Zabur 14

¹Keu teupimpén kor. Zabur Nabi Daud.

²Lam syeuruga TUHAN geupandang umat manusia keu geumita ureuëng malém nyang seumah Gobnyan.

³Teuma banmandum ureuëng ka meunyeuleweng dan beujat, hana meusidroe pih nyang jipeubuet nyang gét.

⁴Feureuman TUHAN, "Peu kheueh hana sada di ureuëng-ureuëng jeuhet nyan? Awaknyan udeb ngon cara jireubot umat Ulôn dan hántom na jimeudoá keu Ulôn."

⁵Ureuëng jeuhet teuma jiteuka yo ngon teumakot lagée that, sabab Allah geulindong ureuëng nyang taát ubak Gobnyan.

⁶Ureuëng jeuhet jikeuneuk tam keu ureuëng gasien, teuma TUHAN jeuet keu peulindong awaknyan.

⁷Seumoga di Sion teuka keuseulamatan keu Israel! Dan keuturonan Nabi Yakub meusuka cita meunyoe TUHAN ka geupeupuléh keuadaan umat Gobnyan.