dan teuka kheueh meusajan-sajan, gata banmandum nyang hana keunong lamkawan bansa-bansa! Bangai that ureuëng nyang jiseuôn-seuôn patong kayée, dan meudoá ubak dewa-dewa nyang hana hase jipeuseulamat jihnyan.

²¹Ba laju peukara gata, peugah laju bukeuti-bukeuti jih, dan, bah kheueh awaknyan jimeupakat meusajan-sajan. Soe kheueh nyang peugah hai nyan dan nyang bri tée phon yoh masa ilée? Peu kheueh kon Ulôn, TUHAN? Hana ilah nyang laén, seulaén Ulôn. Ulôn kheueh Po teu Allah nyang ade nyang bri seulamat, hana nyang laén seulaén Ulôn!

²²He, banmandum ureuëng nyang tinggai di ateueh bumoe, meupaleng kheueh ubak Ulôn mangat gata Lôn peuseulamat, sabab Ulôn nyoe Po teu Allah, hana nyang laén!

²³Ulôn ka Lôn meujanji, dan janji Ulôn nyan hana bateue; deumi Ulôn keudroe Ulôn meusumpah: Tieb-tieb ureuëng nyang jimeuteuôt dikeue Ulôn, dan lam basa jih nyan keudroe meujanji seutia ubak Ulôn.

²⁴Ureuëng ramé teuma jipeugah, 'Keuadelan dan teunaga na nibak TUHAN!' Banmandum ureuëng banci keu Ulôn ureuëng nyan jijak ubak Ulôn dan laju meuteumé malée.

²⁵Teuma keuturonan Nabi Yakub teupeuseulamat, dan awaknyan jipujoe Ulôn, TUHAN.

← Previous All Books Next →