Imeum-Imeum 22

29 verses

¹TUHAN meufeureuman ubak Nabi Musa beu geujak peusampoe peurintah nyoe ubak Nabi Harun dan aneuëk-aneuëk gobnyan, "Peubuet kheueh beu jroh-jroh peue nyang jipeuseumah lé bansa Israel khusos keu Ulôn, mangat gata hana tapeukuto nan Ulôn nyang suci. Ulôn kheueh TUHAN.

³Meunyoe sidroe nibak keuturonan gata lam keuadaan najih jijak peurab ubak keureubeuen-keureubeuen suci nyang jipeukhusos lé bansa Israel keu Ulôn, jihnyan hana jeuet jilayani nibak miseubah. Peuratoran nyan teutab na siumu masa. Ulôn kheueh TUHAN.

⁴Sidroe keuturonan Nabi Harun nyang keunong peunyakét kulét nyang mubahya, atawa nyang keunong peunyakét nibak alat keulamin jih sampoe jiteubiet meuliléh-liléh, teutam hán jeuet jipajoh keureubeuen suci sigohlom jihnyan teupeugah ka gleh. Sidroe imeum ka jeuet keu najih meunyoe imeum nyan tupéh ngon barang nyang meunajih sabab keunong manyét. Meunan cit di ureuëng nyan najih meunyoe ié manikam ureuëng nyan jiteubiet,

⁵atawa tupéh ngon beulatang dan ureuëng nyang najih.

⁶Sidroe imeum nyang deungon cara peue mantong ka jeuet keu najih, teuma najih nyan sampoe mata uroe jilob. Dan óh ka lheueh mata uroe jilob jih nyan gohlom jeuet jipajoh peunajoh nyang teupeu seumah ubak TUHAN meunyoe jihnyan gohlom jimanoe.

⁷Óh ka lheueh mata uroe jilob ureuëng nyan ka gleh dan ka jeuet jipajoh, sabab nyan kheueh peunajoh jih.

⁸Ureuëng nyan hana jeuet jipajoh sie beulatang nyang maté keudroe atawa beulatang nyang maté jiteugöm lé beulatang juwah. Meunyoe nyang lagée nyan jipajoh cit, ureuëng nyan ka jeuet keu najih. Ulôn kheueh TUHAN.

⁹Banmandum imeum harôh jitaát ubak peuratoran nyang Ulôn bri. Meunyoe hán, awaknyan salah dan teuma jih maté, sabab ji iengkeue ubak peuratoran-peuratoran nyan suci nyan. Ulôn kheueh TUHAN, dan Ulôn kheueh nyang peu khusos awaknyan keu Ulôn.

¹⁰Keureubeuen nyang teupeu khusos keu Ulôn nyang jeuet pajoh na kheueh lé keuluwarga imeum nyan keudroe; ureuëng laén hana jeuet, bahpi ureuëng nyan saboh rumoh ngon imeum nyan atawa ureuëng nyang tung upah ubak gobnyan.

¹¹Teuma namiet-namiet nyang jibloe lé imeum nyan ngon péng jih keudroe atawa nyang lahé lam rumoh jih nyan, jeuet ji pajoh peunajoh jeumba imeum nyan.

¹²Aneuëk inong sidroe imeum nyang meukawen ngon kon imeum, hana jeuet jipajoh keureubeuen nyan.

¹³Teuma aneuëk inong imeum nyang ka jeuet keu inong balée atawa nyang jicre teuma hana meu aneuëk laju jiwoe u rumoh ayah jih dan ka jeuet tanggong jaweueb ureuëng syiek jih nyan lom, jeuet jipajoh jeumba ureuëng syiek jih nyan. Teuma keuluwarga imeum mantong nyang jeuet pajoh keureubeuen nyan.

¹⁴Meunyoe sidroe nyang bukon anggota imeum nyang deungon hana jisaja ka jipajoh peunajoh nyang teupeuseumah ubak TUHAN, ureuëng nyan harôh jibri geunantoe ubak imeum jitamah lom dua ploh peureusen.

