Zabur 106

¹Pujoe kheueh TUHAN!

²Soe nyang hase jipeugah keuhai keuhebatan TUHAN, dan jipujoe nyang layak patot keu Gobnyan?

³Mubahgia kheueh ureuëng nyang taát ubak peurintah-peurintah Gobnyan, dan hántom na salah lam tindakan Geuhnyan.

⁴Ingat kheueh keu ulôn, ya TUHAN, deumi keujroh Droeneueh nibak umat Droeneueh keudroe, dan neutulông kheueh ulôn meunyoe Droeneueh neupeuseulamat awaknyan.

⁵Seumoga deuh ulôn ngieng keumakmuran ureuëng-ureuëng nyang neupiléh dan meusuka cita meusajan umat Droeneueh. Seumoga ulôn meubangga dan meugeumbira meusajan ureuëng nyang ka jeuet keuhak milék Droeneueh.

⁶Kamoe ka meudesya lagée indatu kamoe; kamoe ka kamoe peubuet jeuhet dan doraka ubak Droeneueh.

⁷Watée mantong di nanggroe Meusé indatu kamoe hana geumuphom; karya Droeneueh nyang lumpah hebat nyan hana geumeuphom. Awaknyan ka tuwoe ubak geunaséh Droeneueh nyang meulimpah ruwah, dan bak binéh Laôt Geulagah awaknyan geumeubeurontak ubak Nyang Mahamanyang.

⁸Teuma TUHAN teutab geupeuseulamat awaknyan deumi keu droe Geuh keudroe, mangat keupeukasaan Gobnyan jeuet keunyata.

⁹Ateueh peurintah Gobnyan Laôt Geulagah tho kreng, laju Gobnyan geuba umat Geuh jijak rot laôt nyang ka tho hana le meu ié, lagée geujak didalam padang pasi.

¹⁰Deungon na lagée nyan awaknyan ka geupeuseulamat nibak musoh dan lawan, dan geupeubeubaih awaknyan nibak kuasa musoh.

¹¹Teuma ié laôt nyang raya nyan laju meukab lom teuma, bubena lawan-lawan awaknyan ka habéh ngob lam laôt nyan; hana meusidroe pih nibak lawan-lawan awaknyan nyang na tinggai.

¹²Óh lheuehnyan barô kheueh umat Gobnyan jipeucaya ubak janji nyang ka geupeugah laju jimeu zike sira meuca-e lagu pujoe keu TUHAN.

¹³Teuma óh lheuehnyan awaknyan laju tuwoe ubak buet TUHAN, jimeubuet lom ban galak droe deungon hana jilakée naseuhat ubak Gobnyan.

¹⁴Di teungoh padang pasi awaknyan jiteuka nafeusu, laju jiujoe Po teu Allah.

¹⁵Gobnyan laju geubri peue nyang jilakée lé awaknyan, teuma meunan cit geupeutron bala peunyakét nyang jiseurang awaknyan.

¹⁶Di padang pasi nyan awaknyan laju teuka iri até ubak Nabi Musa meunan cit ubak Nabi Harun hamba Gobnyan nyang suci.

¹⁷Óh lheueh nyan bumoe pih laju beukah dan laju teu uét Datan, laju teutôb Abiram meusajan ngon keuluwarga gobnyan habéh mandum.

¹⁸Óh lheuehnyan apui nyang raya laju jitron jijak sama keulompok awaknyan, habéh tutông hangöh banmandum nyang doraka ubak Gobnyan.

¹⁹Di ateueh Gunong Sinai awaknyan laju jipeugôt aneuëk bubiri nibak méuh, dan laju jiseumah patong tuangan nyang jipeuget keudroe.

²⁰Awaknyan laju jituka Allah nyang agong deungon patong leumô nyang jirot naleueng.

²¹Awaknyan ka tuwoe ubak Allah nyang ka peuseulamat droe jih Allah nyang ka geupeubuet hai-hai nyang raya di nanggroe Meusé.

²²Keubit lumpah that dahsyat buet-buet nyang ka geupeubuet di nanggroe nyan, dan luwa biasa tindakan Gobnyan di Laôt Geulagah.

²³Dan Allah jiteuka niet keuneuk geupeubinasa awaknyan, teuma bagaih-bagaih geutam lé Nabi Musa, ureuëng nyang ka geupiléh lé Gobnyan. Nabi Musa jeuet keu ureuëng nyang dong teungoh keu awaknyan, sampoe Allah nyang ka that beungéh nyan hase reuda.

