Imeum-Imeum 9

24 verses

¹Siuroe óh lheueh upacara peubaiát nyan seuleusoe, bak uroe nyang keulapan, Nabi Musa laju geuhôi Nabi Harun ngon aneuëk-aneuëk gobnyan meunan cit bubena peumimpén bansa Israel.

²Geupeugah lé Nabi Musa ubak Nabi Harun, "Neucok kheueh laju saboh leumô agam nyang mantong muda dan saboh bubiri agam, mandum nyan hana meucupa. Neupeuseumah kheueh bandua boh beulatang nyan ubak TUHAN, leumô agam keu keureubeuen peu amphon desya dan bubiri agam keu keureubeuen nyang teutot.

³Dan neuyue kheueh laju bansa Israel mangat jipeuseumah saboh kaméng agam sibagoe keureubeuen peu amphon desya saboh aneuëk leumô dan saboh aneuëk bubiri nyang maséng-maséng meu umu sithon nyang hana meucupa keu keureubeuen nyang teutot.

⁴Neuyue cit ubak awaknyan mangat jikeureubeuen saboh leumô agam dan saboh kaméng agam sibagoe keureubeuen peudamé. Mandum nyan harôh awaknyan peuseumah keu TUHAN meusajan-sajan deungon keureubeuen teuhidang nyang ka teuboh minyéuk, sabab nibak uroe nyoe TUHAN geuteuka ubak awaknyan."

⁵Bandum nyang geupeugah lé Nabi Musa awaknyan ba ukeue Khimah, dan banmandum umat meugumpôi bak teumpat nyan keu meu iébadat ubak TUHAN.

⁶Laju geupeugah lé Nabi Musa, "TUHAN geuyue ubak droeneueh neupeubuet nyoe mangat droeneueh deueh neukalon cahya TUHAN teuka."

⁷Óh ka lheueh nyan gobnyan laju geupeugah ubak Nabi Harun, "Neujak kheueh laju ubak miseubah óh trok keunan neupeusiab laju keureubeuen peu amphon desya ngon keureubeuen nyang teutot, mangat desya droeneueh ngon desya umat geupeu amphon lé TUHAN. Neupeubuet kheueh nyan lagée nyang ka geupeurintah lé TUHAN."

⁸Ban geudeungoe haba nyan geujak kheueh laju Nabi Harun ubak miseubah ban sare trok keunan geusie laju saboh leumô agam keu keureubeuen peu amphon desya geuh keudroe.

⁹Aneuëk-aneuëk Nabi Harun jipeusampoe laju darah beulatang nyan ubak Nabi Harun, dan lé gobnyan laju geuculok jaroe geuh lam darah nyan, dan geusiliek laju ubak lungkée-lungkée nyang na nibak peuet boh sagoe miseubah. Óh ka lheueh nyan darah nyang na mantong leubeh laju geuro ubak aleue miseubah.

¹⁰Gapah, boh keuiéng ngon bagian nyang paleng gét nibak beulatang nyan geutot laju u ateueh miseubah, lagée nyang ka geupeurintah lé TUHAN ubak Nabi Musa.

¹¹Teuma asoe ngon kulét beulatang nyan geutot laju diluwa khimah-khimah.

¹²Óh lheueh nyan Nabi Harun laju geusie beulatang keureubeuen teutot keu droe geuh. Aneuëk-aneuëk Nabi Harun laju geujakjok darah beulatang nyan ubak gobnyan, dan darah nyan laju geurô ubak ban peuet boh sagoe miseubah.

¹³Óh lheueh nyan awaknyan jijok laju ubak gobnyan ulée dan bagian-bagian nyang laén nibak beulatang nyan, dan atranyan laju geutot u ateueh miseubah.

¹⁴Óh lheueh nyan asoe pruet ngon pha beulatang nyan laju geu rhah dan geutot laju ngon keureubeuen nyang teutot u ateueh miseubah.

¹⁵Óh ka lheueh nyan gobnyan laju geukeureubeuen kaméng sibagoe keureubeuen peu amphon desya umat. Kaméng nyan geusie dan geupeuseumah lagée keureubeuen peu amphon desya geuéh keudroe.

¹⁶Lheueh nyan geucok teuma beulatang keu keureubeuen teutot, laju geupeuseumah atranyan meunurot atoran.

¹⁷Óh lheueh nyan geupeuseumah teuma keureubeuen teuhidang; geucok laju saboh reugam teupông, geutot laju ateueh miseubah. Nyan kheueh sibagoe seunamah keu keureubeuen teutot tieb-tieb uroe.

¹⁸Geusie teuma lom saboh leumô agam dan saboh bubiri agam keu keureubeuen peudamé keu umat. Aneuëk-aneuëk Nabi Harun laju geujakjok darah nyan ubak gobnyan, ngon darah nyan laju geurô ateueh ban peuet boh sagoe miseubah.

¹⁹Bak teumpat-teumpat nyang na gapah nibak leumô dan kaméng nyan awaknyan peuduek

²⁰u ateueh dada mandua beulatang nyan, lé Nabi Harun laju geutot u ateueh miseubah.

²¹Dada ngon pha beulatang nyan geupeuseumah sibagoe keureubeuen nyang teujok keu TUHAN. Nyan na kheueh jeumba imeum-imeum, lagée nyang geupeurintah lé Nabi Musa.

²²Óh ka seuleusoe geupeuseumah banmandum keureubeuen nyan, Nabi Harun laju geubot jaroe geuh u ateueh umat Israel dan laju geubri beureukat ubak awaknyan, óh lheueh nyan laju geutron.

²³Nabi Musa ngon Nabi Harun laju geutamong lam Khimah TUHAN. Óh lheueh nyan awaknyan geuteubiet laju geubri beureukat ubak umat. Dan banmandum umat Israel deueh jikalon cahya TUHAN teuka.

²⁴Ngon hana teusangka-sangka TUHAN laju geupeutreun apui nyang jilahiéb habéh banmandum keureubeuen nyang teutot dan bagian-bagian nyang meugapah di ateueh miseubah. Watée umat Israel jikalon hai nyan, awaknyan meusurak-surak laju jisujut jiseumah Gobnyan.

← Previous All Books Next →