PTL Lyrics

PRAISE THE LORD LYRICS

Loading Bible Translation

First-time download in progress. This may take a few seconds…

Daily Reading Bible

✅ Shared successfully

←Bible|||

Acehnese Holy Bible Wordproject Bible

Hakém-Hakém 9

57 verses

¹Bak si uroe Abimelekh aneuëk Gideon nyan jijak-jak u banda Sikhem di teumpat kawöm keuluwarga mak jih. Di sinan jihnyan jipeugah haba deungon awaknyan, kheun jihnyan,

²"Ci gata tanyong ubak banmandum peunduduek nyang na di Sikhem, nyang toh nyang leubeh gét: Geupeurintah lé ban tujoh ploh droe aneuëk Gideon, atawa lé sidroe ureuëng mantong? Gata peu ingat ubak awaknyan bahwa ulôn mantong na hubongan darah deungon awaknyan."

³Teuma jijak kheueh laju kawöm keuluwarga nibak mak Abimelekh nyan ubak ureuëng-ureuëng Sikhem dan jipeusampoe laju peusan Abimelekh ubak awaknyan dan di peunduduek Sikhem nyan jicok keuputosan mangat jijak seutôt Abimelekh, sabab meunurot awaknyan jih nyan keubit mantong na hubongan darah deungon awaknyan.

⁴Óh lheueh nyan awaknyan laju jibri keu gobnyan tujoh ploh péng pirak nyang jicok nibak rumoh teumpat seumah Baal-Berit. Deungon péng nyan Abimelekh laju jipeu upah saboh kawan ureuëng kureueng aja mangat jijak meugabong deungon gobnyan,

⁵dan óh lheueh nyan jijak u gampông bapak jihnyan di Ofra. Óh trok keudeh laju jijak poh maté ban tujoh ploh droe syedara gobnyan di ateueh saboh batée. Teuma si Yotam, aneuëk tulot Gideon, hana keunong poh sabab jihnyan jimusöm.

⁶Teuma meusapat kheueh banmandum peunduduek Sikhem dan Bet-Milo, laju awaknyan jijak ubak bak kayée sala nyang keuramat di Sikhem. Disinan awaknyan laju jiangkat Abimelekh jeuet keu raja.

⁷Óh ka lheueh Yotam jideungoe hai nyan, laju gobnyan geujak dong ubak pucak Gunong Gerizim, laju geu dumpék sira geutawök ubak awaknyan, "Gata deungoe ulôn, hai ureuëng-ureuëng Sikhem, mangat Po teu Allah geudeungoe teuma gata!

⁸Bak siwatée na peuristiwa jimeusapat kheueh bak-bak kayée keuneuk jipiléh raja keu bak-bak kayée nyan. Teuma jipeugah kheueh lé jihnyan keu bak kayée zaiton, 'Jeuet kheueh raja kamoe.'

⁹Ji jaweueb lé bak zaiton, 'Ah, hana takjan ulôn. Sabab meunyoe ulôn jeuet keu raja gata, ulôn harôh lôn piôh lôn peuhase minyéuk zaiton nyang that-that teupeureulée keu jingui lé dewa-dewa dan manusia.'

¹⁰Laju jipeugah teuma lé bak-bak kayée keu bak kayée ara, 'Droeneueh mantong jeuet keu raja kamoe.'

¹¹Teuma di bak aranyan jijaweueb teuma lagée nyoe, 'Ulôn han cit ulôn tem, sabab keu jeuet keuraja gata ulôn harôh lôn piôh lôn muboh boh ara nyang maméh-maméh.'

¹²Óh lheueh nyan, jipeugah teuma lé bak-bak kayée nyang laén keu bak kayée anggô, 'Nah, droeneueh kheueh mantong nyang jeuet keuraja kamoe.'

¹³Teuma dibak anggô nyan pi jijaweueb, 'Éuk kheueh nyoe ulôn lôn piôh lôn peuteubiet boh anggô nyang teupeugalak até dewa-dewa dan manusia, teuma keu jeuet keuraja gata!'

¹⁴Sababnyan jipeugah kheueh teuma banmandum bak kayée ubak tamah nyang meuduro, 'Droeneueh kheueh mantong hai tamah nyang meuduro jeuet keuraja kamoe.'

