Nabi Yeremia 46

26 verses

¹TUHAN Meufeureuman ubak ulôn keuhai bansa-bansa,

²teupuphon deungon Meusé. Gobnyan geubri tée ubak ulôn keuhai sipa-i Nekho raja Meusé, nyang jipeutaloe di Karkemis bak binéh Krueng Efrat lé Nebukadnezar raja Babel bak thon nyang keupeuet keurajeuen Yoyakim, raja Yehuda. Nyoe kheueh nyang geupeugah lé TUHAN keuhai nyan,

³"Peuwira-peuwira Meusé laju jidumpék siaga ubak pasokan jih, 'Asah laju kapak! Sök laju bajée beuso dan kupiah baja! Peusiab laju peurisai dan tatamong laju lam baresan! Gata, pasokan meuguda, peungui laju peulana! Pasang laju ateueh rhueng guda gata, dan jak laju maju ngaza u mideuen prang!'

⁵Teuma, Ulôn, TUHAN, Lôn kalon awaknyan jisurot ngon teumakot. Sipa-i-sipa-i awaknyan habéh teupeutaloe, dan laju jiplueng sira ngon teumakot hana jingieng meubacut pih ulikot.

⁶Nyang lisek hana hase jipeuplueng droe, dan nyang peukasa hana tinggai nibak musoh. Awaknyan meu antok dan reubah di utara, dan bak binéh Krueng Efrat nyan keudroe.

⁷Soe kheueh ureuëng nyan nyang ji ék lagée Krueng Nil, lagée krueng nyang ji ék ié beuna sampoe bak binéh? Nyan kheueh nanggroe Meusé. Jipeugah lé gobnyan, 'Ulôn lôn beudôh dan Lôn kuasa bumoe. Ulôn peubinasa banda-banda meunan cit ngon peunduduek disinan.

⁹Kah plueng kheueh, he guda! Meugrak kheueh, he geuritan! Maju kheueh, he pahlawan nyang ba peurisai di Sudan dan Libia. Meunan cit deungon gata, he nyang akhli-akhli timbak aneuk panah nibak nanggroe Lidia.' "

¹⁰Teuma, ulôn, Yeremia lôn peugah, nyoe kheueh uroe TUHAN Allah Nyang Mahamanyang dan Mahakuasa; bak uroe nyan gobnyan geutueng bila ateueh banmandum musoh-musoh Gobnyan. Peudeueng Gobnyan geucang awaknyan sampoe óh troe, dan geujieb darah awaknyan sampoe án puih. Nibak uroenyoe TUHAN Nyang Mahakuasa, geusie keureubeuen-keureubeuen Gobnyan di utara, nibak binéh Krueng Efrat nyan.

¹¹He peunduduek Meusé, tajak kheueh u Gilead keu tajak mita ubat! Teuma, bahpi lagée nyan hana ubat nyang hase jipeupuléh gata.

¹²Keuadaan gata nyang lumpah malée nyan ka jiteupeue lé bansa-bansa. Su dumpék gata teudeungoe bansigom donya. Sidadu nyang sidroe meugantoh bak sidadu nyang laén; akhé jih bandum awaknyan reubah meujo-jo di ateueh bumoe.

¹³Watée Nebukadnezar raja Babel geujak prang nanggroe Meusé, TUHAN meufeureuman ubak ulôn, kheun Gobnyan,

¹⁴"He Yeremia, peumaklum kheueh laju haba nyoe lom di banda-banda nanggroe Meusé, na kheueh di Memfis, Migdol dan Tahpanhes, 'Meusiab kheueh keu teupeuteun droe sabab banmandum hareuta gata geupeu habéh lam prang raya!

¹⁵Pakon Apis, dewa gata nyang teuga nyan ka jipeu plueng droe? Sabab TUHAN ka geupeutaloe awaknyan!'

¹⁶Jai that sipa-i gata meugantoh dan reubah. Awaknyan jimariet sabe keudroe-droe, 'Jak geutanyoe tawoe ubak bansa droe mangat geutanyoe teuhinda nibak peudeueng musoh.'

¹⁷Tagala nan barô keu raja Meusé: 'Si tukang peuriôh nyang jipeuliwat keuseumpatan.'

¹⁸Ulôn Allah Nyang udeb, Ulôn raja, TUHAN Nyang Mahakuasa. Lagée Gunong Tabor nyang leubeh manyang lamkawan gunong-gunong nyang laén, dan Gunong Karmel nyang meucugok ateueh ié laôt, lagée nyan kheueh teunaga gobnyan nyang teuka geujak prang gata.

¹⁹Meusiab-siab kheueh, he peunduduek Meusé, keu geuteun dan geuba! Memfis jeuet keu rungka-rungka -- teumpat nyang seungue sabab hana ureuëng duek.

²⁰Nanggroe Meusé lagée aneuëk leumô nyang teumbon, teuma jipeukaru lé lalat raya di utara.

²¹Meunan cit sipa-i-sipa-i nyang jisiwa hana meudaya lagée aneuëk leumô nyang teumbon that. Awaknyan hana hase meuteun. Bandum jigisa dan jiplueng jeuet seulamat. Uroe huköman keu awaknyan ka trok teuka; ka watée jih awaknyan keunong bala.

²²Sipa-i Meusé laju jiplueng peusiblah droe deungon babah meuhah-meuhah lagée su uleue, sabab sipa-i musoh ka meutamah tho. Awaknyan jiheuntam sipa-i Meusé deungon pato lagée ureuëng keuneuk teubang kayée

²³dan teucah uteun nyang seumak nyang hana hase teutamong rot nyan. Sipa-i musoh hán ék teuitong jai jih, leubeh le nibak daruet. Ulôn, TUHAN, Lôn peugah.

²⁴Peunduduek Meusé jipeumalée, sabab jipeutaloe lé bansa siblah utara. Ulôn, TUHAN, ka Lôn peugah haba."

²⁵TUHAN Nyang Mahakuasa, Po teu Allah Israel, meufeureuman, "Ulôn Lôn huköm Amon, dewa nibak Tebe, meusigoe deungon banmandum Meusé deungon dewa-dewa dan raja-raja jih nyan. Raja Meusé dan bandum ureuëng nyang jipeumeugah ateueh gobnyan

²⁶Lôn seurah ubak Nebukadnezar raja Babel deungon sipa-i jihnyan nyang keuneuk poh maté jihnyan. Teuma óh lheueh nyan, Meusé na ureuëng duek lagée ban nyang ka. Ulôn, TUHAN, ka Lôn peugah haba."

²⁷"Umat Israel, bék kheueh teumakot! Hamba Lôn, Nabi Yakub, bék kheueh yo! Gata dan keuturonan gata Lôn peuseulamat di nanggroe jiôh, di teumpat gata jiteun. Gata teuma tawoe dan tinggai di nanggroe gata deungon aman. Gata udeb deungon teuntram; hana nyang peureulée gata takot.

²⁸Lé sababnyan, bék kheueh teumakot, he umat Lôn, Ulôn teuka Lôn jak peuseulamat gata. Bansa-bansa, teumpat gata Ulôn peu crebre, bandum Lôn peubinasa, teuma gata hana Lôn peubuet nyang lagée nyan. Beutôi gata hana teupeusie nibak huköman teuma huköman Ulôn ateueh gata na kheueh ade nyang paih lagée reuncana. Ulôn, TUHAN, ka Lôn peugah haba."

← Previous All Books Next →