Mikha 1

16 verses

¹Mikha asai geuh di banda ubit nyang nan jih Moresyet. Bak masa nanggroe Yehuda geupeurintah meuturot-turot lé Raja Yotam, Ahas dan Hizkia, Mikha geuteurimong peusan TUHAN keuhai Samaria dan Yerusalem.

²Deungoe kheueh he bansa-bansa! Simak kheueh, he peunduduek bansaboh donya! TUHAN Nyang Mahamanyang teuka sibagoe saksi geulawan gata bube nyang na! Deungoe kheueh Gobnyan peugah haba di Baét Gobnyan nyang suci di Syeuruga.

³Gobnyan geutron nibak teumpat Geuh nyang suci dan geujak-jak di ateueh pucak-pucak gunong di bumoe.

⁴Gunong-gunong hanco dimiyueb tapak gaki Geuh lagée lilen lam apui nyang teungoh hu; tanoh nyan teupeurô jitamong lam barieh, lagée ié di ateueh bukét ji ile u miyueb.

⁵Bandum nyan teujadi sabab ureuëng Israel meudesya dan beurontak ubak Allah. Soe kheueh nyang jeuet keu sabab Israel meudesya? Bukon kheueh Samaria ma banda gobnyan keudroe? Soe kheueh nyang peusabab Yehuda geuseumah beurala? Peu kheueh bukon Yerusalem keudroe?

⁶Nyang kheueh sabab jih TUHAN meufeureuman, "Ulôn Lôn peujeuet Samaria sinamon rungka di padang, dan teumpat manusia pula bak anggô. Rungka-rungka banda nyang reuloh nyan Ulôn tiek lam barieh pantôn, dan sandi-sandi rungka nyan Ulôn kueh teuma.

⁷Patong-patong jihnyan nyang meyuém Lôn peuhanco, dan tieb-tieb beunda nyang teujôk ubak ureuëng-ureuëng inong nyang meutugaih bak kuil Ulôn tot, dan bandum beurala nyang na disinan Lôn peubinasa. Barang-barang nyan na kheueh hase iébadat ubak dewa keusuboran. Jinoe bandum nyan jiangkot lé musoh-musoh keu peuseumahan syukoe ubak dewa-dewa jihnyan."

⁸Sabab nyan kheueh, ulôn, si Mikha, lumpah peudeuh até dan apoh apah. Ulôn lôn jak hana ngon peukayan badan teulon dan hana teuma meuseulob sibagoe tanda pakriban seudeh jih até ulôn nyoe. Ulôn meuranggong lagée su asée uteuen dan meuông-ông lagée su cicém unta.

⁹Sabab luka-luka Samaria hana hase teupeu ubat, dan Yehuda keunong naseb nyang saban. Peutaka ka trok u Yerusalem, pintoe geureubang tanoh ié bansa ulôn.

¹⁰Bék kheueh tapeugah ubak musoh-musoh geutanyoe di Gat keuhai musibah geutanyoe; bék teuma tapeubiyeu awaknyan jikalon gata nyang teungoh mo. He peunduduek Bet-Le-Afra, meugule-gule kheueh lam abée sibagoe tanda putôh asa!

¹¹Gata bandum peunduduek Safir, tajak kheueh laju u teumpat nyang teuböih ngon hana tangui peukayan dan deungon peurasa malée! Ureuëng-ureuëng Zaanan hana jijeuet teubiet nibak banda. Su kliek peunduduek Bet-Haezel sibagoe tanda keu gata bahwa disinan ka hana le peulindongan.

¹²Peutaka nyang teuka nibak TUHAN ka trok bak babah pintoe geureubang Yerusalem! Lé sabab nyan, hana mungken ureuëng Marot jimeuharab gata tulông.

¹³Gata peunduduek Lakhis, tapasang kheueh guda bak geuritan prang! Gata tacuntoh desya-desya nyang jipeubuet di Israel sampoe lé sabab nyan Yerusalem pih ka meudesya.

¹⁴Jinoenyoe he ureuëng Yehuda gata gadôh banda Moresyet-Gat. Raja-raja Israel hana meuteumé bantuan le nibak banda Akhzib.

¹⁵He ureuëng Maresya, TUHAN geuseurah gata ubak musoh nyang keuneuk peutundok banda gata. Peumimpén-peumimpén Israel nyang meukuasa jimusöm lam guha-guha di Adulam.

¹⁶He ureuëng Yehuda, takoh kheueh ôk gata sibagoe tanda meukabong keu aneuëk-aneuëk gata nyang gata gaséh. Tacuko kheueh ôk bak ulée gata sampoe nyang tinggai cit bruek ulée saban lagée cicém nyang pajoh bangke, sabab bandum aneuëk-aneuëk gata teuangkot u teumpat nyang teuböih.

← Previous All Books Next →

Loading Bible Translation

First-time download in progress. This may take a few seconds…

←Bible|||

Acehnese Holy Bible Wordproject Bible