²⁴Óh lheuehnyan awaknyan laju jitulak nanggroe nyang ceudah nyan, sabab hana jipatéh ubak janji Po teu Allah.

²⁵Awaknyan jimeudaleh dalam khimah droe jih dan hana jitem deungoe le su TUHAN.

²⁶Teuma deungon geumeusumpah Gobnyan geumeujanji geupeu habéh awaknyan di padang pasi nyang raya.

²⁷Keuturonan awaknyan geuböih lamkawan bansa-bansa dan geupeu crebre di nanggroe-nanggroe aséng.

²⁸Óh lheuehnyan di Peor awaknyan jiseumah teuma Baal, dan jipajoh keureubeuen nyang jipeuseumah keu dewa-dewa.

²⁹Buet nyang lagée nyan sampoe jiteuka beungéh TUHAN nyang luwa biasa, sampoe awaknyan habéh jiseurang lé bala peunyakét nyang hana teukira.

³⁰Teuma Pinehas laju geubeudôh geujak huköm bubena nyang meusalah, deungon na nyang lagée nyan jipiôh kheueh peunyakét nyang lumpah meupalo nyan.

³¹Buet jih nyang lagée nyan geuanggab sibagoe jasa nyang raya keu gobnyan, dan ji ingat siumu masa.

³²Meunan cit nibak mon-mon Meriba TUHAN geubeungéh keu awaknyan, dan Nabi Musa keudroe lumpah sosah sabab ulah buet awaknyan.

³³Sabab buet awaknyan até gobnyan meutamah tunu, sampoe gobnyan geumeututoe deungon hana seumike.

³⁴Bansa-bansa nyang laén hana geupeuhanco, lagée nyang geupeurintah lé TUHAN.

³⁵Awaknyan meujampu deungon bansa-bansa nyan, dan jiseutôt peue nyang jipeubuet lé ureuëng nyang hana jituri Allah.

³⁶Dan awaknyan laju jiseumah beurala-beurala, dan nyan kheueh jeuet keusabab keuhancoran awaknyan.

³⁷Awaknyan jikeureubeuen aneuëk-aneuëk droe jih keu beurala-beurala Kanaan.

³⁸Meunan cit awaknyan jipeurô darah ureuëng-ureuëng nyang meusalah, darah aneuëk-aneuëk gobnyan keudroe, keu jikeureubeuen ubak beurala; sampoe nanggroenyan ka jipeurusak.

³⁹Sabab buet-buet awaknyan nyang lagéenyan awaknyan ka jeuet keu kuto, dan hana seutia ubak Po teu Allah.

⁴⁰Dan beungéh TUHAN pi laju hu lagée apui keu awaknyan, Gobnyan ka glak deungon atra Geuh keudroe.

⁴¹Dan geujok kheueh awaknyan keu bansa-bansa, geupeubiyeu mantong awaknyan jikuasa lé musoh.

⁴²Laju awaknyan jitindéeh lé musoh-musoh jih keudroe, dan jipeutaklok dimiyueb kuasa awaknyan.

⁴³Meu ulang-ulang TUHAN geupeubeubaih awaknyan, teuma awaknyan teutab galak bak buet beurontak, sampoe awaknyan habéh binasa nibak desya-desya jih keudroe.

⁴⁴Teuma TUHAN geudeungoe cit apoh apah awaknyan, dan Gobnyan teutab geukalon sosah awaknyan.

⁴⁵Deumi awaknyan Gobnyan teuingat keu janji nyang ka geupeugah dan geugaséh keu awaknyan sabab geunaséh Geuh nyang raya.

⁴⁶Gobnyan laju geupeujeuet awaknyan beujigaséh lé mandum ureuëng nyang jiteun awaknyan.

⁴⁷Peuseulamat kheueh kamoe, ya TUHAN kamoe, neupeusapat kheueh kamoe lamkawan bansa-bansa, mangat kamoe jeuet meusyukoe dan kamoe pujoe nan Droeneueh nyang suci.

⁴⁸Pujoe kheueh TUHAN, Allah Israel, phon saátnyoe dan siumu masa. Bah kheueh banmandum ureuëng jipeugah, "Amin!"