¹⁵Teuma di tamah nyang meuduro nyanpi jijaweueb, 'Meunyoe gatanyoe biet-biet keuneuk peujeuet ulôn nyoe keu raja gata, jak kheueh keuno tamusöm dimiyueb ulôn. Meunyoe gata hana tatem, teuma nibak banmandum cabeueng-cabeueng ulôn nyang meuduro nyoe teuma jiteubiet apui nyang jitot habéh bubena bak aras di Libanon.' "

¹⁶"Nyan," geupeugah lé Yotam teuma lom, "Peu kheueh deungon gata angkat Abimelekh jeuet keuraja, gatanyoe ka gata meubuet deungon jujo dan ikhlaih? Peu kheueh kalheueh tapeubuet nyang sipatot jih keu Gideon, bapak ulôn, dan kawöm keuluwarga gobnyan? Peu kheueh ka tabalaih jasa-jasa bapak ulôn

¹⁷nyang ka geumeujuang keu gatanyoe? Ingat, gobnyan ka geupeusabong nyawöng keu geupeuleupah gata nibak keukuasaan ureuëng Midian.

¹⁸Teuma jinoenyoe gata ka takianat ubak keuluwarga bapak ulôn. Aneuëk-aneuëk gobnyan ka gata poh maté banmandum -- tujoh ploh droe sigoguih di ateueh saboh batée. Abimelekh nyan na kheueh aneuëk bapak ulôn nibak gundek gobnyan. Teuma gatanyoe ka ta angkat geuhnyan jeuet keuraja Sikhem, lé sabab gobnyan mantong na hubongan darah deungon gata.

¹⁹Meunyoe buet gatanyan nibak uroenyoe ateueh bapak ulôn dan keuluwarga gobnyan ngon tuloih até gata dan ikhlaih, silakan gata seunang-seunang deungon Abimelekh, dan bah kheueh teuma jihnyan jimeu seunang-seunang deungon gatanyoe.

²⁰Teuma meunyoe kon lagée nyan hai jih, seumoga nibak Abimelekh nyan jiteubit kheueh apui nyang hu meukeubok-keubok sampoe tutong ngon hangoh banmandum peududuek Sikhem meunan cit ngon Bet-Milo. Dan seumoga nibak peunduduek Sikhem dan Bet-Milo pi jiteubiet teuma apui nyang tutong habéh tuboh si Abimelekh."

²¹Óh lheuehnyan Yotam laju jipeuplueng droe dan jiduek laju di Beer, sabab jihnyan teumakot ubak Abimelekh, syedara jihnyan.

²²Lhée thon treb jih Abimelekh geumat peurintah u ateueh ureuëng Israel nyan.

²³Laju teuka meureuka TUHAN sampoe TUHAN ka geupeumusoh Abimelekh deungon peunduduek Sikhem sampoe ureuëng-ureuëng Sikhem nyan jijak lawan Abimelekh.

²⁴Hainyoe teujadi mangat teubalaih buet nyang jeuhet nyang ka jipeubuet lé Abimelekh dan ureuëng-ureuëng Sikhem nyang peusuna jihnyan keu jipoh maté bantujoh ploh droe aneuëk-aneuëk Gideon.

²⁵Ureuëng-ureuëng Sikhem nyan laju jipeugét pageue peuhalang di ateueh pucak-pucak gunong mangat hase teudrob Abimelekh. Soemantong ureuëng nyang liwat rotnyan laju jireupah ngon jirampok lé ureuëng nyang preh nyan. Teuma hainyoe laju jibri tée ubak Abimelekh.

²⁶Bak watée nyan Gaal aneuëk Ebed ka teuka meusigoe-sigoe deungon syedara-syedara jih keujikeuneuk tinggai di Sikhem; dan di ureuëng-ureuëng pi jipatéh keu jihnyan.

²⁷Awaknyan laju jijakpot boh anggô nyang na di lampôh-lampôh anggô, nibak boh anggô nyang ka jipot nyan lé awaknyan laju jipeugét ié anggô, dan jipeuna khanuri. Awaknyan jimakheun sira jijieb ié anggô nibak teumpat jiseumah dewa-dewa droe jih sira jiseurapa ngon jimeu péb-péb u ateueh Abimelekh.

²⁸"Soe geutanyoe nyang sibeuna jih nyoe, sampoe geutanyoe ta taklok ubak Abimelekh?" geupeugah lé Gaal. "Dan jihnyan soe teuma nyang seubeuna jih? Bukon kheueh jih nyan aneuëk Gideon nyang deungon Zebul waki jihnyan ka jeuet keunamiet Hemor, bapak Sikhem, indatu geutanyoe!"

