Yoël 1

20 verses

¹Nyoe kheueh peurintah TUHAN ubak Yoël, bin Petuel.

²Deungoe kheueh, he dumna tuha-tuha; simak kheueh, bandum ureuëng di Yehuda. Peu kheueh ka lheueh hainyoe teujadi bak jamén gata, atawa bak jamén indatu gata?

³Calitra kheueh hainyan ubak aneuëk-aneuëk gata; mangat awaknyan jipeusampoe ubak aneuëk-aneuëk jihnyan calitra nyan. Keuturonan óh lheueh nyan harôh jideungoe teuma, dan jipeutrok ubak keuturonan seulanjut jih teuma.

⁴Kawan daruet nyang hana teukira jeumeulah jih, jidong bak bubena ladang dan laju jipajoh bubena asoe ladang nyan. Peue nyang na jitinggai lé kawan daruet nyoe, laju jipeuhabéh lé kawan daruet nyang laén.

⁵He bubena ureuëng mabök, beudôh kheueh! He bubena tukang jieb ié kreueh, tamo kheueh! Sabab anggô nyang barô ka geureupah lam babah gata.

⁶Pasokan daruet jijak seurang nanggroe geutanyoe; awaknyan teuga dan hana teukira jai jih, gigoe jih tajam lagée tarieng singa inong.

⁷Habéh jiheuntam bubena bak anggô geutanyoe, dan bak ara geutanyoe, nyang na tinggai cit ubô mantong. Bak-bak kayée nyan habéh jipuliek kulét lé kawan daruet nyan, sampoe deuen-deuen jih ka habéh putéh.

⁸Mo ba-e kheueh, he umat, lagée aneuëk dara nyang seudeh nyang jipeuba-e tunangan geunaséh até teucinta.

⁹Gandom dan anggô ka habéh gadôh lam Baét TUHAN. Dan meukabong kheueh bubena teungku imeum, nyang seutia geupeutimang TUHAN.

¹⁰Ladang-ladang ban saát nyoe ka habéh hanco. Tanoh meukabong; sabab hanco kheueh bubena gandom, tho kheueh bubena boh anggô, dan habéh kheueh minyéuk zaiton.

¹¹He peutani, mo ba-e kheueh! He ureuëng meubuet bak lampôh anggô, tamo kheueh! Sabab gandom, jeulai dan bandum hase panen habéh ranab.

¹²Bak-bak kayée muboh nyang na di padang ka habéh tho: bak anggô, apel, ara, keuruma dan delima. Dan rakyat pih hana le geumbira.

¹³He bubena teungku imeum nyang meubuet bak miseubah, tangui kheueh ija kröng, dan mo ba-e kheueh. Tamong kheueh lam Baét TUHAN jeuet takliek simalam beungoh, sabab hana keureubeuen anggô dan gandom nibak Allah gata.

¹⁴Peurintah laju umat gata mangat jipuasa, peumaklum laju bahwa na rapat raya! Jak undang kheueh bubena peumimpén dan nyang patot-patot dan bandum peunduduek Yehuda, mangat jijak u Baét Allah, keu jijak teumawök jak lakée tulông ubak Gobnyan.

¹⁵Uroe TUHAN ka tô that, uroe nyang lumpah teumakot dan gli; saát Nyang Mahakuasa geupeuteuka keuhancoran.

¹⁶Peunajoh ka habéh binasa nyang na dikeue mata geutanyoe di Baét Allah geutanyoe ka hanale surak geumbira.

¹⁷Bijéh maté bak tanoh nyang tho. Hana gandom keu teukeubah, dan bubena gupôk ka habéh soh dan habéh reuloh.

¹⁸Beulatang peulara ka éh óh dan apoh apah; ka hana le blang naleueng teumpat roet uempeuen. Meunan cit ngon kawan bubiri habéh meurana.

¹⁹Ulôn lakée tulông ubak Droeneueh, ya TUHAN sabab bubena blang naleueng ka habéh geursang bubena bak kayée pih ka habéh tho dan maté siulah-ulah ka apui seuba.

²⁰Meunan cit deungon bubena beulatang kleut nyang na uteun jitawök Droeneueh jilakée tulông. Awaknyan hana hase jipeupuih rukueng, sabab bubena krueng ka habéh tho.

← Previous All Books Next →