PTL Lyrics

PRAISE THE LORD LYRICS

Daily Reading Bible

✅ Shared successfully

Acehnese Holy Bible Wordproject Bible

Amsal 19

29 verses

¹Leubeh gét ureuëng gasien nyang teupat udeb jih, nibak ureuëng bangai nyang galak jimeusulet.

²Bahpi jeumôt that, meunyoe hana iéleumé peungeutahuan nyang lagée nyan hana meuguna; ureuëng nyang buet jih meudab-dab jai that jipeubuet salah.

³Manusia jipeurugoe droe jih keudroe lé sabab bangai jihnyan, óh lheuehnyan jipeusalah TUHAN ateueh hai nyan.

⁴Ureuëng kaya, rakan jihnyan sabe meutamah; teuma di ureuëng gasien sabe jitinggai lé rakan droejih.

⁵Ureuëng nyang meusulet di kantô peungadelan, hana teuma tinggai lé huköman.

⁶Tieb-tieb ureuëng jiuseuha jicok até ureuëng peunteng; dan banmandum ureuëng jitem meurakan ngon ureuëng dermawan.

⁷Ureuëng gasien jipeujayéh lé syedara jih, peuteuk lom lé rakan jihnyan. Pakriban mantong jihnyan jiuseuha, jihnyan hana hase jipakat awaknyan.

⁸Soe nyang tiyeub iéleumé peungeutahuan, ureuëng nyan tanda jigaséh keudroe jihnyan; dan soe mantong nyang ji-ingat ubak peue nyang ka jimeurunoe, ureuëng nyan teuma mubahgia.

⁹Ureuëng nyang meusulet di kantô peungadelan pasti teuma geuhuköm dan geupeubinasa.

¹⁰Hana patot sidroe ureuëng bangai udeb jih meuwáh, dan hana teuma patot sidroe namiet jijok peurintah keu peunguasa.

¹¹Ureuëng bijaksana hase jipeuteun meunyoe jihnyan beungéh. Ureuëngnyan teupujoe sabab hana jipakoe gob laén nyang salah ateueh jihnyan.

¹²Meunyoe raja beungéh lagée su singa teuma-uëm; dan meunyoe raja gét lagée ié mbon nyang basah nibak meubagoe rupa sinaman.

¹³Aneuëk nyang bangai jipeuhanco ureuëng syiek jih. Peurumoh nyang galak meukröb-kröb lagée ié meutreb-treb nyang hana putôh-putôh.

¹⁴Rumoh dan hareuta hase meuteumé nibak ureuëng syiek, teuma peurumoh nyang bijaksana na kheueh karonya nibak TUHAN.

¹⁵Meuayéum-ayéum teupeujeuet ureuëng jiteungét meusineunya, dan akhé jih ureuëng beu-oe nyan ka jiteuka deuk.

¹⁶Ureuëng nyang taát ubak peurintah Allah teuma seulamat, dan ureuëng nyang hana jihareuga keu peurintah nyan teuma maté.

¹⁷Ureuëng nyang tulông ureuëng gasien saban lagée ureuëng bri pinjaman ubak TUHAN; singoh TUHAN geubalaih teuma.

¹⁸Peuteureuteb laju aneuëk gata simantong na harapan; meunyoe hana, saban cit gata meuharab ubak keuhancoran.

¹⁹Bah kheueh ureuëng nyang bagaih beungéh jirasa keudroe akibat jih. Meunyoe gata tatulông jihnyan, gata teuma tatamah beungéh gobnyan.

²⁰Meunyoe gata galak meurunoe dan tadeungoe naseuhat, singoh gata jeuet keu ureuëng nyang meuhikeumat.

²¹Manusia le that reuncana, teuma keuputosan TUHAN kheueh nyang teulaksana.

²²Sifeuet nyang teuharab nibak sidroe-droe ureuëng na kheueh keuseutiaan. Leubeh gét jeuet keu ureuëng gasien nibak jeuet keu ureuëng sulet.

²³Horeumat kheueh TUHAN, udeb gata teuma mubahgia; gata teuma puih dan beubaih nibak bala.

²⁴Na ureuëng nyang beu-oe nyang bit-bit beu-oe; jisuleueng peunajoh lam babah jih mantong hánjitem.

²⁵Meunyoe ureuëng sombong teuhuköm, ureuëng nyang hana peungalaman jeuet keu peulajaran. Meunyoe ureuëng meubudoe teu seugah gobnyan teuma meutamah bijaksana.

²⁶Aneuëk nyang ji iénanya dan ji use ureuëng syiek jih, na kheueh aneuëk nyang that-that jipeumalée dan aneuëk doraka.

²⁷Aneuëk ulôn, meunyoe gata hana tatem meurunoe le, gata teuma tuwoe deungon peue nyang ka gata meurunoe.

²⁸Ureuëng nyang jitem bri keusaksian nyang peuleusu, saban cit jihnyan ka jipeubeuáh huköm; peuceulaka ureuëng laén, mangat rasajih nibak ureuëng jeuhet.

²⁹Ureuëng bangai nyang manyang até pasti teupoh.

← Previous All Books Next →

Amsal 19 — Acehnese Holy Bible Wordproject Bible | Holy Bible | PTL Lyrics