Markus 13

37 verses

¹Watée Isa geutinggai Baét Allah, sidroe lamkawan murit Geuh nyan jipeugah ubak Isa, "Bapak Gurée, Ci neungieng mandum bangunan-bangunan nyan, neukalon kheueh batée-batée jih. Hana wayang gagah jih!"

²Geujaweueb lé Isa, "Gata takalon bangunan-bangunan nyang rayeuk nyan, bukon? Hana meusineuk pih batée-batée nyan nyang na tinggai teususon nibak bangunan-bangunan nyan lagée sot nibak teumpat jih. Banmandum nyan teuma teureuloh sampoe án hanco."

³Óh lheueh nyan Isa laju geujak u Bukét Zaiton, dan duek bak teumpat nyang meuhadab keue ngon Baét Allah. Teuka laju Petrus, Yakobus, Yahya dan Andreas jijak ubak Gobnyan keu jikeuneuk marit ngon Gobnyan seucara pribadi.

⁴"Ci Bapak peugah ubak kamoe," kheun awaknyan ubak Isa, "pajan bandum nyan teuma teujadi? Dan peu kheueh tanda-tanda jih nyang teutunyok ubak nyan bahwa katroh watée jih?"

⁵"Waspada kheueh," jaweueb Isa, "bék sampoe gata keunong peungét.

⁶Ramé that nyang teuka jiba-ba nan Ulôn deungon jipeugah lagée nyoe, 'Ulôn kheueh jihnyan!' óh lheueh nyan jijak tipée ureuëng ramé.

⁷Meunyoe na gata deungoe su grám gruém dimideuen prang dan haba-haba keuhai muprang, bék teumakot. Hai-hai nyang lagée nyan keubiet teujadi, teuma hainyan bukon sibagoe tanda bahwa ka watée jih donya nyoe ka kiamat.

⁸Bansa nyang saboh teuma jimuprang jilawan bansa nyang laén. Nanggroe nyang saboh teuma jimuprang ngon nanggroe nyang laén. Dipat mantong teuma na geumpa bumoe dan bala deuek luwa biasa. Banmandum nyan na kheueh awai nibak nyang teuma teujadi, saban lagée sakét nyang jirasa lé ureuëng inong nyang keuneuk peulahé aneuëk.

⁹Gata harôh beu até-até, sabab gata jidrob dan jibahue ubak kantô-kantô mahkamah agama. Gata jipoh lam rumoh-rumoh iébadat. Gata teuma jiba jak meuhadab ubak peunguasa-peunguasa dan raja-raja sabab gata murit Ulôn. Dan watée nyan kheueh watée jih nibak gata keu gata meusaksi keuhai Ulôn keu awaknyan.

¹⁰Haba Gét nyang teuka nibak Po teu Allah nyan bah teutabu leubeh dilée ubak banmandum bansa.

¹¹Dan meunyoe gata jidrob dan jiba ubak kantô mahkamah agama, bék gundah keuhai peue nyang teuma gata peugah. Meunyoe ka troh watée jih keu gata peugah haba, peugah laju peue nyang teupeugah ubak gata óh troh bak watée jih. Sabab tutoe haba nyang gata peugah nyan bukon haba gata keudroe, teuma atra nyan teuka nibak Roh Allah.

¹²Ureuëng teuma jikhianat syedara jih keudroe keu jipoh maté. Nyan pih teuma teujadi lamkawan ayah ngon aneuëk. Aneuëk miet teuma jilawan mak ngon yah jih, dan jiseurah awaknyan keu jipoh maté.

¹³Gata teuma jibanci lé mandum ureuëng sabab gata murit Ulôn. Teuma ureuëng nyang meuteuen sampoe án akhé, ureuëng nyan teuma teupeuseulamat."

¹⁴"Gata takalon 'Keujeuhetan nyang Jipeuhanco' jidong bak teumpat nyang hán jeuet jidong le jih nyan. (Catetan keu peumbaca: peurati kheueh peue makna jih!) Bak masanyan ureuëng nyang na di Yudea bah jiplueng u gunong-gunong.

¹⁵Ureuëng nyang na ateueh bubong rumoh bék jitron dan jitamong lam rumoh jih keu jijakcok sapeue-sapeue.

¹⁶Ureuëng nyang mantong na di lampôh bék jiwoe keu jijakcok bajée jubah jih.

