Teubileueng 16

45 verses

¹Korah aneuëk Yizhar nibak kawöm Kehat, sukée Lewi, jimeubeurontak ubak Nabi Musa. Jihnyan jisukong teuma lé dua droe nibak sukée Ruben, na kheueh Datan dan Abiram aneuëk-aneuëk Eliab, dan Ôn aneuëk Pelet, dan lé 250 droe peumimpén meusyeuhu nyang jipiléh lé rakyat.

³Awaknyan meusigoe jijak meuhadab ubak Nabi Musa dan Nabi Harun dan jipeugah, "Kaséb nyan, hai Nabi Musa! Banmandum umat Israel ka teupeukhusos keu TUHAN, dan TUHAN na lamkawan geutanyoe banmandum. Teuma pakon kheueh neu anggab Droeneueh leubeh manyang nibak umat TUHAN?"

⁴Geudeungoe hai nyan, Nabi Musa laju geusujut ubak tanoh sira geumeudoá ubak TUHAN.

⁵Laju lé gobnyan geupeugah ubak Korah dan peungikot-peungikot jihnyan, "Singoh beungoh TUHAN teuma geutunyok ubak geutanyoe soe kheueh nyang po Gobnyan, dan soe teuma nyang teupeukhusos keu Geuhnyan. Ureuëng nyang geupiléh lé Gobnyan teuma geubri jijak peurab ubak Gobnyan.

⁶Singoh beungoh gata dan bubena peungikot gata jijakcok laju teumpat-teumpat apui, laju atranyan jipasoe deungon ngeue apui dan dupa, laju atranyan jiba ubak miseubah. Bah kheueh geutanyoe kalon singoh soe kheueh lamkawan geutanyoe nyang ka geupiléh lé TUHAN. Kaséb kheueh nyan, hai ureuëng-ureuëng Lewi!"

⁸Seulanjut jih Nabi Musa geupeugah ubak Korah, "Deungoe kheueh, hai ureuëng-ureuëng Lewi!

⁹Peu kheueh neupike nyoe soai ubit bahwa Po teu Allah ureuëng Israel geupiléh gata lamkawan ureuëng-ureuëng Israel mangat gata jeuet tapeurab ubak Gobnyan, dan gata meutugaih nibak Khimah Gobnyan, lom gata meukeureuja keu umat Israel dan gata peutimang awaknyan?

¹⁰Gata, Korah, dan banmandum ureuëng Lewi ka meuteumé keuhoreumatan nyan nibak TUHAN -- dan jinoenyoe gata tatuntot keu beuhase teuma jeuet keu imeum!

¹¹Meunyoe gata deungon peungikot-peungikot gata hana jipiôh meu ôk-ôk ubak Nabi Harun, ngon lagée nyan gata talawan TUHAN!"

¹²Laju Nabi Musa geuyue jaktawok Datan dan Abiram, teuma awaknyan jipeugah, "Kamoe han kamoe tem teuka!

¹³Gohlom séb droeneueh neuba kamoe meuteubiet nibak tanoh Meusé nyang suboe nyan keu neupoh maté kamoe di padang pasi nyoe? Harôh kheueh droeneueh neupeurintah kamoe?

¹⁴Nyang jikeubiet jih droeneueh hana neuba kamoe u tanoh nyang suboe, atawa neubri keu kamoe blang-blang dan lampôh-lampôh anggô jeuet keuhak milék pusaka kamoe! Jinoenyoe droeneueh neu keuneuk peungeuet kamoe! Hana, kamoe hana kamoe tem teuka"

¹⁵Nabi Musa bit that beungéh dan geupeugah ubak TUHAN, "TUHAN, bék kheueh neuteurimong peuseumahan awaknyan. Hán tom na ulôn peurugoe sidroe ureuëng pih nibak awaknyan; bahpi saboh beulatang keuleudée hántom na ulôn cok nibak awaknyan."

¹⁶Laju geupeugah lé Nabi Musa ubak Korah, "Gata teuka kheueh singoh uroe ubak Khimah TUHAN ngon gataba sajan ban 250 droe peungikot gata. Meunan cit deungon Nabi Harun na disideh. Gata harôh gataba teumpat apui gata maséng-maséng. Gata pasoe kheueh dupa di dalam teumpat apui nyan, laju atranyan gata peuseumah kheueh ubak TUHAN."

