PTL Lyrics

PRAISE THE LORD LYRICS

Daily Reading Bible

✅ Shared successfully

Acehnese Holy Bible Wordproject Bible

Zabur 102

29 verses

¹Doá ureuëng seungsara nyang dalam keuadaan hék ngon leusu apoh apah ubak TUHAN.

²Ya TUHAN, deungoe kheueh doá ulôn, bah kheueh meuhôi ulôn nyoe trok ubak Droeneueh.

³Bék neupaleng nibak ulôn meunyoe ulôn jiteuka susah. Neudeungoe kheueh meunyoe ka ulôn meuhôi, dan neujaweueb kheueh doá ulôn.

⁴Udeb ulôn nyoe ya TUHAN, deungon sikeujab gadôh lagée asab; dan tuleueng-tuleueng ulôn seu-uem tutông lagée apui.

⁵Ulôn hék ngon leusu lagée naleueng tho, dan hana nafeusu keu lôn pajoh bu.

⁶Ulôn meurang-rang deungon su nyang nyareng; badan lôn pijuet ka tinggai kulét ngon balot tuleueng.

⁷Ulôn lagée cicém undan nyang na dipadang pasi, dan lagée kleung keutôk-tôk nyang tinggai bak teumpat rungka bangunan nyang seungue.

⁸Ulôn hana hase lôn éh, ya TUHAN, lagée cicém keuseupian di ateueh bubông rumoh.

⁹Siuroe seupôt musoh jihina ulôn; nan ulôn jipeujeuet keu kutok lé ureuëng nyang beungéh keu ulôn.

¹⁰Abée nyang ulôn pajoh lagée lôn makheun ruti, ié nyang ulôn jieb meulawok deungon ié mata,

¹¹sabab Droeneueh ka neubeuôt dan neutiek ulôn nibak beungéh Droeneueh nyang luwa biasa.

¹²Udeb ulôn jijak lagée bubayang óh uroe seupôt; dan ulôn jeuet keulayée lagée ôn naleueng nyang keunong uroe.

¹³Teuma Droeneueh, ya TUHAN, Raja keu siumu masa, teutab ji ingat tron meutron.

¹⁴Droeneueh neubeudôh dan neugaséh ubak Sion, watée jih ka trok keu teubalaih gaséh ubak jihnyan.

¹⁵Sabab hamba-hamba Droeneueh jisayang keu jihnyan, bahpi jihnyan ka jeuet keubarang rungka-rungka. Awaknyan meurasa gaséh keu jihnyan, bahpi jihnyan ka jeuet keu abée.

¹⁶Kuasa TUHAN teutab jitakot lé bansa-bansa; dan keuagongan Gobnyan teutab jigalak lé bubena raja-raja,

¹⁷meunyoe TUHAN ka geupeudong lom Sion, dan geubeudôh dalam keuagongan Gobnyan.

¹⁸Gobnyan geudeungoe doá umat Geuh nyang meularat, dan hana geutulak peue nyang jilakée lé awaknyan.

¹⁹Tuléh kheueh banmandum peue nyang geupeubuet lé TUHAN keu angkatan nyang teuma teuka, jeuet bansa nyang gohlom lahé hase jipujoe Gobnyan.

²⁰TUHAN geupandang rot teumpat Geuh nyang manyang, rot lam syeuruga Gobnyan geukalon u bumoe

²¹mangat geudeungoe apoh apah ureuëng lam peunjara dan geupeubeubaih ureuëng nyang teuhuköm maté.

²²Dan nan Gobnyan jipeugah di Sion, dan Gobnyan jipujoe-pujoe di Yerusalem,

²³watée bansa-bansa dan keurajeuen nanggroe jimeuhimpon keu meungabdi ubak TUHAN.

²⁴TUHAN geupeupatah teunaga ulôn watée ulôn mantong muda, dan geupeupaneuk umu ulôn.

²⁵Laju ulôn peugah, "Ya Allah, bék kheueh neucok nyawöng ulôn nibak siteungoh udeb ulôn."

²⁶yoh masa ilée Droeneueh neupeujeuet bumoe; meunan cit deungon langét na kheueh karya nyata Droeneueh.

²⁷Banmandum nyan teuma habéh, teuma Droeneueh teutab na; banmandum nyan jeuet keu useueng lagée peukayan. Droeneueh neutiek atranyan lagée bajée tuha, dan banmandum óh lheuehnyan sapan sapa.

²⁸Teuma Droeneueh teutab saban, udeb Droeneueh hana keuneulheueh.

²⁹Aneuëk cucoe kamoe udeb deungon teuntram, dan sabe aman lam lindongan Droeneueh.

← Previous All Books Next →

Zabur 102 — Acehnese Holy Bible Wordproject Bible | Holy Bible | PTL Lyrics