Ayub 34

36 verses

¹Bukon kheueh droeneueh carông dan na ákai budo? Deungoe kheueh banmandum nyang ulôn peugah nyoe.

³Ureuëng jiteupeue peunajoh mangat meunyoe ka jirasa, dan tutoe haba bijak meunyoe ka jideungoe.

⁴Soai nyoe harôh tapeureksa laju tapeubicah meusajan teuma.

⁵Kheun Nabi Ayub, 'Hana nyang salah nibak ulôn, teuma Po teu Allah hana geutem bri peue nyang ade keu ulôn.

⁶Ulôn geuanggab meusulet, sabab ulôn peugah ulôn hana meudesya. Jinoe ulôn luka parah that, bahpi ulôn hana meusalah.'

⁷Peu kheueh ka lheueh takalon ureuëng lagée Nabi Ayub nyoe? Jihnyan jihina Po teu Allah meuulang-ulang.

⁸Jihnyan galak jimeurakan ngon ureuëng-ureuëng doraka meunan cit jimeungon deungon ureuëng-ureuëng durjana.

⁹Gobnyan jipeugah, bahwa sia-sia mantong kheueh meunyoe jihnyan jiuseuha jipeubuet keuheundak Po teu Allah.

¹⁰Hei ureuëng-ureuëng bijaksana, deungoe kheueh! Ék kheueh mungken Po teu Allah Nyang Mahakuasa geupeubuet salah?

¹¹Gobnyan geuganja manusia nyang sisuai deungon buet jih, geupeusaneut jihnyan sisuai deungon nyang jipeubuet.

¹²Po teu Allah Nyang Mahakuasa hana geupeubuet nyang jeuhet; banmandum ureuëng geubri keuadelan.

¹³Nibak soe kheueh Po teu Allah geuteurimong kuasa Geuh? Soe kheueh nyang peucaya bumoe nyoe ubak Gobnyan?

¹⁴Miseujih Po teu Allah geutarek nyawöng manusia, dan geucok lom teuma nafáh udeb jih,

¹⁵deungon nyan maté makhlok mandum nyang na nyawöng, dan manusia jeuet keu abée lagée seumula.

¹⁶Nyan, meunyoe droeneueh áreh, simak kheueh nyan, pasang kheueh geulinyueng gata dan deungoe kheueh.

¹⁷Peu kheueh Po teu Allah nyang ade dan peukasa nyan gata peusalah? Peue nibak neupike lé droeneueh Po teu Allah geubanci keuadelan?

¹⁸Po teu Allah geuhuköm raja dan nyang mat kuasa meunyoe awaknyan jeuhet dan doraka.

¹⁹Gobnyan hana geudong blah raja-raja, laju leubeh geupeunteng ureuëng kaya nibak si gasien meuseukien. Sabab awaknyan banmandum na kheueh cebtaan Gobnyan.

²⁰Watée teungoh malam, awaknyan hase maté deungon hana teusangka-sangka. Po teu Allah geuhuköm peunguasa dan awaknyan pi binasa; deungon mudah geupoh maté ureuëng peukasa.

²¹Gobnyan geukawai udeb manusia, geukalon mandum meubagoe langkah Geuh.

²²Hana seupôt, pakriban mantong kheueh peukat jih, nyang hase teusöm manusia meudesya.

²³Hana peureulée Po teu Allah geupeuteuntée watée jih, manusia teuka keu geupeusidang lé Gobnyan.

²⁴Deungon hana geuseulidék dan geupeureksa Gobnyan geupeucat nyang mat kuasa dan geubaiát geunantoe jih.

²⁵Sabab, Gobnyan geuteupeue peue nyang awaknyan peubuet; teuma Gobnyan geugule dan geupeuhanco awaknyan óh watée malam.

²⁶Awaknyan geutampa sabab lé desya awaknyan, dikeue rakyat ba awaknyan geuhuköm teuma.

²⁷Sabab, awaknyan hana jitaát ubak keuheundak Gobnyan dan hana jipakoe mandum peurintah Gobnyan.

²⁸Lé sabab awaknyan jeuet ureuëng gasien aloh alah mo ba-e awaknyan geudeungoe lé Po teu Allah.

²⁹Meunyoe Po teu Allah geucok keuputôsan keu geuseungab mantong, hana meusidroe pih nyang jijeuet kheun keu Gobnyan. Meunyoe Gobnyan geusöm ruman Geuh, hana meusidroe pih meuhase meurumpok ngon Gobnyan.

³⁰Teuma bansa-bansa hana meudaya keu jiceugah teumindéeh jeuhet nyan meukuasa.

³¹Hei Nabi Ayub, peu kheueh desya droeneueh ubak Po teu Allah ka droeneueh angkée? Peu kheueh ka droeneueh meujanji bahwa droeneueh hana meudesya le?

³²Peu kheueh ka droeneueh lakée mangat geutunyok salah droeneueh? Peu kheueh ka neumeusumpah bahwa droeneueh neupiôh nibak buet nyan?

³³Ék kheueh mungken Po teu Allah geupeutrok peue nyang gata lakée, óh ka lheueh buet Po teu Allah hana droeneueh situju? Jinoe, droeneueh nyang harôh cok keuputôsan, kon ulôn. Peugah kheueh peue peundapat droeneueh!

³⁴Banmandum ureuëng áreh ka pasti situju; ureuëng bijaksana nyang jideungoe ulôn teuma jipeugah

³⁵bahwa Nabi Ayub geumeututoe hana geumeuphom, dan bahwa nariet gobnyan hana meungandong areuti.

³⁶Meunyoe tutoe haba Nabi Ayub teutilek deungon get-get, deuh kheueh teukalon bahwa tutoe haba geuhnyan lagée ureuëng jeuhet.

³⁷Salah geuhnyan teutamah lom deungon saboh desya; gobnyan beurontak ubak Po teu Allah, dan geuhina Gobnyan dikeue geutanyoe.

← Previous All Books Next →