¹⁸Teuma tieb-tieb ureuëng nyang jijak cok teumpat apui jihnyan, laju jipasoe didalam nyan deungon ngeue apui meunan cit deungon dupa, laju gata dong dipintoe Khimah TUHAN meusajan ngon Nabi Musa dan Nabi Harun.

¹⁹Óh kalheueh nyan Korah laju jipeusapat banmandum umat, dan awaknyan laju jidong meubaréh muhadab keue ngon Nabi Musa dan Nabi Harun di babah pintoe Khimah TUHAN. Hana teusangka-sangka mantong banmandum umat deuh jikalon cahya hu TUHAN nyang meuble-ble.

²⁰Laju TUHAN meufeureuman ubak Nabi Musa dan Nabi Harun,

²¹"Gata yue surot kheueh laju nibak ureuëng-ureuëng nyan; Ulôn keuneuk peubinasa awaknyan jinoenyoe cit teuma."

²²Teuma Nabi Musa dan Nabi Harun laju geusujut ubak TUHAN sira geupeugah, "Ya Allah Po, Droeneueh nyang bri udeb ubak mahluk nyang udeb. Meunyoe teuma na sidroe mantong nyang meudesya, peu kheueh Droeneueh neubeungéh keu banmandum umat Droeneueh?"

²³TUHAN meufeureuman ubak Nabi Musa, "Gata yue kheueh laju bubena ureuëng nyan ji minah nibak khimah-khimah Korah, Datan dan Abiram."

²⁵Laju Nabi Musa deungon ji-iréng lé peumimpén bansa Israel, geujak u teumpat Datan dan Abiram.

²⁶Nabi Musa geupeugah bak ureuëng-ureuëng Israel, "Gata wéeh kheueh laju nibak khimah ureuëng-ureuëng jeuhet nyoe dan bék gatamat sapeue pi nibak hareuta milék awaknyan. Meunyoe gata hana tapatéh, gata teuma geupeubinasa meusigoe deungon awaknyan sabab lé desya-desya nyang awaknyan peubuet."

²⁷Laju ureuëng-ureuëng Israel nyan jiwéeh nibak khimah-khimah Korah, Datan dan Abiram. Datan dan Abiram ka jiteubiet dan ka jidong di babah pintoe khimah awaknyan maséng-maséng, meusajan deungon aneuëk dan peurumoh jih nyan.

²⁸Laju Nabi Musa geupeugah, "Deungon nyoe gata teuma neuteupeue bahwa TUHAN ka geu utus ulôn keu lôn peubuet banmandum nyoe dan bahwa nyan bukon keuheundak ulôn keudroe.

²⁹Meunyoe ureuëng nyan maté deungon cara biasa, deungon hana huköm sapeue pih nibak Po teu Allah, nyan kheueh tanda jih TUHAN hana geu utus ulôn.

³⁰Teuma meunyoe TUHAN geupeubuet sigala sisuatu nyang hántom gata deungoe nyang ka nyoe, dan meunyoe tanoh beukah keu jiuét awaknyan meusigoe deungon hareuta milék awaknyan, sampoe awaknyan jitamong udeb-udeb u dalam donya ureuëng maté, gata teupeu kheueh lé gata bahwa ureuëng-ureuëng nyan na kheueh nyang lawan TUHAN."

³¹Hana treb teuma óh lheueh Nabi Musa nyan geupeugah haba, laju tanoh dimiyueb gaki awaknyan beukah,

³²dan laju jiuét awaknyan deungon banmandum keuluwarga awaknyan meunan cit banmandum peungikot Korah, dan banmandum hareuta beunda awaknyan.

³³Dan rhot kheueh awaknyan udeb-udeb u dalam donya ureuëng maté deungon banmandum hareuta awaknyan. Tanoh nyang beukah nyan laju teuma meucob lom dan awaknyan gadôh sapansapa jiuét lé bumoe.

³⁴Banmandum ureuëng Israel nyang na disinan laju jipeuplueng droe bak watée jideungoe awaknyan jitawök, "Jak plueng! Enteuk geutanyoe jiuét lé bumoe!"

