Yosua 13

33 verses

¹Jinoenyoe Yosua ka tuha that-that. TUHAN meufeureuman ubak Yosua, "Gata ka tuha, Yosua! Teuma mantong jai that daerah nyang harôh teureubot:

²banmandum wilayah Filistin dan Gesur,

³dan banmandum wilayah Awi u arah seulatan. (Daerah nibak Krueng Sikhor nyang meubataih deungon nanggroe Meusé trok u bataih ngon Ekron di siblaih utara, mandum nyan teuhitong daerah bansa Kanaan; dan raja-raja Filistin tinggai di Gaza, Asdod, Askelon, Gat, dan Ekron.)

⁴Meunan cit atranyan harôh teureubot: banmandum daerah Kanaan dan Meara (atra bansa Sidon), trok laju u Afek to ngon bataih bansa Amori;

⁵óh lheuehnyan daerah bansa Gebal, dan mandum daerah Libanon u arah timu, phon di Baal-Gad disiblaih u seulatan Gunong Hermon, laju rhot u jalan nyang teutuju u Hamat.

⁶Meunan cit jitamong keunan banmandum wilayah ureuëng Sidon, nyang tinggai di daerah gunong-gunong lamkawan gunong-gunong Libanon dan Misrefot-Maim." "Banmandum bansa-bansa nyan teuma Ulôn use singoh, bak watée ureuëng Israel jijak prang awaknyan," kheun TUHAN ubak Yosua. "Tanoh nyan harôh kheueh gata bagi-bagi keu umat Israel mangat jeuet keu tanoh milék awaknyan, lagée nyang ka Ulôn peurintah ubak gata.

⁷Lé sababnyan, jinoenyoe gata bagi-bagi kheueh laju tanoh nyan keu ban sikureueng boh sukée dalam bansa Israel, dan keu siladum keu sukée Manasye, mangat atranyan jeuet keu tanoh milék awaknyan."

⁸Sukée Ruben dan Gad meunan cit deungon siladum sukée Manasye ka jiteurimong jeumba jih tanoh nyang nibak Nabi Musa, hamba TUHAN nyan; na kheueh tanoh di siblaih utimu Krueng Yordan.

⁹Wilayah awaknyan jitamong keunan Aroër (nibak binéh Pantôn Krueng Arnon), dan banda nyang na di teungoh-teungoh pantônnyan. Dan bagian darat nyang manyang nibak Medeba sampoe trok u Dibon.

¹⁰Dan meunan cit trok u bataih daerah Amon, jitamong cit keunan banmandum banda nyang ka lheueh jikuasa lé Sihon, raja Amori, nyang jiduek di Hesybon.

¹¹Meunan cit jitamong keunan daerah Gilead, daerah nyang rab that ngon Gesur dan Maakha, meunan cit banmandum Gunong Hermon, dan mandum daerah Basan trok u Salkha.

¹²Daerah awaknyan meunan cit jitamong daerah keukuasaan Raja Og, ureuëng Refaim nyang paleng dudoe nyang mat peurintah di Asytarot dan Edrei. Nabi Musa ka geupeutaloe bansa-bansa nyan dan geu use awaknyan mangat jiteubiet nibak daerah droe jih nyan.

¹³Teuma peunduduek Gesur dan Maakha hana ji use lé ureuëng Israel; awaknyan mantong na tinggai di Israel.

¹⁴Sukée Lewi awaknyan hana geuteurimong jeumba tanoh nibak Nabi Musa, sabab TUHAN ka geupeugah ubak Nabi Musa bahwa jeumba sukée Lewi na kheueh nibak keureubeuen-keureubeuen nyang teutot di ateueh miseubah keu TUHAN Po teu Allah Israel.

¹⁵Siladum nibak tanoh nyang geupeujanji lé TUHAN keu umat Israel nyan ka geubri lé Nabi Musa keu keuluwarga-keuluwarga lam sukée Ruben, mangat jeuet keu tanoh hak milék droe awaknyan.

