Zabur 135

¹Pujoe kheueh TUHAN!

²nyang meubakti di Baét TUHAN di teumpat tinggai Allah geutanyoe.

³Pujoe kheueh TUHAN, sabab Gobnyan gét, dan pujoe kheueh nan Gobnyan, sabab Gobnyan murah até.

⁴Gobnyan geupiléh Nabi Yakub keu droe Gobnyan, dan umat Israel geupeujeuet keu hak milék Gobnyan.

⁵Sabab ulôn teupeue bahwa TUHAN nyan na kheueh keubit that raya, Gobnyan agong leubeh nibak dewa peue nyang na.

⁶Gobnyan hase geupeubuet peue mantong nyang geugalak, di langét dan di ateueh bumoe, di laôt dan di samudra nyang lhok.

⁷Nibak ujong bumoe Gobnyan geupeutron awan, dan geupeujeuet laju kilat keu geupeutron ujeuen. Óh lheuehnyan laju geupeurintah ubak angén mangat jiteubiet nibak teumpat jih teugumpôi.

⁸Di Nanggroe Meusé Gobnyan geupoh maté banmandum aneuëk nyang tuha bah kheueh nyan aneuëk manusia meunan cit deungon aneuëk beulatang.

⁹Disinan le that geupeubuet buet nyang ajaéb dan tanda keu geuhuköm raja meunan cit banmandum peugawée raja.

¹⁰Gobnyan geupeubinasa bansa nyang le, dan geupoh maté raja-raja peukasa:

¹¹Sihon raja Amori dan Og raja Basan, dan banmandum raja di nanggroe Kanaan.

¹²Laju nanggroe awaknyan geujok jeuet keuhak milék Israel, umat Gobnyan.

¹³Ya TUHAN, Droeneueh teutab jijak peugah, dan nan Droeneueh ji ingat lé banmandum keuturonan,

¹⁴sabab Droeneueh neubri keuadelan ubak umat Droeneueh, dan neugaséh banmandum hamba Droeneueh.

¹⁵Beurala awaknyan teupeuget nibak méuh dan pirak, nyang jipeuget lé jaroe manusia.

¹⁶Bak awaknyan na babah, teuma babah jihnyan hana hase jipeugah haba, na mata, teuma matanyan hana hase jikeumalon.

¹⁷Bak awaknyan na ôn punyueng, teuma geulinyueng jihnyan hana hase meudeungoe, dan nibak lam babah jihnyan hana hase jiteubiet nafáh.

¹⁸Seumoga meunan kheueh naseb ureuëng-ureuëng nyang jipeubuet nyan, dan nyang peucaya ubak jihnyan.

¹⁹Pujoe kheueh TUHAN, hai umat Israel, pujoe kheueh Gobnyan, hai teungku-teungku imeum Allah!

²⁰Pujoe kheueh TUHAN, hai ureuëng-ureuëng Lewi, dan pujoe kheueh Gobnyan, hai gata banmandum nyang taqwa.

²¹Pujoe kheueh TUHAN di Sion, di Yerusalem teumpat tinggai Gobnyan.