Imeum-Imeum 2

16 verses

¹Meunyoe sidroe-droe ureuëng jipeuseumah keureubeuen teuhidang ubak TUHAN, keureubeuen nyan harôh teupông nyang paleng jroh nyang ka teuprée ngon minyéuk zaiton dan teuboh keumeunyan diateueh nyan.

²Ureuëng nyan harôh jiba ubak imeum-imeum keuturonan Nabi Harun. Imeum nyang meutugaih disinan geucok laju sireugam teupông nyan meunan cit deungon minyéuk zaiton dan banmandum keumeunyan, dan atranyan mandum geutot laju ateueh miseubah sibagoe tanda bahwa banmandum nyan ka geupeuseumah ubak TUHAN. Bée keureubeuen teuhidang nyang mangat nyan lumpah that galak até TUHAN.

³Keureubeuen teuhidang nyang leubeh nyan na kheueh keu imeum-imeum. Keureubeuen nyan suci that sabab teucok nibak peunajoh nyang ka teupeuseumah ubak TUHAN.

⁴Meunyoe nyang jipeuseumah nyan ruti nyang teutot didalam acuwan, ruti nyan harôh teupeugét hana meurago. Ruti nyan jeuet teubai, teupeugét nibak teupông halôh nyang teuramah ngon minyéuk zaiton, jeuet cit juadah nyang teusiliek ngon minyéuk zaiton.

⁵Meunyoe nyang jipeuseumah nyan ruti nyang teupanggang di ateueh panggang, ruti nyan harôh teupeugét nibak teupông halôh deungon minyéuk zaiton, teuma hana jeuet teuboh rago.

⁶Ruti nyang teupeuseumah nyan harôh teupriek-priek, laju teuro minyéuk zaiton.

⁷Meunyoe nyang teupeuseumah nyan ruti nyang teutaguen lam kuali, ruti nyan harôh teupeugét nibak teupông nyang halôh dan minyéuk zaiton.

⁸Ruti nyang teupeugét deungon cara lagée nyan harôh teupeuseumah ubak TUHAN dan teujok ubak imeum-imeum nyang ba atranyan ubak miseubah.

⁹Imeum-imeum geucok siladum nibak rutinyan laju geutot ateueh miseubah sibagoe tanda bahwa banmandum nyan ka geupeuseumah ubak TUHAN. Bée jih nyang mangat nyan lumpah that galak até TUHAN.

¹⁰Nyang leubeh nibak nyan na kheueh hak milék imeum. Ruti nyan lumpah suci sabab teucok nibak peunajoh nyang ka teupeuseumah ubak TUHAN.

¹¹Keureubeuen hidangan keu TUHAN hana jeuet teujampu ngon meulisan atawa rago, sabab meulisan dan rago hana jeuet teutot keu teupeuseumah ubak TUHAN.

¹²Nibak wase tanoh nyang phon bak tieb-tieb thon, siladum harôh teupeuseumah ubak TUHAN, teuma hana jeuet teutot ateueh miseubah.

¹³Tieb-tieb keureubeuen teuhidang harôh teuboh sira, sabab sira sibagoe tanda janji Po teu Allah deungon gata. Jadi mandum peuseumahan harôh teuboh sira.

¹⁴Meunyoe gata tapeuseumah ubak TUHAN gandom nyang phon gata pot, taba kheueh gandom barô nyang ka teutôb halôh atawa teupanggang.

¹⁵Gandom nyan harôh teuboh minyéuk zaiton dan teuboh keumeunyan di ateueh nyan.

¹⁶Imeum harôh geutot siladum nibak gandom dan minyéuk nyan meunan cit banmandum keumeunyan, sibagoe tanda bahwa banmandum nyan ka geupeuseumah ubak TUHAN.

← Previous All Books Next →