Nehemia 6

19 verses

¹Sanbalat, Tobia, Gesyem dan musoh-musoh kamoe nyang laén jideungoe bahwa kamoe karab seuleusoe kamoe peugét bintéh beuton, meunan seuleusoe banmandum ruhuéng-ruhuéng nyang na nibak beuton nyan kamoe sumpai, bahpi watée nyan kamoe gohlom seuleusoe kamoe pasang ôn-ôn pintoe nibak pintoe-pintoe geureubang banda.

²Laju Sanbalat dan Gesyem jikirém undangan keu ulôn mangat ulôn teuka jakmeurumpok deungon gobnyan di saboh gampông di Pantôn Ono. Teuma hainyan ulôn teupeue bahwa awaknyan jikeuneuk peuceulaka ulôn.

³Lé sabab nyan laju ulôn kirém jeunaweueb haba nyang lagéenyoe keu awaknyan, "Ulôn hana hase lôn teuka sabab teungoh ulôn keureuja buet nyang paleng peunteng. Buet ulôn nyan teuma teulanta meunyoe ulôn jak meurumpok deungon gata."

⁴Sampoe trok peuet goe awaknyan jikirém surat undangan nyang saban keu ulôn, dan tieb-tieb goe teuma ulôn kirém jeunaweueb nyang saban keu awaknyan.

⁵Watée nyang keulimong sidroe lamkawan aneuëk buah Sanbalat jijak dan jibri laju surat teubuka ubak ulôn

⁶nyang asoe jih na kheueh lagéenyoe: "Gesyem ka jipeubeutôi bahwa na haba meusáh-sáh lamkawan bansa-bansa nyang na tô-tô bansikeulileng nyoe, nyang jipeugah bahwa Gata dan ureuëng Yahudi nyang laén ka jireuncana jikeuneuk beurontak, dan nyan kheueh sabab jih Gata tapeugot lom bintéh beuton nyan. Dan jipeugah lom lé jihnyan bahwa Gata keuneuk baiát droe jeuet keuraja Yehuda,

⁷dan ka tatunyok napadub droe nabi keugeubaiát Gata jeuet keuraja di Yerusalem. Haba meusáh-sáh nyan ka pasti trok ubak raja. Sabab nyan, tateuka kheueh mangat tajak meurôk pakat keuhai nyan."

⁸Teuma ulôn laju lôn kirém haba dan lôn jaweueb lagéenyoe, "Banmandum nyang Gata peugah nyan na kheueh haba sulet dan nariet nyan Gata atoe-atoe keudroe."

⁹Awaknyan jicuba jipeutakot-takot kamoe mangat kamoe piôh meubuet nyang teungoh kamoe peubuet nyan. Ulôn laju meudoá, "Ya Allah, neupeu teuga kheueh ulôn!"

¹⁰Bak watée nyan cit teuma, di ulôn laju ulônjak u rumoh Semaya bin Delaya dan cucoe Mehetabeel, sabab gobnyan hana watée geujak ubak ulôn. Geupeugah lé gobnyan lagée nyoe, "Jak geutanyoe dua tajak musöm u Baét TUHAN . Tagunci banmandum pintoe jih, sabab na ureuëng nyang jikeuneuk poh maté gata. Mungken nibak malam nyoe gata teuma jipoh maté."

¹¹Teuma ulôn jaweueb lagéenyoe, "Ulôn nyoe kon ureuëng gusuen, dan bukon ureuëng galak jipeuplueng droe peulom teujak musöm. Sibagoe ureuëng biasa ulôn hana jeuet ulôn tamong u dalam Baét TUHAN, teuma ulôn hase maté. Hana jeuet, ulôn hana lôntem!"

¹²Óh ka lheueh ulôn timang-timang hainyan, barô kheueh ulôn sada bahwa peue nyang jipakat lé Semaya nyan kon teuka nibak Po teu Allah, teuma teuka nibak Tobia dan Sanbalat. Awaknyan bandua ka jisugok Semaya mangat jijak peusampoe nubuat nyan ubak ulôn.

¹³Meukeusut awaknyan na kheueh mangat ulôn takot dan ulôn seutôt peue nyang jipeugah lé awaknyan sampoe ulôn peubuet desya. Deungon lagée nyan awaknyan ka meuteumé watée keu jipeubrok nan ulôn mangat ulôn jeuet keuboh bibi rakyat ba.

¹⁴Ulôn meudoá ubak Po teu Allah, "Ya Allah Po, neuingat kheueh peue nyang ka jipeubuet lé Tobia dan Sanbalat nyan. Neu Huköm kheueh awaknyan! Meunan cit deungon nabiah nyang nan jih Noaja dan nabi-nabi nyang laén nyang jikeuneuk peutakot-takot ulôn."

¹⁵Bintéh beuton nyang teupeuget nyan jipajoh watée sampoe 52 uroe, dan seuleusoe bak tanggai dua ploh limong buleuen Elul.

¹⁶Yoh watée musoh-musoh kamoe lamkawan bansa nyang na bak binéh kamoe jideungoe hainyan, awaknyan jitakot gadôh iémuka, sabab banmandum ureuëng jiteupeue bahwa buet nyang teupeuget nyan na kheueh geutulông lé Po teu Allah.

¹⁷Teungoh lagéenyan bubena peumimpén Yahudi mantong cit jipeugot surat sumurat deungon Tobia.

¹⁸Jai that-that ureuëng Yahudi nyang meurakan deungon Tobia, sabab jih nyan meulintée Sekhanya bin Arah. Lom teuma Yohanan aneuëk Tobia, jimeukawen deungon aneuëk inong Mesulam aneuëk Berekhya.

¹⁹Bahpi Tobia hana putôh-putôh jituléh surat ubak ulôn keu jipeutakot-takot ulôn, teuma bubena peumimpén Yahudi nyan jikheun-kheun dikeue ulôn mandum nyang gét-gét keu Tobia nyan. Teuma, banmandum nyang ulôn peugah, jijak peutrok ubak Tobia.

← Previous All Books Next →

Loading Bible Translation

First-time download in progress. This may take a few seconds…

←Bible|||

Acehnese Holy Bible Wordproject Bible