¹⁶Wilayah awaknyan jitamong mandum Aroër (nibak binéh Pantôn Krueng Arnon) dan banda nyang na di teungoh-teungoh pantôn nyan trok laju u bansaboh darat manyang nyang to ngon Medeba;

¹⁷meunan cit deungon Hesybon dan banmandum banda di darat nyang manyang nyan, na kheueh: Dibon, Bamot-Baal, Bet-Baal-Meon,

¹⁸Yahas, Kedemot, Mefaat,

¹⁹Kiryataim, Sibma, Zeret-Hasahar nyang na teuduek di ateueh bukét di pantôn nyan,

²⁰Bet-Peor, lereng-lereng Gunong Pisga, dan Bet-Yesimot.

²¹Lheueh nyan jitamong cit keunan banmandum banda nyang na di darat nyang manyang nyan, dan banmandum keukuasaan Sihon, raja bansa Amori, nyang yoh masa ilée teumpat jihnyan na Hesybon. Gobnyan dan nyang mat kuasa Midian pih, na kheueh: Ewi, Rekem, Zur, Hur, dan Reba, mandum nyan ka geupeutaloe lé Nabi Musa. Dan mandum nyang mat kuasa nyan ka lheueh jipeurintah nanggroe nyan keu Raja Sihon.

²²Lamkawan ureuëng nyang geupoh maté lé bansa Israel na cit rhoh keunan Bileam aneuëk Beor, tukang ramai naseb gob.

²³Krueng Yordan na kheueh sibagoe bataih bagian barat sukée Ruben. Nyan kheueh banda-banda dan gampông-gampông nyang geubri keu keuluwarga-keuluwarga dalam sukée Ruben mangat jeuet keutanoh milék awaknyan.

²⁴Siladum nibak tanoh nyang ka geupeujanji lé TUHAN keu umat Israel nyan meunan cit ka geubri keu Nabi Musa ubak keuluwarga-keuluwarga dalam sukée Gad, mangat jeuet keuhak milék awaknyan.

²⁵Wilayah awaknyan jitamong cit Yaezer dan banmandum banda di Gilead meunan cit siladum nibak daerah bansa Amon trok laju nyang jiôh jih sampoe u Aroër di siblaih u timu Raba;

²⁶daerah di Hesybon sampoe u Ramat-Mizpa dan Betonim, meunan cit deungon daerah nibak Mahanaim trok laju ubak bataih Lodebar, banmandum nyan jitamong teuma lam wilayah keu sukée Gad.

²⁷Di Pantôn Yordan, wilayah sukée Gad nyan jitamong cit keunan Bet-Haram, Bet-Nimra, Sukot dan Zafon, na kheueh séuh daerah keukuasaan Raja Sihon di Hesybon. Bataih siblaih u barat sukée Gad nyan na kheueh Krueng Yordan sampoe laju jiôh jih ubak Danau Galilea di siblaih utara.

²⁸Nyan kheueh banda-banda dan gampông-gampông nyang geubri keu keuluwarga-keuluwarga lam sukée Gad mangat jeuet keu tanoh milék awaknyan.

²⁹Siladum nibak tanoh nyang ka geupeujanji lé TUHAN ubak umat Israel meunan cit atranyan ka geubri lé Nabi Musa ubak keuluwarga-keuluwarga siladum nibak sukée Manasye mangat jeuet keuhak milék awaknyan.

³⁰Bataih-bataih wilayah awaknyan trok u Mahanaim, jitamong cit keunan banmandum Basan -- na kheueh mandum wilayah keukuasaan Og, raja Basan, dan meunan cit ban nam ploh gampông-gampông Yair di Basan.

³¹Seulanjut jih jitamong cit keunan siteungoh nibak daerah Gilead, meunan cit Asytarot dan Edrei, na kheueh bandua ma banda wilayah keukuasaan Raja Og di Basan. Banmandum wilayah nyan geubri siladum keu keuluwarga-keuluwarga keuturonan Makhir, aneuëk Manasye.

³²Meunan kheueh Nabi Musa geubagi tanoh bagian u timu Yerikho, di meurandeh Krueng Yordan, bak watée gobnyan na di daratan miyueb Moab.

³³Teuma sukée Lewi meubacut pi hana meuteumé tanoh nibak Nabi Musa. Nabi Musa geupeugah ubak awaknyan bahwa jeumba nyang geubri keu awaknyan na kheueh nibak keureubeuen-keureubeuen nyang jipeuseumah ubak TUHAN Po teu Allah Israel.

← Previous All Books Next →