PTL Lyrics

PRAISE THE LORD LYRICS

Daily Reading Bible

✅ Shared successfully

Acehnese Holy Bible Wordproject Bible

Zabur 139

24 verses

¹Keu teupimpén kor. Zabur Nabi Daud. neuturi keu ulôn.

²Droeneueh neuteupeue peue mantong nyang ulôn peubuet; rot jiôh Droeneueh ka neutuóh pikeran ulôn.

³Droeneueh deuh neungieng ulôn, bah kheueh watée ulôn meukeureuja meunan cit watée ulôn meureuhat, Droeneueh neuteupeue peue mantong nyang ulôn peubuet.

⁴Dan sigohlom ulôn peugah haba, Droeneueh neuteupeue peue nyang keuneuk ulôn peugah.

⁵Droeneueh neukeulileng ulôn rot meubagoe peunjuru, dan Droeneueh lindong ulôn deungon kuasa Droeneueh.

⁶Lumpah that lhok nibak ulôn iéleumé Droeneueh nyan, hana hase jimat lé pikeran ulôn.

⁷Hoe kheueh nyang hase ulôn jak mangat hase teupeusi nibak kuasa Droeneueh? Dan hoe teuma hase ulôn plueng mangat jiôh nibak Droeneueh?

⁸Meunyoe ulangét nyang ulôn ék, Droeneueh pih ka na disinan, meunyoe ulôn éh didalam mawöt, disinan pih na Droeneueh.

⁹Meunyoe ulôn po rot ufúk timu atawa lôn tinggai seungab di ujong barat nyang paleng jiôh,

¹⁰disinan pih Droeneueh na neutulông ulôn; disinan cit teuma jaroe Droeneueh neubimbéng ulôn.

¹¹Meunyoe ulôn lakée mangat seupôt jitôb jikeuleubong ulôn, dan trang nyang na di seukeulileng ulôn jeuet keu malam,

¹²teuma nyang seupôt nyan hana seupôt nibak Droeneueh; malam nyan trang lagée uroe, dan seupôt nyang lagée trang.

¹³Droeneueh neucebta tieb-tieb bagian nibak tuboh ulôn, dan neubantuek ulôn didalam pruet ma lôn.

¹⁴Ulôn lôn pujoe Droeneueh sabab ulôn luwa biasa! Peue mantong nyang Droeneueh peubuet keubit ajaéb dan meungagomkan, ulôn biet-biet insaf.

¹⁵Watée tuleueng-tuleueng ulôn teupeujeuet, deungon teuato teukarang óh get dalam pluet ma ulôn, seudangkan ulôn timoh disinan seucara rahsia, ulôn hana teusöm nibak Droeneueh.

¹⁶Droeneueh deuh neungieng ulôn watée lôn mantong na dalam pluet ma; banmandum nyan ka teucatet didalam kitab Droeneueh; uroe-uroe jihpi ka teupeuteuntée sigohlom sapeue pi teupeuphon.

¹⁷Padub na sulet jih pikeran Droeneueh nibak ulôn, ya Allah, dan padub na le jeumeulah jih!

¹⁸Meunyoe lôn itong, leubeh le nibak ano nyang na di panté; meunyoe ulôn beudôh nibak teumpat éh, mantong na watée ulôn pike keu Droeneueh.

¹⁹Bah kheueh ureuëng jeuhet Droeneueh peuhanco, ya Po teu Allah, neupeujiôh kheueh ureuëng peurô darah nyan nibak ulôn!

²⁰Awaknyan jipeugah nyang jeuhet keuhai Droeneueh, dan jimeusumpah peuleusu keuhai banda-banda Droeneueh.

²¹Ya TUHAN, ulôn banci keu ureuëng nyang banci Droeneueh, até ulôn tunu keu ureuëng nyang lawan Droeneueh!

²²Awaknyan lôn banci luwa biasa, dan ulôn anggab sibagoe musoh nyang paleng raya.

²³Neuseulidek kheueh ulôn, ya Allah, neuseunom kheueh lam até lôn, neu ujoe kheueh ulôn dan neuteupeue kheueh pikeran ulôn.

²⁴Neungieng kheueh aleh na nyang jeuhet nibak tuboh lôn, dan neubimbéng kheueh ulôn bak jalan nyang keukai.

← Previous All Books Next →

Zabur 139 — Acehnese Holy Bible Wordproject Bible | Holy Bible | PTL Lyrics