³⁵Laju TUHAN geupeutreun teuma apui dan di apuinyan laju teuma jitot sampoe hangôh ban 250 droe nyang jipeuseumah dupa nyan.

³⁶TUHAN meufeureuman lom ubak Nabi Musa,

³⁷"Gata yue kheueh Eleazar aneuëk Imeum Harun jeuet jijak beuôt teumpat-teumpat apui nibak rungka-rungka nyang teutot dan meusipreuk abée ngon adang nyan u teumpat nyang laén, sabab teumpat apui nyan na kheueh suci. Barang-barang nyan na kheueh nyan jipeuseumah lé ureuëng nyang ka geuhuköm maté sabab desya nyang jipeubuet. Barang-barang nyan na kheueh suci ngon gleh sabab ka jipeuseumah dikeue TUHAN, sabab nyan bah kheueh jeuet keu leumpeng-leumpeng lipéh keulapék blah luwa miseubah. Hainyan teuma jeuet keu peuingat keu bansa Israel."

³⁹Teuma di Imeum Eleazar laju geujak cok teumpat-teumpat apui nyan dan geuyue laju ureuëng laén jijak teumpa mangat hase jeuet keu leumpeng-leumpeng nyang lipéh jeuet keu keulapék blah luwa miseubah.

⁴⁰Nyan na kheueh sibagoe peuingat keu bansa Israel bahwa seulaén keuturonan Nabi Harun, hana meusidroe pi jeuet jijak ubak miseubah keu jijak tot dupa keu TUHAN. Ureuëng nyang iengkeue peuratoran nyan teuma geupeubinasa lagée Korah dan peungikot-peungikot jihnyan. Banmandum nyan geupeubuet lagée nyang geupeurintah lé TUHAN ubak Eleazar rot Nabi Musa.

⁴¹Óh singoh beungoh nyan banmandum umat Israel jibeungéh ubak Nabi Musa ngon Nabi Harun. Awaknyan jipeugah, "Gata poh maté umat TUHAN."

⁴²Teungoh awaknyan jimeusapat jilawan Nabi Musa ngon Nabi Harun, awaknyan jipaléng ubak Khimah TUHAN, dan deuh laju jikalon awan ka teutob u ateueh Khimah nyan, dan leumah kheueh cahya keuhai TUHAN teuka.

⁴³Nabi Musa dan Nabi Harun laju geujak ubak Khimah TUHAN nyan,

⁴⁴laju TUHAN meufeureuman ubak Nabi Musa,

⁴⁵"Gata surot kheueh nibak awaknyan. Ulôn keuneuk peubinasa awaknyan nibak teumpat nyan cit teuma." Ban dua awaknyan pi laju geusujut geuseumah,

⁴⁶laju Nabi Musa geupeugah ubak Nabi Harun, "Neucok kheueh laju teumpat apui droeneueh, neupaso laju deungon ngeue apui nibak miseubah dan neupasoe teuma deungon dupa di ateueh nyan. Neuba kheueh laju deungon beubagaih ubak umat dan neupeugét kheueh laju upacara peu amphon desya keu awaknyan. Bagaih! Meureuka TUHAN nyan ka lumpah that brat dan bala ka jipeuphon."

⁴⁷Nabi Harun laju geupeubuet peue nyang geupeugah lé Nabi Musa nyan. Gobnyan laju geuplueng lamkawan umat nyang teungoh meusapat nyang ka jipeuphon keunong peunyakét bala nyan. Teuma Nabi Harun laju geupeuduek dupa nyan di ateueh ngeue apui, dan geupeubuet laju upacara peu amphon desya keu umat nyan.

⁴⁸Peunyakét bala nyan laju teudong, dan Nabi Harun na lamkawan ureuëng nyang mantong udeb dan nyang ka maté.

⁴⁹Nyan maté bak watée nyan na 14.700 droe, hana jitamong keunan nyang maté nibak beurontak Korah.

⁵⁰Óh kalheueh bala nyan jipiôh, Nabi Harun laju geugisa ubak Nabi Musa nibak babah pintoe Khimah TUHAN.

← Previous All Books Next →