Hakém-Hakém 14

20 verses

¹Nibak siuroe Simson geujak u Timna, dan geukalon sidroe aneuëk dara Filistin nibak teumpat nyan.

²Laju geuwoe dan geupeugah ubak ureuëng syiek geuh, "Ulôn galak that até keu sidroe aneuëk dara Filistin di Timna. Ulôn lakée ayah ngon ma neujak seulangke aneuëk dara nyan."

³Teuma ureuëng syiek geuh geupeugah, "Pakon jeuet teujak ubak ureuëng Filistin mangat meuteumé peurumoh teuh, seudangkan awaknyan kon umat TUHAN? Peu kheueh lam kawöm geutanyoe keudroe atawa nibak banmandum bansa geutanyoe hana nyang paih?" Jaweueb Simson ubak ayah gobnyan, "Teuma aneuëk dara Filistin nyan kheueh nyang ulôn galak. Ulôn meuharab ayah ngon ma neutem jak seulangke aneuëk nyan keu ulôn tuan."

⁴Ureuëng syiek Simson hana geuteupeue bahwa TUHAN kheueh nyang peujeuet banmandum nyan sampoe Simson geupeubuet nyan. Sabab TUHAN teungoh geumita watée nyang paih keu teuprang ureuëng Filistin. Yoh watée nyan ureuëng Filistin jikuasa ureuëng Israel.

⁵Dan geujak kheueh Simson u Timna meusajan-sajan ngon ureuëng syiek gobnyan, teungoh awaknyan geujak rot saboh keubeueng lampôh anggô, Simson laju meurumpok ngon saboh singa muda, singa nyan laju jitaum

⁶dan hana teusangka-sangka Simson jiteuka teuga le kuasa TUHAN. Laju geupriek-priek singa nyan ngon jaroe gobnyan, sang-sang beulatang nyan lagée saboh kaméng. Hainyan hana geupeugah bak ureuëng syiek geuh.

⁷Óh lheuehnyan Simson geujak saweue aneuëk dara nyan dan geumarit-marit ngon sidara nyan, dan Simson galak keu aneuëk dara nyan.

⁸Óh ka lheueh na padub watée teuma óh dudoe, Simson geujak lom keu geujak meukawen ngon aneuëk daranyan. Nibak meuneujak gobnyan nyan, gobnyan geuwet lom keu geujak kalon bangke singa nyang ka geupoh maté nyan. Watée trok geuh keunan laju geukalon jai that-that unö lam bangke beulatang nyan, dan na cit meulisan unö.

⁹Gobnyan laju geucok sira geukrok mulisan unö nyan lam paleuet paroe gobnyan, dan laju geujak sira geupajoh meulisan nyan. Óh lheuehnyan gobnyan geujak meurumpok ngon ureuëng syiek geuh dan geujôk cit bacut meulisannyan ubak awaknyan dan awaknyan laju jipajoh meulisan nyan meusajan-sajan. Teuma Simson hana geupeugah bahwa meulisan nyan geucok nibak bangke singa.

¹⁰Óh ka lheueh ayah Simson geujak u rumoh aneuëk dara nyan, Simson laju geupeuna khanuri disinan, sabab lagéenyan kheueh keubiasaan nyang lazem nibak awak muda-muda.

¹¹Watée ureuëng Filistin jikalon gobnyan, awaknyan laju jipiléh lhée ploh droe awak muda keu ngon gobnyan.

¹²Laju Simson geupeugah bak awaknyan, "Ulôn na hieuém. Meunyoe gata nyoe hase gata jaweueb, keue gata maséng-maséng ulôn jôk siôn ija lineun nyang halôh dan sipasang peukayan nyang lagak. Ubak gata ulôn jôk watée tujoh uroe sidub treb khanuri meukawen nyoe, keu gata jaweueb hieuém nyoe.

¹³Teuma meunyoe gata hana hase gata jaweueb hieuém nyoe, gata kheueh maséng-maséng nyang jôk keu ulôn ija lineun nyang halôh dan saboh pasang peukayan nyang lagak." Laju ureuëng-ureuëng Filistin nyan jipeugah, "Jeuet! Jinoe peugah kheueh hiém nyan."

¹⁴Teuma Simson geupeugah, "Nibak nyang makheun, jiteubiet nyang jimakheun; nibak nyang teuga, jiteubiet nyang mameh." Óh ka lheueh na lhée uroe, awaknyan gohlom cit meuhase jijaweueb hieuém nyan.

¹⁵Lé sababnyan, bak uroe nyang keu peuet, jipeugah kheueh le awaknyan bak peurumoh Simson, "Gata harôh gata bujuk lakoe teuh mangat gobnyan geutem peugah keu kamoe makna hieuém nyan. Meunyoe hán, kamoe tot gata ngon banmandum asoe rumoh ureuëng syiek gata. Rupari gata tawök kamoe keunoe keu kamoe peuhabéh atra kamoe!"

¹⁶Lé sababnyan, peurumoh Simson geujak bak lakoe geuh sira geumo, lheuehnyan geupeugah, "Ulôn kuteupeu droeneueh hana neucinta ulôn. Pakon neujôk hieuém ubak rakan-rakan lôn, teuma droeneueh hana neupeugah makna jih ubak ulôn? Teuntée droeneueh neubanci ulôn!" Seuôt Simson, "Preh ilée! Ubak ureuëng syiek lôn keudroe hana lôn peugah, keupeue bak gata harôh ulôn kheun?"

¹⁷Tujoh uroe treb jih khanuri nyan peurumoh Simson jimo sabe. Dan lé sabab inong nyan hana piôh jimeurengek sabe, bak uroe nyang keutujoh, Simson laju geupeugah makna hieuém nyan ubak binoe geuh. Laju peurumoh Simson nyan jijak peugah makna hieuém nyan ubak ureuëng-ureuëng Filistin.

¹⁸Dan bak uroe nyang keutujoh sigohlom mata uroe jilhob, ureuëng-ureuëng banda nyan jipeugah ubak Simson, "Peu kheueh nyang leubeh mameh nibak meulisan? Dan peu kheueh teuma nyang leubeh teuga nibak singa?" Simson geujaweueb, "Meunyoe gata hana tapeusuna peurumoh ulôn, gata hana hase tatapeuse makna hieuém nyan!"

¹⁹Deungon hana teusangka-sangka Simson jiteuka teuga le kuasa TUHAN, laju geujak u Askelon. Disinan laju geupoh maté lhée ploh droe ureuëng agam nyang sok peukayan lagak-lagak. Gobnyan laju geucok peukayan awaknyan dan geujôk laju ubak awaknyan nyang ka jijaweueb hieuém geuh nyan. Óh lheuehnyan, laju geuwoe u rumoh gobnyan ngon até nyang tunu.

²⁰Laju le ayah tuan Simson geujôk peurumoh Simson nyan ubak nyang iréng Simson yoh watée awaknyan meukawen.

← Previous All Books Next →

Loading Bible Translation

First-time download in progress. This may take a few seconds…

←Bible|||

Acehnese Holy Bible Wordproject Bible