Zabur 132

17 verses

¹Lagu ziarah.

²Bék tuwoe seumayang ubak Droeneueh, ya TUHAN, keu kaôy gobnyan ubak Droeneueh Nyang Mahateuga, Allah Nabi Yakub.

³Kheun Gobnyan, "Ulôn hana lôn meureuhat di rumoh ulôn atawa lôn teungéut ateueh teumpat éh ulôn,

⁵sigohlom lôn peuna baét keu Po teu Allah Nabi Yakub, teumpat tinggai keu TUHAN Nyang Mahateuga."

⁶Di Betlehem na ta deungoe keuhai Peuto Peujanjian, óh lheuehnyan laju meurumpok di padang Yaar.

⁷Jak kheueh geutanyoe tajak u teumpat tinggai TUHAN, dan ta seumah Gobnyan dikeue takhta Geuh.

⁸Teuka kheueh dan tinggai kheueh di Baét Droeneueh, ya TUHAN, meusajan deungon Peuto Peujanjian, lambang kuasa Droeneueh.

⁹Seumoga umat Droeneueh meusurak geumbira, dan banmandum teungku imeum Droeneueh sabe udeb meunurot nyang Droeneueh lakée.

¹⁰Deumi Nabi Daud, hamba Droeneueh, bék kheueh neutulak raja nyang Droeneueh piléh.

¹¹TUHAN ka geumeusumpah ubak Nabi Daud; Gobnyan hana geu iengkeue ubak janji Gobnyan. Feureuman Gobnyan, "Sidroe lamkawan aneuëk gata Ulôn baiát jeuet keuraja mangat jimat peurintah geunantoe gata.

¹²Meunyoe aneuëk-aneuëk gata seutia ubak peujanjian Ulôn, dan jitaát ubak peurintah-peurintah Ulôn, dan keu siumu masa keuturonan awaknyan jigantoe gata sibagoe raja."

¹³Sabab TUHAN ka geupiléh Sion; Gobnyan geulakée nyan keu teumpat tinggai Gobnyan.

¹⁴Geupeugah lé Gobnyan, "Disinoe kheueh teumpat tinggai Ulôn keu siumu masa, Ulôn keuneuk mat peurintah nibak teumpat nyoe.

¹⁵Peue mantong nyang jipeureulée Ulôn bri deungon meulimpah, ureuëng-ureuëng jihnyan nyang gasien Ulôn bri makheun sampoe án troe.

¹⁶Teungku-teungku imeum jih jipeuleumah keuseulamatan nibak ulôn; umat jihnyan meuca-e dan meusurak geumbira.

¹⁷Disinoe sidroe lam keuturonan Nabi Daud Lôn baiát jeuet keuraja; peumeurintah jihnyan Ulôn peukong.

¹⁸Keurajeuen jih sabe dalam seujahteura, teuma banmandum musoh-musoh jihnyan meuteumé malée."

← Previous All Books Next →