¹⁵Imeum-imeum hana jeuet jipeunajih keureubeuen nyang teupeu khusos keu Ulôn

¹⁶deungon jipeubiyeu jipajoh lé ureuëng nyang hana hak jih. Hai nyan ka teupeu jeuet ureuëng nyan salah dan teupeuteuka huköman ateueh ureuëng nyan. Ulôn kheueh TUHAN, dan Ulôn nyang peusuci peuseumahan nyan."

¹⁷TUHAN meufeureuman ubak Nabi Musa geuyue jak peusampoe ubak Nabi Harun, aneuëk-aneuëk gobnyan dan banmandum bansa Israel peuratoran-peuratoran nyang lagée nyoe. Meunyoe sidroe ureuëng Israel atawa ureuëng aséng nyang tinggai teutab di Israel jipeuseumah keureubeuen teutot keu jipeu lheueh kaôi, atawa keu keureubeuen keugalak droe, beulatang nyan harôh nyang agam dan hana jeuet na meucupa mangat jeuet teuteurimong.

²⁰Bék peuseumah beulatang nyang na cupa, sabab nyang lagée nyan TUHAN hana geuteurimong.

²¹Meunyoe sidroe ureuëng jipeuseumah ubak TUHAN keureubeuen peudamé keu jibayeue kaôi jih atawa keu keureubeuen keu galak droe, beulatang nyan hán jeuet na meucupa, mangat jeuet geuteurimong.

²²Bék kheueh teupeuseumah ubak TUHAN beulatang nyang buta, nyang patah tuleueng jih atawa nyang luka, nyang jitimoh barah ka meudanoh, nyang ka keunong peunyakét kulét atawa kude. Beulatang nyang lagée nyan bék jipeuseumah keu keureubeuen peunajoh u ateueh miseubah.

²³Keu keureubeuen keu galak droe gata jeuet tapeuseumah beulatang nyang hana sampoereuna hi jih; teuma keu teupeu lheueh kaôi, beulatang nyang lagée nyan hana jeuet teuteurimong.

²⁴Bék kheueh peuseumah keu TUHAN beulatang nyang aneuëk keumiro jih ka rusak sabab meuseupet, ka teukoh, luka leumbam-leumbam atawa teutiek. Hai nyang lagée nyan hana jeuet na di nanggroe gata.

²⁵Beulatang peulara nyang meuteumé nibak ureuëng aséng hana jeuet teupeuseumah keu keureubeuen peunajoh. Beulatang nyan teu anggab ka cupa dan hana jeuet teuteurimong.

²⁶Aneuëk leumô, aneuëk bubiri atawa aneuëk kame��ng nyang ban lahé harôh tinggai nibak nang jih treb jih tujoh uroe. Barô kheueh óh lheueh nyan beulatang nyan jeuet teuteurimong keu keureubeuen peunajoh.

²⁸Bék kheueh gata keureubeuen nang leumô atawa bubiri atawa kaméng meusigoe ngon aneuëk jih nibak uroe nyang saban.

²⁹Meunyoe gata tapeuseumah keureubeuen teurimong gaséh ubak TUHAN, gata peubuet kheueh nyan meunurot atoran nyang na, mangat keureubeuen gata geuteurimong.

³⁰Makheun kheueh keureubeuen nyan bak uroe nyan cit teuma, dan bék gata tinggai mubacut pi keu keusingoh beungoh.

³¹TUHAN meufeureuman, "Taát kheueh ubak peue-peue nyang Ulôn peurintah; Ulôn kheueh TUHAN gata.

³²Bék gata peukuto nan Ulôn nyang suci. Banmandum bansa Israel harôh jiseumah Ulôn sibagoe Nyang Mahasuci. Ulôn kheueh TUHAN dan Ulôn nyang peujeuet gata suci.

³³Ulôn ba gata teupeuteubiet nibak nanggroe Meusé, mangat Ulôn jeuet keu Po teu Allah gata. Ulôn kheueh TUHAN."

← Previous All Books Next →