Ayub 32

22 verses

¹Sabab Nabi Ayub yakén that-that ateueh keubeunaran droe gobnyan, lé sababnyan, ban lhée droe sahabat geuhnyan hana geutem jaweueb le.

²Teuma disinan na sidroe ureuëng nyang nan geuh Elihu bin Barakheel, sidroe keuturonan Bus nibak kawöm Ram. Gobnyan hana hase geupeuteun beungéh geuh, sabab Nabi Ayub geupeubeutôi droe gobnyan keudroe dan geupeusalah Po teu Allah.

³Meunan cit gobnyan beungéh ubak ban lhée droe sahabat Nabi Ayub sabab awaknyan hana hase jibantah tutoe haba Nabi Ayub, bahpi awaknyan jipeusalah Nabi Ayub.

⁴Elihu ureuëng nyang paleng muda lamkawan awaknyan, lé sababnyan gobnyan geupreh sampoe seuleusoe mandum awaknyan meupeugah haba.

⁵Óh ka lheueh geukalon bahwa ban lhée droe awaknyan hana hase geujaweueb, gobnyan jeuet keu beungéh,

⁶dan laju geupeugah lagée nyoe, "Ulôn mantong muda, seudangkan droeneueh ka tuha, lé sababnyan ulôn teumakot dan ragu ulôn peugah peundapat lôn.

⁷Ulôn pike, droeneueh kheueh nyang harôh peugah haba, nyang leubeh tuha bah kheueh geubagi hikeumat geuh.

⁸Teuma nyang jôk hikeumat ubak manusia, na kheueh Roh Po teu Allah Nyang Mahakuasa.

⁹Ureuëng jeuet keubijaksana, kon lé sabab umu jih ka tuha; ureuëng muphom nyang beutôi, kon lé sabab panyang umu jih.

¹⁰Lé sababnyan, deungoe kheueh ulôn; idhin kheueh ulôn lôn peugah peundapat lôn.

¹¹Deungon saba ulôn deungoe watée droeneueh peugah haba, dan ulôn preh watée droeneueh neumita tutoe haba nyang bijaksana.

¹²Ulôn simak deungon biet-biet that; ulôn deungoe droeneueh meuteumé keugagalan. Nyang salah nibak tutoe haba Nabi Ayub hana hase droeneueh jôk bukeuti.

¹³Pakriban jeuet droeneueh peugah bahwa hikeumat ka droeneueh teumé? Sabab droeneueh teupaksa meunyeurah. Nyang hase jaweueb Nabi Ayub na kheueh Po teu Allah.

¹⁴Ubak droeneueh kheueh Nabi Ayub peugah haba, dan bukon ubak ulôn, teuma ulôn hana lôn jaweueb lagée droeneueh.

¹⁵Nabi Ayub, awaknyan bingöng dan hana hase geujaweueb; hana nyang jeuet awaknyan peugah.

¹⁶Awaknyan jidong mantong, hana hase jimeututoe le. Peu kheueh harôh ulôn preh bahpi awaknyan ka ji-iem droe?

¹⁷Hana, jinoe teuma ulôn jaweueb; peundapat ulôn, teuma ulôn peusampoe.

¹⁸Hana saba le ulôn preh, hana hasele ulôn teun tutoe haba lôn.

¹⁹Meunyoe ulôn seungab mantong, teuma beukah kheueh ulôn, lagée baluem nyang peunoh ngon ié anggô barô.

²⁰Ulôn harôh peugah haba, mangat até lôn teunang; ulôn harôh lôn peuhah babah lôn, dan ulôn bri jeunaweueb.

²¹Hana ulôn bila soe mantong nibak meudakwa nyoe dan hana meusidroe pih nyang ulôn pujoe-pujoe.

²²Cara teubeuôt-beuôt pi, ulôn hana lôn teupeue, dan meunyoe ulôn kupeubuet lagéenyan, Po teu Allah deungon reujang geuhuköm ulôn.

← Previous All Books Next →