²⁹"Meunyoe ulôn nyang pimpén ureuëng-ureuëng Sikhem nyoe, pasti ka habéh riwayat Abimelekh nyan! Ulôn peugah ubak jihnyan, 'Kah tajoe keunoe! Gata krah beuhabéh tantra gata dan jak tateubiet tamuprang ngon ta adu ngaza!' "

³⁰Zebul, nyang mat kuasa ateueh banda Sikhem, get that beungéh watée jideungoe peue nyang ka jipeugah lé Gaal nyan.

³¹Lé jihnyan laju jikirém utosan ubak Abimelekh di Aruma mangat jijak peusampoe peusan nyoe, "Gaal aneuëk Ebed meusajan-sajan deungon syedara-syedara jih ka jiteuka u Sikhem dan jipeusuna peunduduek mangat jilawan gata.

³²Lé sababnyan, bah kheueh gata dan ureuëng-ureuëng gata tajak musöm u lampôh bak watée malam.

³³Singoh beungoh meunyoe mata uroe ka jiteubiet, gata seureubu kheueh laju banda seucara meudadak. Dan meunyoe Gaal dan ureuëng-ureuëng jih jiteubiet jijak lawan gata, nyang kheueh watée jih gata heuntam awaknyan!"

³⁴Teuma Abimelekh ngon aneuëk buah gobnyan laju meugeurak óh watée malam. Awaknyan meutabu laju jeuet keu peuet boh pasokan dan jijak musöm laju ban silingka banda Sikhem.

³⁵Meunan jikalon lé Abimelekh dan ureuëng-ureuëng gobnyan Gaal jiteubiet dan ka jidong di babah pintoe geureubang banda, deungon seureuntak Abimelekh ngon ureuëng gobnyan laju geuteubiet nibak teumpat geumusöm.

³⁶Gaal leumah laju jikalon awaknyan, dan bak watéenyan cit jipeugah ubak Zebul, "Ngieng, na déh ureuëng ramé teungoh jitreun keunoe di ateueh pucak gunong!" "Ah, nyan kon ureuëng," jiseuôt lé Zebul, "nyan bubayang nyang leumah di ateueh gunong."

³⁷Laju jipeugah lom lé Gaal, "Beutôi, na ureuëng treun nibak lereng bukét, dan na lom saboh kawan teuk teungoh jijak keunoe nibak arah bak sala nyang keuramat!"

³⁸Jipeugah kheueh lé Zebul ubak Gaal, "Nyan, toh babah gata nyang raya haba nyan? Ilée gata peugah keupeue geutanyoe tatundok ubak Abimelekh nyan? Nyoe kheueh ureuëng-ureuëng nyang gata hina nyan. Jak, gata maju laju bak saátnyoe tajak seurang awaknyan!"

³⁹Dan Gaal nyan jipeuteubiet laju uluwa bubena ureuëng Sikhem dan jijak lawan laju Abimelekh.

⁴⁰Teuma Abimelekh geuseureubu laju awaknyan sampoe awaknyan habéh jipeuplueng droe. Ureuëng maté ka meulampa sampoe trok ubak babah pintoe geureubang banda.

⁴¹Akhé jih Abimelekh geuwoe laju u Aruma, dan laju geutinggai teutab disinan, Zebul geu use laju Gaal meunan cit deungon syedara-syedara jihnyan jipeuteubiet nibak Sikhem, akhé jih awaknyan ka hana jeuet le tinggai nibak teumpat nyan.

⁴²Óh singoh beungoh di ureuëng-ureuëng Sikhem laju jitinggai banda, jikeuneuk jak u lampôh dan hainyan jilapor laju ubak Abimelekh.

⁴³Di Abimelekh pi laju geupeusapat dumna ureuëng-ureuëng gobnyan, dan geubagi teuma awaknyan jeuet keu lhée boh pasokan, dan awaknyan laju geujak musöm u lampôh-lampôh. Bak watée geukalon peunduduek bandanyan teungoh jijak u lampôh, gobnyan geuteubiet laju nibak teumpat musöm dan laju geupoh maté bubena awaknyan.

