Nabi Yesaya 59

20 verses

¹Bék tapike TUHAN leumoh that keu geupeuseulamat gata, atawa kroe that hana geudeungoe meulakée gata.

²Sabab buet gata nyang jeuhet nyan kheueh lé Gobnyan hana geudeungoe watée gata meudoá ubak Gobnyan. Desya-desya gata kheueh nyang peujiôh gata nibak Po teu Allah.

³Gata salah sabab meusulet dan tapeubuet jeuhet, dan tapeubuet keukeurasan dan tapoh ureuëng sampoe maté.

⁴Gata tagadu peukara hana alasan dan tameuhakém deungon hana ade. Gata meusulet dan tapeuandal nyang sia-sia; gata tapeugét reuncana keu tapeuceulaka ureuëng laén dan tapeubuet buet nyang jeuhet.

⁵Reuncana-reuncana gata nyang jeuhet teuba mawöt lagée boh uleue meubisa. Meunyoe boh uleue nyan teupeubeukah, jiteubiet kheueh uleue lam boh nyan. Reuncana nyan meubacut pih hana meuguna nibak gata, lagée peukayan nyang teuteunun lam uempueng laba-laba!

⁷Gata hana piôh-piôh tareuncana nyang jeuhet, dan meuhéut deungon bagaih teulaksana. Hana ragu-ragu laju gata poh maté ureuëng-ureuëng nyang hana meusalah. Ho mantong nyang gata jak, gata ka tatinggai nyang reuloh-reuloh dan keubinasaan.

⁸Gata hana tauseuha udeb nyang rukon, dan bandum buet gata hana nyang ade. Rot gata meupalet-palet, dan ureuëng nyang seutôt rot gata nyan hana mubahgia.

⁹Bansa nyan jipeugah ubak Po teu Allah, "Jinoenyoe ka kamoe teupeue pakon Droeneueh hana neupeuseulamat kamoe nibak ureuëng-ureuëng nyang tindéeh kamoe. Kamoe mupreh-preh peungéuh, teuma nyang na seupôt tulo.

¹⁰Kamoe meuraba-raba lagée ureuëng buta; cot uroe timang kamoe meugantoh lagée teungoh malam; lamkawan ureuëng udeb kamoe lagée ureuëng maté.

¹¹Kamoe teumakot that dan seudeh hana teukira; kamoe jak mita keuadelan; teuma teutab hana; kamoe meuharabkan keuseulamatan, teuma teutab sia-sia.

¹²Lumpah that le keujeuhetan kamoe ubak Droeneueh; desya-desya kamoe teupeusalah kamoe. Kamoe bit-bit that kamoe sadar keujeuhetan nyang kamoe peubuet, dan kamoe teupeue desya-desya kamoe.

¹³Kamoe kamungkie dan beurontak ubak TUHAN, dan hana kamoetem seutôt Po teu Allah kamoe. Kamoe ka kamoe tindéeh ureuëng laén dan ka meunyeuleweng; pikeran kamoe sisat, dan tutoe haba kamoe sulet.

¹⁴Huköm nyang ade ka teukireueh, dan keuadelan ka teupeujiôh. Keujujoran ka jipeubeuáh lamkawan ramé, dan keutulosan ka jitiek bak binéh.

¹⁵Hana le ureuëng nyang jujoe, dan soe nyang peujiôh bak buet nyang jeuhet, jihnyan keudroe ka jeuet keu keureubeuen keujeuhetan." TUHAN ka geukalon, dan Gobnyan hana galak ubak keuadelan nyang ka hana le.

¹⁶Gobnyan hireuen bahwa hana nyang teuka dan hana teuma nyang bila. Dan Gobnyan laju geupeuguna kuasa Geuh keudroe keu geupeuseulamat dan geubri keu awaknyan keumeunangan.

¹⁷Gobnyan geupeuguna keuadelan dan keuseulamatan sibagoe bajée beuso dan tupi waja. Gobnyan kana teukat keu geupeupuléh keuadaan dan geubalaih keuhana adelan.

¹⁸Gobnyan geubalaih musoh-musoh Geuh nyang sisuai deungon buet awaknyan keudroe. Meunan cit bansa-bansa nyang na di pulo-pulo nyang jiôh hana geutinggai nibak keunong huköm Gobnyan.

¹⁹Kuasa dan keuagongan Gobnyan teuma jitakot lé soemantong ureuëng phon ditimu meunan cit di barat. Gobnyan teuma teuka lagée ié krueng nyang tajam ji ile nyang jipeuteuka lé angén badée raya.

²⁰TUHAN meufeureuman ubak umat Gobnyan, "Ulôn teuma teuka u Yerusalem Ulôn jak peuseulamat gata bandum nyang meutobat nibak desya-desya gata.

²¹Ulôn peugét peujanjian deungon gata: Gata Ulôn bri kuasa Lôn dan ajaran Ulôn keu siumu masa. Peurunoe kheueh ubak aneuëk-aneuëk gata mangat awaknyan pih jeuet jipeurunoe tron meutron phon saát nyoe trok siumu masa."

← Previous All Books Next →