Yunus 1

¹Bak siuroe, TUHAN geumariet ngon Nabi Yunus, bin Amitai.

²Feureuman Gobnyan, "Tajak kheueh u Niniwe, banda nyang raya nyan, keu teupeutakot banda nyan, sabab Ulôn teupeue bahwa peunduduek disinan jeuhet lumpah na."

³Teuma Nabi Yunus geujak u arah laén guna geupeujiôh TUHAN Gobnyan geujak u Yopa, dan keubeutulan na geungieng kapai keuneuk meulayeue u Spanyol. Óh ka lheueh geubayeue ungkoih kapai, laju geujak meusajan aneuk kapai nyan u Spanyol, mangat gobnyan jiôh nibak TUHAN

⁴Nabi Yunus geutreun ubak teumpat nyang paleng miyueb dan laju geuéh disinan sampoe teungét hana geutée droe. Óh lheuehnyan TUHAN laju geupeuteuka angén raya u ateueh laôt, laju jipôt angén badée nyang lumpah teuga, dan angén raya nyan laju jiheuntam kapai nyan sampoe karab hanco. Bubena aneuk kapai lumpah teumakot sira jiklik-klik jilakée tulông, maséng-maséng ubak dewa jih keudroe. Keu teupeukureueng bahya jeuet bék ngob kapai nyan, bubena asoe kapai nyan laju jitiek lam laôt.

⁶Watée nahkoda kapai nyan jitron u miyueb, laju jikalon Nabi Yunus mantong teungéut disinan. Dan laju jipeugah, "Trok até gata mantong teungéut kapai dalam keuadaan lagée nyoe! Beudôh! Meudóa kheueh ubak dewa gata jeuet geutulông. Pane tateupeue gobnyan geugaséh ubak geutanyoe sampoe geutanyoe hana binasa."

⁷Óh ka lheueh Nabi Yunus dan nakhoda nyan geuék u ateueh, lé keulasi kapai nyan jimariet sabe keudroe-droe, "Jak, tatiek undi mangat tateupeue soe nyang salah sampoe geutanyoe keunong lé bala nyoe!" Awaknyan laju jitiek undi, dan nyang keunong na kheueh nan Nabi Yunus.

⁸Laju jipeugah lé awaknyan ubak Nabi Yunus, "Peu kheueh beutôi sabab lé gata teujadi bala nyoe? Gata rot pane? Bansa peue? Dan pakon gata na disinoe?"

⁹Geujaweueb lé Nabi Yunus, "Ulôn ureuëng Ibrani. Nyang lôn seumah TUHAN, Allah syeuruga, nyang cebta laôt dan darat."

¹⁰Óh lheuehnyan laju geucalitra pakriban gobnyan geupeuplueng droe nibak TUHAN. Ban jideungoe lagée nyan bubena keulasi kapai meutamah teumakot, dan jipeugah ubak Nabi Yunus nyan, "Bitnyoe lancang that buet gata nyan!"

¹¹Teungoh jipeugah nyan angén badée maken meutamah raya, laju lé keulasi kapai jitanyong lom ubak gobnyan, "Peue nyang harôh kamoe peubuet ateueh gata mangat angén badée nyoe jipiôh?"

¹²Geujaweueb lé Nabi Yunus, "Neutiek kheueh ulôn dalam laôt, pasti angén badée nyoe jipiôh. Sabab bak saát nyoe ka ulôn teupeue, bahwa sabab ulon kheueh angén badée nyang luwa biasa nyoe jitimpa ateueh droeneueh."

¹³Teuma lé awak kapai nyan mantong jiuseuha seuhabéh teunaga keu jidayong kapai nyan ateueh darat. Teuma angén badée teutab meutamah raya, seuhingga useuha nyang ka geupeubuet lé awaknyan sia-sia beulaka.

¹⁴Sabab nyan awaknyan geumeulakée ubak TUHAN, "Ya, TUHAN, kamoe lakée, bék kheueh kamoe neupeubinasa ngon sabab kamoe cok nyawöng ureuëng nyang hana jipeubuet meusapeue pih nyang salah ubak kamoe. Ya TUHAN, Droeneueh ka neupeubuet peue nyang Droeneueh keuheundaki."

¹⁵Laju awaknyan jirhom Nabi Yunus u dalam laôt. Dan bak saát nyan cit angén badée nyan jipiôh hana le meubura.

¹⁶Bubena keulasi kapai nyan ka teuka teumakot nyang luwa biasa ubak TUHAN, dan óh ka trok bak darat, awaknyan laju geupeuseumah keureubeuen ngon jimeujanji meubagoe-bagoe rupa ubak TUHAN.

¹⁷Dan bak watée nyan TUHAN laju geukirém saboh eungkot yée nyang paleng raya jeuet yée nyan jijak uét Nabi Yunus. Dan tinggai kheueh Nabi Yunus dalam pluet eungkot nyan lhée uroe lhée malam treb jih.