⁴⁴Teungoh Abimelekh ngon pasokan gobnyan geucang ngon geuseureubu pintoe geureubang banda, ban dua boh pasokan gobnyan nyan laju geutiyeueb ngon geujak seureubu ureuëng-ureuëng nyang teungoh jiplueng u lampôh-lampôh.

⁴⁵Di Abimelekh geumeucang laju si uroe suntok dan laju geuteumé duek nibak banda nyan; peunduduek bandanyan geupoh maté, laju bandanyan geupeuhanco ngon geutabu teuma deungon sira.

⁴⁶Bak watée ureuëng-ureuëng nyang mantong na di dalam kuta Sikhem geudeungoe habanyan, awaknyan jitamong laju u dalam uruek di miyueb kuil El-Berit keu jijak meulindong.

⁴⁷Teuma na ureuëng jijak peugah ubak Abimelekh bahwa bubena ureuëng di kuta Sikhem nyan ka jimeusapat disinan.

⁴⁸Lé sabab nyan, Abimelekh dan ureuëng-ureuëng gobnyan geujak laju u Gunong Zalmon. Di gunong nyan gobnyan geukoh laju cabeueng-cabeueng kayée deungon kapak, laju geugulam cabeueng kayée nyan nibak baho, óh lheueh nyan geupeurintah teuma ubak bubena ureuëng gobnyan mangat jipeubuet lagée nyang ka geupeubuet nyan.

⁴⁹Teuma awaknyanpi maséng-maséng laju jijak koh cabeueng kayée, dan jijak laju dilikot sira jiseutôt Abimelekh. Banmandum cabeueng kayée nyan ka jitamong nibak babah pintoe uruek kuil nyan, dan óh lheuehnyan kayée-kayée nyan laju teutot, seudangkan ureuëng-ureuëng Sikhem nyan mantong na didalam kuil nyan. Lé sabab nyan maté kheueh banmandum peunduduek Sikhem nyan, na kira-kira siribée droe ureuëng agam ngon ureuëng inong.

⁵⁰Óh lheuehnyan Abimelekh geujak teuma u Tebes. Bandanyan geukeupông teuma dan bandanyan pi taklok dan laju geuduek disinan.

⁵¹Nibak teungoh-teungoh bandanyan na saboh meunara nyang lumpah kukôh dan không. Dan banmandum peunduduek bandanyan laju jiplueng keunan, awaknyan laju jitamong u dalam meunara nyan dan jigunci laju pintoe meunara nyan, dan awaknyan laju jiék u ateueh.

⁵²Óh lheuehnyan teuka kheueh Abimelekh deungon meukeusut jijak seurang meunara nyan. Bak watée Abimelekh nyan ka trok nibak babah pintoe meunara nyan dan geukeuneuk tot meunara nyan,

⁵³na sidroe ureuëng inong laju jipeurhot sineuk batée u ateueh ulée Abimelekh sampoe bruek ulée Abimelekh nyan reutak.

⁵⁴Bagaih-bagaih Abimelekh geutawök sidroe aneuëk bujang nyang teungoh jigulam seunjata dan geupeugah, "Gata suet kheueh peudeueng gatanyan dalam sarong dan gata tak kheueh ulôn deungon peudeueng gatanyan sampoe án maté; ulôn hana jipeugah lé gob bahwa maté ulôn nyoe jipoh lé sidroe ureuëng inong." Teuma di ureuëng muda nyang mantong bujang pi laju jisuet peudeueng dan deungon peudeueng nyan kheueh jitak u ateueh Abimelekh akhéjih Abimelekh pi maté sikeujab nyan cit teuma.

⁵⁵Bak watée ureuëng-ureuëng Israel jikalon bahwa Abimelekh ka maté, dan awaknyan pi banmandum jijakwoe u rumoh jih maséng-maséng.

⁵⁶Meunan kheueh cara jih Po teu Allah geubalaih u ateueh Abimelekh keuhai buet nyang jeuhet nyang ka jipeubuet ateueh bapak jih keudroe, bak watée jihnyan jipoh maté ban tujoh ploh droe syedara gobnyan.

⁵⁷Dan meunan cit TUHAN geuhuköm teuma u ateueh ureuëng Sikhem sabab keujeuhetan awaknyan. Hainyan paih that lagée nyang ka geupeugah lé Yotam aneuëk Gideon keuhai awaknyan bak watée gobnyan geupeusumpah awaknyan.

← Previous All Books Next →