Nehemia 1

¹Nyoe kheueh laporan Nehemia bin Hakhalya keuhai buet-buet gobnyan. Bak buleuen Kislew nibak thon nyang keu dua ploh geumat keurajeuen lé Raja Artahsasta sibagoe raja nanggroe Persia, ulôn, Nehemia, na di Susan, ma banda keurajeuen nanggroe.

²Bak watée nyan, syedara ulôn, nyang nan jih Hanani, jiteuka nibak Yehuda deungon rakan jih na meupadub droe. Laju ulôn peugah ubak awaknyan keuhai keuadaan di Yerusalem dan keuadaan ureuëng-ureuëng Yahudi nyang ka jiwoe nibak teumpat nyang teuböih di Babel.

³Laju jicalitra lé awaknyan bahwa ureuëng-ureuëng nyang beukaih teuböih di Babel nyang ka jiwoe u tanoh ié jih nyan, jinoe udeb lumpah that seungsara dan hana piôh jihina lé bansa-bansa aséng nyang na ban sikeulileng jih nyan. Lom teuma, bintéh-bintéh beuton banda Yerusalem mantong hanco meutabu beba hana meukri sakri dan meunan cit deungon pintoe-pintoe geureubang jih gohlom teureuhab yoh phon hanco watée jitot ngon apui nibak masa ilée.

⁴Ban ulôn deungoe habanyan, di ulôn pih laju teuduek ngon leumoh sira ulôn mo. Meu uroe-uroe treb jih até ulôn seudeh. Ulôn pi laju puasa sira ulôn meudoá ubak Po teu Allah,

⁵"Ya TUHAN, Allah nyang mat kuasa didalam syeuruga. Droeneueh na kheueh Allah nyang Raya dan kamoe meuhadab ubak Droeneueh deungon até nyang lumpah teumakot. Droeneueh ya TUHAN teutab seutia neumumat ubak janji Droeneueh keu ureuëng nyang cinta ubak Droeneueh dan jitaát ubak peurintah Droeneueh.

⁶Neungieng kheueh ateueh ulôn ya TUHAN, dan neudeungoe kheueh doá nyang teungoh ulôn peu-ék u hadhirat Droeneueh uroe ngon malam deumi keu umat Israel, hamba-hamba Droeneueh nyan. Ulôn meungaku bahwa kamoe nyoe, umat Israel ka meudesya; ulôn dan indatu ulôn pi ka geupeubuet desya.

⁷Kamoe ka doraka ubak Droeneueh ya TUHAN dan ka kamoe iengkeue ubak peue nyang ka TUHAN peurintah. Meunan cit di kamoe hana kamoe turot ubak huköm-huköm nyang ka TUHAN bri keu kamoe meulalu Nabi Musa hamba Droeneueh nyan.

⁸Ya TUHAN, neuingat kheueh ubak tutoe haba Droeneueh nyang ka TUHAN peugah ubak Nabi Musa ateueh peurintah Droeneueh, nyang bahwa meunyoe kamoe, umat Israel, hana seutia ubak Droeneueh, kamoe teuma TUHAN peu crebre lamkawan bansa nyang laén.

⁹Teuma meunyoe kamoe woe lom ubak Droeneueh dan kamoe taát ubak banmandum peurintah Droeneueh, teuma kamoe nyang ka TUHAN peu crebre nyan teuma TUHAN peusapat lom, bahpi kamoe nyoe na nyang di ujong bumoe. Laju lé TUHAN kamoe neupuwoe ubak teumpat nyang ka TUHAN piléh keu teumpat iébadat ubak Droeneueh.

¹⁰TUHAN, kamoe nyoe na kheueh hamba-hamba Droeneueh, umat Droeneueh keudroe nyang ka TUHAN peuseulamat deungon kuasa dan teunaga Droeneueh nyang paleng hibat nyan.

¹¹Neudeungoe kheueh ya TUHAN doá ulôn dan doá banmandum hamba Droeneueh nyang laén, nyang jitem horeumat ubak Droeneueh. Neubri kheueh sunulông Droeneueh mangat jeuet nibak uroenyoe hamba Droeneueh nyoe meuhase meuteumé kamoe cok até jeuet keu geugaséh lé raja." Bak masanyan ulôn na kheueh nyang uroih ié jieb raja.