¹⁷Lumpah yo ngon teumakot luwabiasa bak ureuëng inong nyang teungoh mume dan mak-mak nyang mantong geupeumom aneuëk manyak!

¹⁸Meudoá kheueh mangat hai-hai nyang lagée nyan bék sampoe teujadi watée musém ujeuen.

¹⁹Bak uroe-uroe nyang lumpah teumakot ngon yo nyan teuma keusosahan nyang gohlom na teujadi, yoh phon Po teu Allah geupeujeuet donya nyoe sampoe bak uroe, dan hana teuma teujadi lé nyang lagée nyan bagoe.

²⁰Meunyoe Po teu Allah hana geupeupaneuk masa nyang lagée nyan, teuma hana meusidroe pih nyang na seulamat. Lé sabab umat Gobnyan, Allah geupeupaneuk masa nyang lagée nyan.

²¹Bak watée nyan meunyoe sidroe ureuëng jipeugah ubak gata, 'Ngieng kheueh, Raja Peuseulamat nyan na disinoe!' atawa, 'Ngieng, Gobnyan na disinan!' -- bék kheueh gata patéh ubak ureuëng nyan.

²²Sabab ureuëng-ureuëng peuseulamat peuleusu dan nabi-nabi peuleusu teuma teuka. Awaknyan jipeubuet buet-buet nyang luwa biasa dan buet-buet nyang ajaéb keu jipeungét gob meunyoe na mungken, umat Po teu Allah cit teuma.

²³Jadi, waspada kheueh! Banmandum nyan ka ulôn peugah ubak gata sigohlom hainyan teujadi."

²⁴"Óh ka lheueh leuseusoe masa nyang sosah nyan, mata uroe teuma jeuet keuseupôt, dan buleuen hana le meucahya.

²⁵Bintang-bintang di langét teuma rhot u bumoe, dan bubena nyang mat kuasa di angkasa raya teuma ka-ák ka-ok hana meuteuntée.

²⁶Bak masa nyan Aneuëk Manusia teuma deuh teukalon teuka rot lam awan deungon kuasa raya dan keuagongan gobnyan.

²⁷Gobnyan teuma geukirém malaikat-malaikat keu geupeusapat umat nyang geupiléh nibak ban peuet boh sagoe ujong bumoe, nibak ujong-ujong bumoe sampoe troh ubak ujong-ujong langét."

²⁸"Cok kheueh peulajaran nibak bak ara. Meunyoe ranteng-ranteng jih ijo dan leumiek, dan ka jipeuphon meutarôk, gata tateupeue bahwa musém khueng ka rab teuka.

²⁹Meunan cit meunyoe gata ngieng hai-hai nyan teujadi, gata tateupeue bahwa watée jih ka rab that.

³⁰Beutateupeue kheueh! Banmandum peuristiwa nyoe teuma teujadi sigohlom ureuëng-ureuëng nyang udeb bak saát nyoe maté banmandum.

³¹Langét ngon bumoe hanco, teuma haba ulôn teutab na siumu masa."

³²"Bah pih meunan, hana meusidroe pih jiteupeu pajan uroe jih dan pajan teuma jeuem jih. Malaikat-malaikat nyang na lam syeuruga hana, dan Aneuëk pih hana, teuma Bapak mantong nyang teupeue.

³³Ngon sabab nyan, gata harôh meujaga-jaga dan waspada, sabab gata hana tateupeue pajan watée jih.

³⁴Keuadaan jih na kheueh lagée sidroe ureuëng nyang tinggai rumoh jih dan jijak laju u teumpat nyang jiôh. Rumoh jih nyang jitinggai jiyue ubak namiet-namiet jih mangat ji urôh dan jijaga, dan geubri tugaih ubak awaknyan maséng-maséng. Ubak ureuëng nyang jaga babah pintoe, jipeu ingat mangat jijaga beugét-gét.

³⁵Sabab nyan, gata harôh meujaga-jaga, sabab gata hana tateupeue pajan ureuëng po rumoh nyan jiwoe -- mungken watée uroe seupôt, mungken watée teungoh malam, mungken bak watée suboh, atawa mungken bak watée mata uroe teubiet.

³⁶Meunyoe jihnyan teuka hana teusangka-sangka, bék kheueh sampoe jikalon gata teungoh teu éh dan teungét.

³⁷Peue nyang ulôn peugah nyoe ubak gata, ulôn peugah cit ubak mandum ureuëng laén: meujaga-jaga kheueh!"

← Previous All Books Next →